Пошук

Падпісана Пагадненне аб супрацоўніцтве паміж Беларускай Праваслаўнай Царквой і Беларускай чыгункай

06 жніўня 2026

5 жніўня 2026 года мітрапаліт Мінскі і Заслаўскі Веніямін, Патрыяршы Экзарх усяе Беларусі, наведаў Упраўленне Беларускай чыгункі і сустрэўся з працоўным калектывам магістралі. Наведванне архіпастыра было прымеркавана да прафесійнага свята — Дня чыгуначніка, які адзначаўся 2 жніўня.

Адкрываючы сустрэчу, начальнік Беларускай чыгункі Валерый Вярэніч адзначыў высокую значнасць захавання духоўных і нацыянальных традыцый, якія ва ўсе часы з'яўляліся асновай стваральнай дзейнасці чыгуначнікаў. «Паважаны ўладыка, Вы благаславілі нашы намеры па стварэнні іконы-заступніцы. Вызначаны абраз, гістарычна звязаны з пакаленнямі чыгуначнікаў. Работнікаў стальной магістралі будзе аберагаць Казанскі абраз Божай Маці. Яе размяшчэнне на вакзале станцыі Мінск-Пасажырскі стане знакам павагі да гістарычных каранёў і сімвалам благаславення на добры шлях мільёнам пасажыраў».

Звяртаючыся да прысутных, Мітрапаліт Веніямін павіншаваў чыгуначнікаў з мінулым прафесійным святам і падзякаваў за служэнне людзям, якое яны здзяйсняюць. Высокапраасвяшчэннейшы ўладыка адзначыў асаблівую сувязь паміж Царквой і чыгункай. Ён распавёў, што некаторыя са святароў у свой час працавалі на магістралі і з цеплынёй успамінаюць гэты перыяд. Таксама архіпастыр нагадаў, што ў канцы XIX стагоддзя ў горадзе Мінску была пабудавана Прывакзальная (Чыгуначная) Царква ў гонар Казанскай іконы Божай Маці. Грошы на яе стварэнне збіралі самі работнікі. Такія храмы таксама існавалі ў Гомелі, Оршы і Асіповічах. «Радуе, што праз дзесяцігоддзі страчаная духоўная пераемнасць адраджаецца, аднаўляецца гэтая добрая традыцыя і ажыццяўляюцца крокі па рэалізацыі нашых новых сумесных планаў. Не выпадкова абраз Казанскай Божай Маці стаў духоўнай заступніцай Беларускай чыгункі. Багародзіца засцерагае ўсіх, хто адпраўляецца ў дарогу або вяртаецца дадому».

У дар калектыву Упраўлення Беларускай чыгункі Патрыяршы Экзарх паднёс абраз Божай Маці «Казанскі».

Важнай падзеяй сустрэчы стала цырымонія падпісання Пагаднення аб супрацоўніцтве паміж Беларускай Праваслаўнай Царквой (Беларускага Экзархату Маскоўскага Патрыярхату) і Беларускай чыгункай. Пагадненне накіравана на развіццё ўзаемадзеяння ў сферы духоўна-маральнага выхавання, дабрачыннай і сацыяльна значнай дзейнасці, умацаванне традыцыйных каштоўнасцяў у працоўных калектывах магістралі.

Затым чыгуначнікі змаглі задаць Патрыяршаму Экзарху пытанні, якія іх цікавяць, што тычацца маральных арыенціраў і ролі Царквы ў жыцці сучаснага грамадства.

На заканчэнне начальнік Беларускай чыгункі Валерый Вярэніч ад імя ўсяго калектыву падзякаваў Мітрапаліту Веніяміну за сустрэчу і ўручыў яму памятны сувенір.

Беларуская чыгунка / Church.by

Чытайце нас у мэсэнджэрах Telegram і Viber, 

сацсетках Instagram, ВКонтакте, 

Facebook і Одноклассники,

глядзіце ў YouTube і TikTok