Пошук

У Мінскай духоўнай семінарыі адбыліся IV Чытанні памяці свяшчэннамучаніка мітрапаліта Круціцкага Пятра (Палянскага)

10 чэрвеня 2019

7 чэрвеня 2019 года ў Мінскай духоўнай семінарыі па благаславенню рэктара архіепіскапа Навагрудскага і Слонімскага Гурыя прайшла навуковая канферэнцыя «IV Чытанні памяці свяшчэннамучаніка мітрапаліта Круціцкага Пятра (Палянскага, 1862-1937)». У працы канферэнцыі прынялі ўдзел выкладчыкі і студэнты Мінскай духоўнай семінарыі, а таксама святары Навагрудскай епархіі.

Чытанні з'яўляюцца навуковым форумам, прысвечаным памяці Патрыяршага Месцазахавальніка мітрапаліта Круціцкага Пятра (Палянскага), і штогод праводзяцца ў Мінскай духоўнай семінарыі. Свяшчэннамучанік Пётр узначальваў Рускую Праваслаўную Царкву з 1925 па 1937 гады, калі атэістычныя ганенні на рэлігію ў Савецкім Саюзе дасягнулі свайго найвышэйшага развіцця. Па гэтай прычыне з імем мітрапаліта Пятра (Палянскага), які многія гады правёў у зняволенні і быў расстраляны ў 1937 годзе, асацыіруецца найбольш цяжкі перыяд рускай царкоўнай гісторыі.

Для Мінскай духоўнай семінарыі памяць аб свяшчэннамучаніку мітрапаліце Пятры мае асаблівую значнасць. На працягу дзесяці гадоў, з 1896 па 1906 гады, будучы свяціцель узначальваў Жыровіцкае духоўнае вучылішча. Вынікам працы П. Ф. Палянскага стала рашэнне Вучылішчнага камітэта пры Свяцейшым Сінодзе аб прызнанні вучылішча прыкладным па пастаноўцы вучэбнай і выхаваўчай працы.

У 2016 годзе рэктар Мінскай духоўнай семінарыі архіепіскап Навагрудскі і Слонімскі Гурый ініцыіраваў штогадовае правядзенне Чытанняў памяці свяшчэннамучаніка мітрапаліта Круціцкага Пятра (Палянскага) з мэтай захавання памяці аб навамучаніках, вызнаўцах і ўсіх праваслаўных хрысціянах, нявінна пацярпелых у гады масавых рэпрэсій.

Адкрыў працу форуму першы прарэктар Мінскай духоўнай семінарыі протаіерэй Андрэй Цыгель, які абвясціў прывітальны адрас рэктара Высокапраасвяшчэннейшага архіепіскапа Гурыя. Мадэратарам канферэнцыі выступіў прарэктар па навуковай рабоце дацэнт А. В. Слесараў.

Першы даклад, падрыхтаваны старшынёй Камісіі па кананізацыі святых Беларускай Праваслаўнай Царквы, намеснікам Нікольскага мужчынскага манастыра горада Гомеля архімандрытам Амвросіем (Шаўцовым), быў прысвечаны сучаснай практыцы прылічэння да ліку святых новамучанікаў і вызнаўцаў ХХ стагоддзя.

Далей дацэнт Мінскай духоўнай семінарыі протаіерэй Георгій Сакалоў прадставіў паведамленне на тэму «Свяшчэннамучанік Сімяон Харашкевіч: старонкі жыцця».

Першы прарэктар Мінскага гарадскога інстытута развіцця адукацыі прафесар С. П. Стрэнкоўскі выступіў з дакладам «Прасапаграфія парафіяльнага духавенства Літоўскай епархіі ў XIX — пачатку ХХ стагоддзя».

Дацэнт кафедры гісторыі славян і спецыяльных гістарычных дысцыплін гістарычнага факультэта Гомельскага дзяржаўнага ўніверсітэта імя Францыска Скарыны С. Ф. Верамееў агучыў даклад «Дзейнасць кіраўніка VI аддзялення сакрэтнага аддзела ГПУ Яўгена Тучкова па барацьбе з Рускай Праваслаўнай Царквой».

Прарэктар па навуковай рабоце Мінскіх духоўных акадэміі і семінарыі дацэнт А. В. Слесараў выступіў з паведамленнем «Вызнаўчы подзвіг епіскапа Гомельскага Ціхана (Шарапава) (1886 — 1937)».

Затым адбылася прэзентацыя новай кнігі прафесара С. П. Стрэнкоўскага «Свяшчэнна- і царкоўнаслужыцелі праваслаўных прыходаў Лідскага і Ашмянскага паветаў у XIX — пачатку XX стагоддзя» (Мінск, 2019).

Завяршыліся IV Чытанні памяці свяшчэннамучаніка мітрапаліта Круціцкага Пятра (Палянскага) абвяшчэннем вечнай памяці ўсім нявінна пацярпелым у гады ганенняў на Рускую Праваслаўную Царкву ў ХХ стагоддзі.

МінДС / Church.by