Пошук

Мітрапаліт Веніямін здзейсніў утраню з чынам пахавання Плашчаніцы Прасвятой Багародзіцы ў Свята-Благавешчанскім мужчынскім манастыры ў вёсцы Малыя Ляды [абноўлена]

29 жніўня 2021

29 жніўня 2021 года, у пасвята Успення Прасвятой Багародзіцы, мітрапаліт Мінскі і Заслаўскі Веніямін, Патрыяршы Экзарх усяе Беларусі, адслужыў утраню з чынам Пахавання Прасвятой Багародзіцы ў Лядзенскім мужчынскім манастыры Благавешчання Прасвятой Багародзіцы.

Яго Высокапраасвяшчэнству саслужылі ігумен Лядзенскага манастыра іераманах Лаўр (Будзіч) і брація манастыра ў свяшчэнным сане.

Дыяканскі чын здзейсніў протадыякан Георгій Раслякоў. Богаслужэбныя спевы выканаў братэрскі хор абіцелі пад кіраваннем архідыякана Арэста (Ярэя).

Пасля спеву вялікага славаслоўя Патрыяршы Экзарх узначаліў хрэсны ход з плашчаніцай з выявай Успення Прасвятой Багародзіцы.

* * *

Чын пахавання — богаслужэбная асаблівасць свята Успення Божай Маці. Гэта ўспамін аб перанясенні апосталамі з Іерусаліма цела Найсвяцейшай Багародзіцы пасля яе Успення і пахавання.

Паводле Свяшчэннага Падання, пасля смерці Прачыстай Дзевы апосталы пахавалі Яе цела ў Гефсіманіі. На пахаванні прысутнічалі ўсе, акрамя апостала Фамы. На трэці дзень пасля пахавання Фама захацеў убачыць Яе труну. Труну адкрылі, але цела Багародзіцы ў ім ужо не было — толькі Яе плашчаніца.

Паводле слова Свяцейшага Патрыярха Маскоўскага і ўсяе Русі Кірыла, Яна «спадобілася, прайшоўшы праз фізічную смерць, увайсці ў Боскае Царства са сваёю плоццю, таму што ніколі і нікім не было знойдзена Яе фізічнае цела. І ў традыцыі Царквы, якая ўзыходзіць да глыбокай старажытнасці, да II-III стагоддзяў, у шанаванне Маці Божай была ўключана вялікая таямніца Яе ўзыходжання на неба з прачыстым целам» (пропаведзь на свята Успення 28 жніўня 2021 года).

Таму і набажэнства, прысвечанае гэтай падзеі, прасякнута не сумам, а хвалой Маці Божай, Якая з пераходам у Царства Нябеснае атрымала асаблівую сілу заступніцтва за тых, хто шануе Яе.

Church.by

Фотарэпартаж