Пошук

Настаяцель Праабражэнскага храма ў Астрашыцкім Гарадку прыняў удзел у акцыі па бязвыплатнай здачы крыві

15 чэрвеня 2018

Акцыя па бязвыплатнай здачы крыві прайшла ў Гарадскім цэнтры трансфузіялогіі УАЗ «6-я гарадская клінічная бальніца» 14 чэрвеня, перадае карэспандэнт агенцтва «Минск-Новости».

Да акцыі далучыліся прадстаўнікі адміністрацыі Партызанскага раёна сталіцы, а таксама мінскія матацыклісты.

Мотаклуб The Hooligans MC Belarus ужо ў другі раз падтрымаў акцыю. Напярэдадні Сусветнага дня донара крыві настаяцель прыхода храма Праабражэння Гасподняга ў Астрашыцкім Гарадку святар Сергій Ляшкевіч ад імя клуба заявіў пра жаданне ў чарговы раз стаць донарам. Праўда, з 14 чалавек да здачы дапусцілі толькі пяцярых. Пазней кіраўнік Гарадскога цэнтра трансфузіялогіі, намеснік галоўнага ўрача па трансфузіялогіі 6-й ГКБ Вольга Клімовіч уручыла ім падзякі і сертыфікаты на наведванне ўстановы грамадскага харчавання сталіцы.

— Матацыклісты знаходзяцца ў групе рызыкі па траўматызму, гэта значыць патэнцыяльна маюць патрэбу ў пераліванні крыві. Таму для нас гэта крок наперад, праца на апярэджанне, — тлумачыць айцец Сергій.

Для патэнцыяльных донараў крыві ў новым корпусе цэнтра, які адкрыўся ў маі бягучага года, створаны камфортныя ўмовы. Звярнуўшымся прапануюць запоўніць анкету, у якой, сярод іншага, патрабуецца паведаміць аб перанесеных захворваннях. Затым трэба здаць агульны аналіз крыві і накіроўвацца да лекара, які абследуе агульны стан арганізма: вымярае тэмпературу, ціск і праводзіць фізікальны агляд. Калі няма супрацьпаказанняў, донар адпраўляецца ў буфет за салодкім: гарачай гарбатай, печывам, гематагенам. Працэдура забору крыві доўжыцца каля 10 хвілін, яе кампанентаў — ад 35 хвілін да гадзіны.

— Супрацьпаказанняў для здачы крыві маецца нямала. Сярод іх нават недастатковая вага: донар павінен быць не менш за 55 кг. У ідэале ён павінен мець нармальную тэмпературу цела і ціск. Напярэдадні варта добранька выспацца і адпачыць, а ў дзень здачы — і паснедаць. І, вядома, важна захоўваць спакой і не хвалявацца перад самой працэдурай, — распавяла лекар-трансфузіёлаг аддзялення нарыхтоўкі крыві і яе кампанентаў Гарадскога цэнтра трансфузіялогіі Ганна Бында.

У сярэднім, як удакладніла Вольга Клімовіч, штодня кроў і яе кампаненты здаюць каля 150 чалавек. 14 чэрвеня падчас правядзення акцыі донарамі крыві сталі 30 грамадзян, плазмы — 40.

Church.by