Пошук

У Мінску адкрылася праваслаўная кніжная выстаўка-форум «Радасць Слова»

16 кастрычніка 2019 Церемонию открытия форума возглавили: митрополит Минский и Заславский Павел, Патриарший Экзарх всея Беларуси; митрополит Калужский и Боровский Климент, председатель Издательского совета Русской Православной Церкви; епископ Молодечненский и Столбцовский Павел, председатель Издательского совета Белорусской Православной Церкви.

16 кастрычніка 2019 года ў культурна-дзелавым цэнтры «Дом Масквы» ў горадзе Мінску адбылося ўрачыстае адкрыццё праваслаўнай кніжнай выстаўкі-форуму «Радасць Слова».

Форум «Радасць Слова» — гэта асветніцкі праект Выдавецкага савета Рускай Праваслаўнай Царквы, які па благаславенню Свяцейшага Патрыярха Маскоўскага і ўсяе Русі Кірыла рэалізуецца больш за восем гадоў у розных краінах.

Арганізатарамі выстаўкі ў сталіцы Беларусі выступілі: Беларуская Праваслаўная Царква, Выдавецкі савет Рускай Праваслаўнай Царквы, Дом Масквы ў горадзе Мінску. Падтрымку ў правядзенні форуму аказала Пасольства Расійскай Федэрацыі.

Цырымонію адкрыцця выстаўкі-форуму «Радасць Слова» ўзначалілі: мітрапаліт Мінскі і Заслаўскі Павел, Патрыяршы Экзарх усяе Беларусі; мітрапаліт Калужскі і Бораўскі Клімент, старшыня Выдавецкага савета Рускай Праваслаўнай Царквы; епіскап Маладзечанскі і Стаўбцоўскі Павел, старшыня Выдавецкага савета Беларускай Праваслаўнай Царквы.

Рэктар Мінскай духоўнай акадэміі архімандрыт Сергій (Акімаў) здзейсніў малебен на пачатак добрай справы, пасля чаго мітрапаліт Павел і мітрапаліт Клімент звярнуліся да прысутных са словамі прывітання.

Мітрапаліт Павел выказаў сардэчную падзяку арганізатарам і ўдзельнікам выстаўкі, заклікаў благаславенне Божае на іх падзвіжніцкую працу і падкрэсліў, што адна з задач праваслаўнай асветы — садзейнічаць развіццю культуры чытання, бо добрыя кнігі вучаць нас дабру, стваральнай працы, годнаму і праведнаму жыццю.

Мітрапаліт Клімент адзначыў, што Беларусь для яго — не чужая зямля. Менавіта ў Мінску, у Свята-Духавым кафедральным саборы, у 1982 годзе адбылася яго архіерэйская хіратонія.

Старшыня Выдавецкага савета Рускай Праваслаўнай Царквы звярнуў асаблівую ўвагу на тое, што не выпадкова ў назве форуму «Слова» пішацца з вялікай літары. Паводле Евангелля, у пачатку было Слова, і Слова было ў Бога, і Богам было Слова (Ін. 1:1). Таму задача выстаўкі «Радасць Слова» — не толькі пазнаёміць чытачоў з разнастайнасцю сучаснай праваслаўнай літаратуры, але і, у першую чаргу, нагадаць пра вялікую радасць жыцця з Богам.

Памочнік старшыні Выдавецкага савета Рускай Праваслаўнай Царквы іераманах Макарый (Камагораў) правёў прэзентацыю разгорнутай у зале фотавыстаўкі «Афон. Да 1000-годдзя рускай прысутнасці на Святой Гары». У экспазіцыю ўключаны 52 фатаграфіі, зробленыя ў 19-21 стагоддзях праваслаўным навукоўцам і фатографам, дзейсным тайным саветнікам Пятром Севасцьянавым, манахамі Рускага на Афоне Свята-Панцеляіманава манастыра Ляонціем і Генадзем, пецярбургскімі фатографамі Аляксандрам Кітаевым і Станіславам Чабуткіным, а таксама супрацоўнікам фотаслужбы Патрыярха Маскоўскага і ўсяе Русі Сяргеем Уласавым.

Далей удзельнікі форуму прайшлі ў актавую залу, дзе мітрапаліт Павел ізноў сардэчна прывітаў усіх гасцей. «Па слову Спасіцеля, дзе двое альбо трое сабраліся ў імя Маё, там Я сярод іх (Мф. 18:20). І сёння з намі Бог!» — сказаў архіпастыр.

