Пошук

У Полацку адбыліся ўрачыстасці ў гонар свяшчэннамучаніка Канстанціна Жданава, прасвітара Шаркаўшчынскага

05 мая 2021

4 мая, у аўторак Светлай сядміцы, у Полацку адбыліся ўрачыстасці ў гонар свяшчэннамучаніка Канстанціна Жданава, прасвітара Шаркаўшчынскага.

У гэты дзень епіскап Полацкі і Глыбоцкі Ігнацій узначаліў саборную Бажэственную літургію ў Богаяўленскім кафедральным саборы горада Полацка.

Яго Праасвяшчэнству саслужылі сакратар Полацкай епархіі протаіерэй Аляксандр Пятліцкі, духаўнік епархіі протаіерэй Аляксандр Карандзей і святары Полацкай епархіі.

Дыяканскі чын узначаліў дыякан Уладзімір Джэжора.

Богаслужэбныя спевы выканаў архіерэйскі хор пад кіраўніцтвам Наталлі Сямашка.

За богаслужэннем маліліся ігумення Беразвецкага жаночага манастыра ў гонар Архістратыга Божага Міхаіла горада Глыбокае ігумення Міхаіла (Сураўцава) і ігумення Спаса-Еўфрасіннеўскага стаўрапігіяльнага жаночага манастыра горада Полацка ігумення Еўдакія (Ляўшук).

Пасля запрычаснага сціха кіраўнік аддзела Полацкай епархіі па кананізацыі святых протаіерэй Мікалай Войтаў прамовіў пропаведзь пра дзень памяці, жыціе і мучаніцкую смерць Канстанціна Жданава, прасвітара Шаркаўшчынскага.

Пасля адпуста Бажэственнай літургіі пад звон званоў, царкоўныя спевы, з харугвамі і абразамі, асяняючы вернікаў крыжам і акрапляючы святой вадой, епіскап Ігнацій і саслужачыя святары здзейснілі вакол Богаяўленскага кафедральнага сабора хрэсны ход з малебнам свяшчэннамучаніку Канстанціну Жданаву, прасвітару Шаркаўшчынскаму.

Памяць свяшчэннамучаніка Канстанціна, прасвітара Шаркаўшчынскага, здзяйсняецца 29 красавіка ў дзень яго мучаніцкага скону. У гэтым годзе дзень прыпаў на Вялікі Чацвер, таму памятныя ўрачыстасці былі перанесены на Светлую сядміцу.

* * *

Іерэй Канстанцін Жданаў (сын святара) служыў у Стара-Шаркаўшчыне ў пачатку XX стагоддзя настаяцелем Свята-Успенскага храма. Мучаніцкі скон святар прыняў 29 красавіка 1919 года ў горадзе Дзісне за тое, што не адрокся ад веры Хрыстовай. Незадоўга да сваёй смерці, айцец Канстанцін вымавіў такія словы: «Што Бог пашле, тое і буду цярпець».

25 чэрвеня 1919 года цела іерэя Канстанціна Жданава было апранута ў новыя свяшчэнніцкія аблачэнні і пахавана ў склепе пад алтаром Дзісненскай могілкавай Свята-Адзігітрыеўскай царквы. Там яно было амаль дзевяноста гадоў. На працягу ўсяго гэтага часу айца Канстанціна, бязвінна пацярпелага ў гадзіну ганенняў, усе праваслаўныя Шаркаўшчынскай акругі шанавалі як свяшчэннамучаніка. Яны верылі ў яго малітоўнае заступніцтва, у тое, што па яго хадайніцтве Шаркаўшчынскі Свята-Успенскі храм не закрываўся ў перыяд ліхалецця. У памяць пра свайго настаяцеля прыхаджане змясцілі на сцяне Свята-Успенскай царквы партрэт айца Канстанціна, выкананы па захаванай фатаграфіі.

З 1995 года па благаславенню епіскапа Полацкага і Глыбоцкага Глеба (Савіна) у гэты дзень здзяйснялася набажэнства з памінаннем забітага за веру іерэя Канстанціна. Па благаславенню архіепіскапа Полацкага і Глыбоцкага Феадосія (Більчанкі) 20 жніўня 2008 года пачэсныя астанкі свяшчэннамучаніка Канстанціна былі вынятыя з-пад спуду.

Царкоўнае ўслаўленне іерэя Канстанціна Жданава ў ліку мясцовашанаваных святых адбылося 3 чэрвеня 2011 года ў старажытным Дзісненскім храме Уваскрасення Хрыстова. 4 чэрвеня 2011 года адбылося праслаўленне іерэя Канстанціна Жданава ў ліку мясцовашанаваных святых новамучанікаў і вызнаўцаў Беларускай Праваслаўнай Царквы. У той жа дзень у Васкрасенскім храме горада Дзісны была здзейснена Бажэственная літургія з чынам кананізацыі. Па благаславенню епіскапа Полацкага і Глыбоцкага Ігнація 27 красавіка 2020 года адбылося перанясенне святых мошчаў свяшчэннамучаніка Канстанціна, прасвітара Шаркаўшчынскага, з горада Дзісны ў Полацк. У цяперашні час мошчы свяшчэннамучаніка спачываюць у Богаяўленскім кафедральным саборы горада Полацка з правага боку ад алтара ў спецыяльна вырабленай для іх разьбяной драўлянай рацы.

11 сакавіка 2020 года на Свяшчэнным Сінодзе Рускай Праваслаўнай Царквы пастанавілі ўключыць у Сабор навамучанікаў і вызнаўцаў Царквы Рускай свяшчэннамучаніка Канстанціна, прасвітара Шаркаўшчынскага.

Полацкая епархія/Church.by