Пошук

III этап рэгіянальных Калядных чытанняў прайшоў у Брэсцкай епархіі

12 снежня 2018

10 снежня 2018 года ў ніжнім Казанскім храме Сабора Уваскрасення Хрыстовага горада Брэста прайшоў III этап штогадовых рэгіянальных Калядных чытанняў «Моладзь: свабода і адказнасць». Тэмамі для абмеркавання сталі: праца праваслаўных катэхізатараў і святароў у маладзёжным асяроддзі; далучэнне маладога пакалення да свядомага царкоўнага жыцця, удзелу ў Таінствах Царквы; выпрацоўка і падача разумнай і адзіна дакладнай хрысціянскай стратэгіі распараджэння ўласнай свабодай як неацэнным дарам Божым.

Форум сабраў прадстаўнікоў духавенства, сацыяльных царкоўных работнікаў, кіраўнікоў моладзевых брацтваў і рухаў Брэсцкай епархіі, настаўнікаў нядзельных школ і сацыяльных псіхолагаў.

Узначаліў працу Чытанняў архіепіскап Брэсцкі і Кобрынскі Іаан.

У ходзе пасяджэння і паралельных дыскусій было прадстаўлена дванаццаць дакладаў, якія тычацца тэорыі сучаснай працы з маладзёжным асяроддзем, бліжэйшых прагнозаў, надзённых праблем і дэманстрацыі ўжо наяўнага вопыту ў самых розных яго формах.

Перад пачаткам працы архіепіскап Іаан звярнуўся да аўдыторыі і дакладчыкаў з прывітальным словам, коратка азначыўшы круг праблем для патэнцыяльнага рашэння і абмеркавання. Затым яго Высокапраасвяшчэнства выступіў з дакладам на тэму хрысціянскай свабоды і яе скажонага разумення сучасным грамадствам. Уладыка звярнуў асаблівую ўвагу на практыкі, якія сталі ўжо «нармальнымі» ў сучасным грамадстве-дэманстрацыі «абсалютнай» свабоды асобы і, як вынік, поўнай адсутнасці адказнасці сучаснага чалавека за свае ўчынкі: забойствы немаўлят ва ўлонні маці (аборты), ЭКО, распаўсюджванне розных суіцыдальных формаў паводзінаў сярод падлеткаў і непасрэдна феномен суіцыду (дарослага і падлеткавага), інтэрнэт-залежнасць, праблемы інстытута сям'і і ўзаемаадносіны старэйшага і малодшага пакаленняў. Пільнаму разгляду таксама падверглася канцэпцыя праекта закона Рэспублікі Беларусь «Аб хатнім гвалце» і Стамбульская канвенцыя «Аб папярэджанні і барацьбе з гвалтам у дачыненні да жанчын і хатнім гвалтам», якая ляжыць у аснове канцэпцыі.

На канферэнцыі былі прадстаўлены наступныя даклады:

1. Аб непадзельнасці паняццяў свабоды і адказнасці для чалавека. Хрысціянскія каштоўнасці як апора самасвядомасці чалавека (Кобрынскае благачынне: іерэй Аляксандр Ясючэня);
2. Выхаванне моладзі ва ўмовах свабоды і адказнасці (Бярозаўскае благачынне: Снітко Святлана Канстанцінаўна, настаўнік нядзельнай школы прыхода святых першавярхоўных апосталаў Пятра і Паўла горада Бярозы);
3. Уплыў сродкаў масавай інфармацыі на духоўна-маральнае развіццё моладзі (Пружанскае благачынне: Сысаляціна Арына, малодшы навуковы супрацоўнік музея-сядзібы «Пружанскі палацык»);
4. Сучасная моладзь (Маларыцкае благачынне: Калеснікава Людміла Мікалаеўна, настаўнік нядзельнай школы прыхода храма свяціцеля Мікалая Цудатворца горада Маларыта);
5. Адказнасць: моладзь і свабода (Брэсцкае раённае благачынне: Марозава Яўгенія Міхайлаўна, сацыяльны работнік сабора Уваскрасення Хрыстовага горада Брэста);
6. Роля нядзельнай школы ў выхаванні духоўна-маральных каштоўнасцяў і адказных паводзін навучэнцаў (Драгічынскае благачынне: Хвісюк Валянціна Іванаўна, выкладчык нядзельнай школы прыхода храма Святой Жыццепачатнай Тройцы аграгарадка Бездеж);
7. Сучасная моладзевая культура. Выхаванне свабоды і адказнасці праз далучэнне да літаратуры, мастацтва, творчасці (Камянецкае благачынне: Нікіцюк Ніна Астапаўна, памочнік благачыннага Камянецкай акругі па місіянерскай рабоце);
8. Практыка ўзаемадзеяння парафіі і сучаснай школы ў справе духоўна-маральнага выхавання моладзі (Жабінкаўскае благачынне: Петрусевіч Юлія, адказная за работу з моладдзю ў Жабінкаўскім благачынні);
9. Розніца пакаленняў. Як «дастукацца» да пакаленняў «Y» і «Z» (Рапінчук Мікалай, практыкуючы псіхолаг, кансультант па ўзаемаадносінах);
10. Моладзь у Царкве: свабода або абмежаванне. Вопыт моладзевага служэння Брэсцкай епархіі (іерэй Павел Рамановіч, старшыня Аддзела Брэсцкай епархіі па рабоце з моладдзю);
11. Аб прыярытэтных кірунках працы епархіяльнага аддзела рэлігійнай адукацыі і катэхізацыі (протаіерэй Яўген Ліхота, старшыня аддзела Брэсцкай епархіі па рэлігійнай адукацыі і катэхізацыі).

Затым усе ўдзельнікі форуму сабраліся за круглым сталом для абмеркавання прадстаўленага матэрыялу і падвядзення вынікаў канферэнцыі.

Архіепіскап Іаан выказаў падзяку ўсім спікерам, ацаніў працу з моладдзю, якая праводзіцца ў благачыннях Брэсцкай епархіі, выказаўшы надзею на далейшае яе развіццё і канчатковае пераадоленне надзённых праблем у маладзёжным асяроддзі.

Пасля сумеснай малітвы ўдзельнікі канферэнцыі і педагогі змаглі ў прыватным парадку абмеркаваць праблемы і хвалюючыя іх пытанні.

Брэсцкая епархія / Church.by