7 снежня 2017 года па благаславенню епіскапа Барысаўскага і Мар'інагорскага Веніяміна ў горадзе Смалявічы адбыліся Трэція Барысаўскія рэгіянальныя адукацыйныя Калядныя чытанні «Маральныя каштоўнасці і будучыня чалавецтва».
Чытанні былі арганізаваны Мінскім абласным выканаўчым камітэтам, Барысаўскай епархіяй Беларускай Праваслаўнай Царквы, Смалявіцкім раённым выканаўчым камітэтам.
У цэнтры ўвагі чытанняў былі такія тэмы, як духоўная спадчына нашай краіны і актуальныя праблемы развіцця сацыякультурнага і маральнага жыцця беларускага грамадства, развіццё супрацоўніцтва паміж Беларускай Праваслаўнай Царквой, інстытутамі дзяржаўнай улады і грамадскімі аб'яднаннямі.
У чытаннях прынялі ўдзел прадстаўнікі органаў дзяржаўнай улады, святары, дзеячы культуры, навуковыя работнікі, прадстаўнікі сілавых структур, кіраўнікі і выкладчыкі ўстаноў адукацыі, медыцынскія і сацыяльныя работнікі, выкладчыкі нядзельных школ, студэнты, замежныя госці.
Папярэднічаў Барысаўскім рэгіянальным адукацыйным Калядным чытанням урачысты малебен у храме ў гонар Мінскай іконы Божай Маці горада Смалявічы, які здзейсніў старшыня аддзела рэлігійнай адукацыі і катэхізацыі Барысаўскай епархіі, благачынны II Барысаўскай царкоўнай акругі, настаяцель прыхода дабравернага князя Дзімітрыя Данскога ў горадзе Барысаве протаіерэй Сергій Башкіраў. Па заканчэнні набажэнства айцец Сергій пажадаў усім удзельнікам плённай працы.
Пленарнае пасяджэнне адкрыў начальнік галоўнага ўпраўлення ідэалагічнай работы, культуры і па справах моладзі Мінскага абласнога выканаўчага камітэта Сяргей Паўлавіч Ладышаў.
З дакладам па тэме: «Маральныя каштоўнасці і будучыня чалавецтва» выступіў епіскап Барысаўскі і Мар'інагорскі Веніямін, старшыня Сінадальнага аддзела рэлігійнай адукацыі і катэхізацыі Беларускай Праваслаўнай Царквы.
З дакладам «Фарміраванне маральных каштоўнасцяў на традыцыях беларускай культуры» выступіў загадчык аддзела старажытнабеларускай культуры Дзяржаўнай навуковай установы «Цэнтр даследаванняў беларускай культуры, мовы і літаратуры НАН Беларусі», кандыдат мастацтвазнаўства, дацэнт Барыс Андрэевіч Лазука.
Дацэнт кафедры агульнай і дашкольнай педагогікі ўстановы адукацыі «Беларускі дзяржаўны педагагічны ўніверсітэт імя Максіма Танка», кандыдат псіхалагічных навук Людміла Уладзіміраўна Фінькевіч азнаёміла прысутных з дакладам на тэму: «Сацыякультурнае партнёрства інстытутаў сацыялізацыі дзіцяці ў фарміраванні маральнай свядомасці асобы».
У завяршэнне пленарнага пасяджэння з дакладам «Вопыт работы абласнога рэсурснага цэнтра па духоўна-маральнаму выхаванню» выступіла дырэктар ДУА «ВПК яслі сад-сярэдняя школа №24 горада Барысава» Таццяна Мікалаеўна Пракапенкава.
Пасля абеду ўдзельнікі Барысаўскіх рэгіянальных Калядных адукацыйных чытанняў працягнулі працу ў секцыях.
Па заканчэнні працы секцый адбылося падвядзенне вынікаў працы секцый і закрыццё чытанняў.
Епіскап Барысаўскі і Мар'інагорскі Веніямін уручыў узнагароды пераможцам і ўдзельнікам епархіяльнага дзіцячага творчага конкурсу «Прыгажосць Божага свету».
Затым адбыўся канцэрт творчых калектываў Смалявіцкага раёна.