Патрыяршы Экзарх усяе Беларусі паднёс старшыні Выдавецкага савета Рускай Праваслаўнай Царквы ў дар фотаальбом «Хіратонія архімандрыта Клімента (Капаліна) у епіскапа Серпухаўскага, вікарыя Маскоўскай епархіі». Альбом створаны метадам аблічбоўкі архіўных папяровых фатаграфій.

Уладыка Клімент цёпла падзякаваў мітрапаліту Паўлу за каштоўны падарунак і звярнуўся да ўсіх са словам настаўлення, у якім заклікаў захоўваць вернасць Богу і Святой Царкве.

Затым прысутных вітаў Дзмітрый Фёдаравіч Мезенцаў, Надзвычайны і Паўнамоцны Пасол Расійскай Федэрацыі ў Рэспубліцы Беларусь. Кіраўнік расійскай дыпламатычнай місіі, у прыватнасці, адзначыў пазітыўную ролю культурна-асветніцкіх ініцыятыў Праваслаўнай Царквы ва ўмацаванні дружбы брацкіх народаў Беларусі і Расіі.

Быў зачытаны прывітальны адрас міністра інфармацыі Рэспублікі Беларусь Аляксандра Мікалаевіча Карлюкевіча.

Генеральны дырэктар асацыяцыі «Праваслаўная кніга» Аляксей Сцяпанавіч Галавін правёў прэзентацыю новых кніг Свяцейшага Патрыярха Маскоўскага і ўсяе Русі Кірыла, выпушчаных Выдавецтвам Маскоўскай Патрыярхіі і іншымі выдавецтвамі.

Мітрапаліт Клімент уручыў намесніку дырэктара Нацыянальнай бібліятэкі Беларусі па інфармацыйных рэсурсах Таццяне Васільеўне Кузьмініч і Патрыяршаму Экзарху камплекты кніг ад Выдавецкага савета Рускай Праваслаўнай Царквы.

Мерапрыемства працягнулася канферэнцыяй «Подзвіг навамучанікаў», мадэратарам якой выступіў рэктар МінДА архімандрыт Сергій (Акімаў).

На канферэнцыі прагучалі даклады:

- протаіерэй Аляксандр Лапушанскі (Гомель), старшыня камісіі па кананізацыі святых Гомельскай епархіі;

- Аляксандр Валер'евіч Слесараў (Мінск), прарэктар па навуковай рабоце Мінскіх духоўных акадэміі і семінарыі, намеснік старшыні камісіі па кананізацыі святых Беларускай Праваслаўнай Царквы — «Новыя звесткі аб царкоўным служэнні прападобнамучаніка Серафіма (Шахмуця), архімандрыта Жыровіцкага, у гады савецкіх атэістычных ганенняў і нямецкай акупацыі Беларусі».

Пасля чаго перад прысутнымі выступілі:

- протаіерэй Алег Сцяняеў (Масква), пісьменнік, багаслоў і публіцыст, вядомы прапаведнік і місіянер, спецыяліст у галіне сектазнаўства і параўнальнага багаслоўя;

- Віктар Мікалаевіч Нікалаеў (Масква), ветэран Афганскай вайны, пісьменнік, лаўрэат Патрыяршай літаратурнай прэміі, аўтар кнігі «Той, хто жыве пад покрывам Усявышняга», прысвечанай баявому і чалавечаму подзвігу воінаў, якія ўдзельнічалі ў падзеях у Афганістане ў 1970-х — 1980-х гадах мінулага стагоддзя.

Выстаўку-форум «Радасць Слова» ў першы дзень яе працы наведалі: Надзвычайны і Паўнамоцны Пасол Рэспублікі Малдова ў Рэспубліцы Беларусь Віктар Сарачан; Надзвычайны і Паўнамоцны Пасол Рэспублікі Арменія ў Рэспубліцы Беларусь Армен Гевандзян; мітрапаліт Вострскі Цімафей, Экзарх Іерусалімскага Патрыярхату на востраве Кіпр; лідары традыцыйных канфесій, супрацоўнікі дыпламатычных місій, прадстаўнікі дзяржаўных структур, святары.

Праваслаўная кніжная выстаўка-форум «Радасць Слова» працягне сваю працу 17 кастрычніка. Месца правядзення: Дом Масквы, вул. Камуністычная, 86. Рэжым работы: з 10:00 да 19:00. Уваход вольны.

 Church.by