Свяцейшы Патрыярх Кірыл узначаліў першае ў гісторыі пасяджэнне Свяшчэннага Сінода Рускай Праваслаўнай Царквы ў Мінску

15 кастрычніка 2018

top.jpg

15 кастрычніка 2018 года Свяцейшы Патрыярх Маскоўскі і ўсяе Русі Кірыл узначаліў пасяджэнне Свяшчэннага Сінода Рускай Праваслаўнай Царквы, якое праходзіць у Мінскім епархіяльным упраўленні. Гэта першае ў гісторыі пасяджэнне Сінода Рускай Праваслаўнай Царквы на беларускай зямлі.

Адкрываючы пасяджэнне, Прадстаяцель Рускай Праваслаўнай Царквы звярнуўся да членаў Свяшчэннага Сінода з уступным словам:

«Ваша Блажэнства! Вашы Высокапраасвяшчэнствы і Прыасвяшчэнствы!

З некаторым спазненнем мы пачынаем пасяджэнне Свяшчэннага Сінода. Прычына вельмі важкая - мы мелі змястоўную гутарку  з кіраўніком дзяржавы, Прэзідэнтам Рэспублікі Беларусь Аляксандрам Рыгоравічам Лукашэнкам.

У той частцы, якая засталася па-за грамадскай увагай, мы абмяркоўвалі цэлы шэраг вельмі важных пытанняў, звязаных і з жыццём Беларускай Праваслаўнай Царквы, і з міжправаслаўнымі адносінамі, і з міжхрысціянскімі адносінамі. І павінен сказаць, што размова зрабіла на мяне вельмі станоўчае ўражанне. Кожны раз, калі я бываю ў Беларусі, у мяне адбываюцца такія нефармальныя сустрэчы з Прэзідэнтам, якія даюць магчымасць, па-першае, зразумець пазіцыю суразмоўцы, па-другое, абмеркаваць праблемы, якія ўяўляюць узаемную цікавасць.

Затым адбылася наша агульная сустрэча з Кіраўніком дзяржавы, - лічу, таксама вельмі карысная. Думаю, важна, што Аляксандр Рыгоравіч меў магчымасць звярнуцца са словам да ўсяго епіскапату Беларускай Царквы, да членаў Сінода, а акрамя таго, пагутарыць нефармальна, асабліва з прадстаўнікамі беларускага епіскапату.

А цяпер мы павінны пачаць пасяджэнне Свяшчэннага Сінода. У нас шмат вельмі важных пытанняў, а часу для нашай працы застаецца не так шмат. Таму я б зрабіў некаторыя прапановы па карэкціроўцы нашага парадку дня. Але ў пачатку мне хацелася б падзякаваць членам каманд, якія прадстаўляюць розныя сродкі масавай інфармацыі, за ўвагу да нашага Сіноду і пажадаць вам поспеху ў вашай прафесійнай дзейнасці».

Пастаяннымі членамі Свяшчэннага Сінода з'яўляюцца: мітрапаліт Кіеўскі і ўсяе Украіны Ануфрый; мітрапаліт Круціцкі і Каломенскі Ювеналій; мітрапаліт Кішынёўскі і ўсяе Малдовы Уладзімір; мітрапаліт Астанайскі і Казахстанскі Аляксандр, кіраўнік Мітрапалічай акругі ў Рэспубліцы Казахстан; мітрапаліт Ташкенцкі і Узбекістанскі Вікенцій, кіраўнік Сярэднеазіяцкай Мітрапалічай акругі; мітрапаліт Санкт-Пецярбургскі і Ладажскі Варсанофій, кіраўнік спраў Маскоўскай Патрыярхіі; мітрапаліт Мінскі і Заслаўскі Павел, Патрыяршы Экзарх усяе Беларусі; мітрапаліт Валакаламскі Іларыён, старшыня Аддзела знешніх царкоўных сувязяў Маскоўскага Патрыярхату.

Для ўдзелу ў зімовай сесіі (верасень-люты) запрошаны: мітрапаліт Запарожскі і Мелітопальскі Лука; мітрапаліт Барнаульскі і Алтайскі Сергій; епіскап Нарвскі і Прычудскі Лазар; епіскап Рыбінскі і Данілаўскі Веніямін; епіскап Находкінскі і Праабражэнскі Мікалай.

У пасяджэнні прымае ўдзел Ганаровы Патрыяршы Экзарх усяе Беларусі мітрапаліт Філарэт (Вахрамееў). Згодна з рашэннем Свяшчэннага Сінода Рускай Праваслаўнай Царквы ад 25-26 снежня 2013 года, за залічаным на спачын Высокапраасвяшчэнным мітрапалітам Філарэтам, ганаровым Патрыяршым Экзархам усяе Беларусі, захоўваецца права ўдзелу ў працы Свяшчэннага Сінода (журнал № 125).

***

Мінскае епархіяльнае ўпраўленне

У XVIII стагоддзі на месцы, дзе зараз знаходзіцца епархіяльнае ўпраўленне, размяшчаўся рымска-каталіцкі мужчынскі манастыр ордэна кармелітаў з каменным касцёлам святой Марыі Магдаліны. Мяркуючы па плане Мінска 1793 года, у касцёле было шэсць алтароў. У адным з іх у срэбным убранні знаходзілася цудатворная ікона Божай Маці «Шкаплерная». Пасля падзелаў Рэчы Паспалітай і ўваходжання Мінска ў склад Расійскай імперыі манастыр быў скасаваны. Касцёл доўгі час пуставаў і ў сярэдзіне XIX стагоддзя быў знесены.

Трохпавярховы будынак Мінскага епархіяльнага ўпраўлення быў узведзены ў 1985 годзе па праекце архітэктара Льва Пагарэлава. На дадзены момант яно спалучае функцыі адміністрацыйнага цэнтра Мінскай епархіі і Беларускай Праваслаўнай Царквы.

На трэцім паверсе будынка ўладкавана рэзідэнцыя Ганаровага Патрыяршага Экзарха ўсяе Беларусі мітрапаліта Філарэта. Тут жа знаходзіцца дамавая царква, асвячоная ў гонар Сабора Беларускіх святых. Разьбяны іканастас храма выкананы ў стылі барока, сцены распісаны ў візантыйскім стылі.

На другім паверсе размешчаны Сінадальная зала, дзе праходзяць пасяджэнні Сінода Беларускай Праваслаўнай Царквы. Таксама ў будынку размяшчаюцца кабінеты Патрыяршага Экзарха ўсяе Беларусі, Упраўлення спраў Мінскай Экзархіі, шэрагу сінадальных аддзелаў Беларускага Экзархату, канцылярыі, бухгалтэрыі, юрыдычнай і гаспадарчай служб Беларускай Праваслаўнай Царквы.

Прэс-служба Патрыярха Маскоўскага і ўсяе Русі / Church.by

Фотарэпартаж