Пошук

Епіскап Лідскі Парфірый узначаліў працу чацвёртых епархіяльных Калядных чытанняў

29 кастрычніка 2018

26 кастрычніка 2018 года ў горадзе Лідзе адбыліся IV Лідскія епархіяльныя Калядныя адукацыйныя чытанні.

Перад пачаткам чытанняў епіскап Лідскі і Смаргонскі Парфірый здзейсніў малебен з заклікам дапамогі Святога Духа на ўсякую добрую справу ў Архістратыга-Міхайлаўскім кафедральным саборы горада Ліды.

Яго Праасвяшчэнству саслужылі айцы благачынныя і кіраўнікі аддзелаў Лідскай епархіі. У храме маліліся ўдзельнікі чытанняў, якія прыбылі з усіх благачынніцкіх акруг епархіі.

Затым у актавай зале Цэнтра творчасці дзяцей і моладзі адкрылася пленарнае пасяджэнне.

У прывітальным слове епіскап Парфірый звярнуў увагу прысутных на праблему няправільнага разумення свабоды нашымі сучаснікамі і падкрэсліў, што без правільных маральных арыенціраў свабода можа быць выкарыстана на шкоду.

Таксама ўдзельнікаў чытанняў вітала член Савета Рэспублікі, старшыня Лідскага раённага Савета дэпутатаў Інэса Генадзьеўна Белуш.

З дакладам «Выхаванне свабоднага і адказнага чалавека ў духу Святога Евангелля» выступіў кіраўнік аддзела рэлігійнай адукацыі і катэхізацыі Лідскай епархіі протаіерэй Расціслаў Лямачка.

Далей з дакладамі выступілі госці епархіяльных чытанняў. Протаіерэй Іаан Задарожын, старшыня Сінадальнага аддзела Беларускай Праваслаўнай Царквы па справах моладзі, у выступленні «Арганізацыя моладзевай працы ў епархіях Беларускай Праваслаўнай Царквы» вызначыў галоўныя задачы ў рабоце моладзевых царкоўных арганізацый. На думку айца Іаана, гэта свабода ў Хрысце, любоў і павага да маладых людзей, шчырасць і адкрытасць.

Протаіерэй Вячаслаў Гаплічнік, кіраўнік аддзела па справах моладзі Гродзенскай епархіі, распавёў аб розных формах і кірунках у рабоце з моладдзю ў брацтвах Гродзенскай епархіі.

Іерэй Павел Рамановіч, кіраўнік аддзела па справах моладзі Брэсцкай епархіі пазнаёміў прысутных з гісторыяй станаўлення і шляхамі развіцця царкоўнай моладзевай місіі на Брэстчыне.

Пасля выступленняў адбылося ўзнагароджанне Граматамі шэрагу калектываў, педагогаў, сацыяльных работнікаў і царкоўных супрацоўнікаў Лідскай епархіі.

У завяршэнне пленарнага пасяджэння з музычнымі нумарамі выступілі выхаванцы Лідскай дзіцячай школы мастацтваў.

Падчас перапынку брацтва свяціцеля Васілія Вялікага пры саборы Усіх святых горада Ліды запрасіла ўдзельнікаў на чаяванне, пасля чаго праца чытанняў працягнулася ў секцыях.

Лідская епархія / Church.by