Пошук

Адышоў да Госпада архіепіскап Арцемій (Кішчанка)

22 красавіка 2023

22 красавіка 2023 года ў 01:30 на 71-м годзе жыцця адышоў да Госпада Праасвяшчэнны архіепіскап Арцемій (Кішчанка), які з 1996 па 2021 гады ўзначальваў Гродзенскую епархію Беларускай Праваслаўнай Царквы.

Развітанне з архіепіскапам Арцеміем будзе праходзіць у Свята-Пакроўскім кафедральным саборы горада Гродна з 13:00 23 красавіка па 12:00 24 красавіка.

У панядзелак 24 красавіка ў 08:00 у Свята-Пакроўскім кафедральным саборы горада Гродна пачнецца Бажэственная літургія, пасля заканчэння якой будзе здзейснены чын адпявання.

А 12:00 труна з целам спачылага будзе перавезена ў горад Мінск на Чыжоўскія могілкі. У 15:00 будзе здзейснена заупакойная ліція, пасля заканчэння якой адбудзецца пахаванне архіепіскапа Арцемія. Паводле завяшчання спачылы будзе пахаваны побач з магіламі сваякоў.

Вечная памяць новаспачыламу архіепіскапу Арцемію! Душа яго няхай у дабры спачывае, і памяць яго з роду ў род!

 

Будучы архіепіскап, у свеце Аляксандр Анатолевіч Кішчанка, нарадзіўся 25 красавіка 1952 года ў горадзе Мінску. Па заканчэнні сярэдняй школы ў 1969 годзе паступіў у Беларускі інстытут механізацыі і электрыфікацыі сельскай гаспадаркі. Пасля службы ў радах Савецкай арміі (1975-1976) быў паслушнікам Пскова-Пячэрскага манастыра.

У 1976 годзе паступіў у Ленінградскую духоўную семінарыю.

8 кастрычніка 1978 года ў храме святога апостала і евангеліста Іаана Багаслова Ленінградскай духоўнай акадэміі Высокапраасвяшчэнным Кірылам, архіепіскапам Выбаргскім, рэктарам Ленінградскіх духоўных акадэміі і семінарыі, быў пастрыжаны ў чытальніка.

У 1979 годзе паступіў у Ленінградскую духоўную акадэмію.

7 лютага 1982 года рэзалюцыяй мітрапаліта Ленінградскага і Наўгародскага Антонія (Мельнікава) прызначаны псаломшчыкам Успенскай царквы горада Аланца Карэльскай АССР.

21 лютага 1982 года мітрапалітам Ленінградскім і Наўгародскім Антоніем рукапаложаны ў дыякана ў стане цэлібата і прызначаны на служэнне ў Успенскую царкву горада Аланца Карэльскай АССР.

28 верасня 1982 года старшынёй Вучэбнага камітэта пры свяшчэнным Сінодзе мітрапалітам Талінскім і Эстонскім Аляксіем накіраваны ў распараджэнне Высокапраасвяшчэннага Філарэта, мітрапаліта Мінскага і Беларускага, Патрыяршага Экзарха Заходняй Еўропы, для праходжання царкоўна-прыходскага служэння.

1 кастрычніка 1982 года ўказам Высокапраасвяшчэннага Філарэта, мітрапаліта Мінскага і Беларускага, Патрыяршага Экзарха Заходняй Еўропы, быў прыняты ў клір Мінска-Беларускай епархіі і прызначаны на пасаду дыякана Свята-Аляксандра-Неўскай Царквы горада Мінска.

24 сакавіка 1984 года пасвячаны ў іерэя Высокапраасвяшчэнным мітрапалітам Мінскім і Беларускім Філарэтам, Патрыяршым Экзархам Заходняй Еўропы, і прызначаны на пасаду свяшчэнніка Свята-Аляксандра-Неўскай Царквы горада Мінска.

18 красавіка 1993 года ўзведзены ў сан протаіерэя Высокапраасвяшчэнным мітрапалітам Мінскім і Слуцкім, Патрыяршым Экзархам усяе Беларусі Філарэтам.

Пастырскую працу святар сумяшчаў з выкладчыцкай дзейнасцю: чытаў курс Катыхізісу на факультэце тэалогіі Еўрапейскага гуманітарнага ўніверсітэта ў горадзе Мінску, нёс послух па арганізацыі працы нядзельнай школы пры храме, апекаваўся інтэрнатам для састарэлых і інвалідаў.

3 студзеня 1996 года Высокапраасвяшчэнным мітрапалітам Філарэтам у Свята-Успенскім Жыровіцкім манастыры пастрыжаны ў манаства з імем у гонар Арцемія, велікамучаніка Антыяхійскага.

8 студзеня 1996 года ўзведзены ў сан архімандрыта.

4 лютага 1996 года ў Свята-Духавым кафедральным саборы горада Мінска мітрапалітам Мінскім і Слуцкім, Патрыяршым Экзархам усяе Беларусі Філарэтам у саслужэнні членаў Сінода Беларускай Праваслаўнай Царквы хіратанісаны ў епіскапа Гродзенскага і Ваўкавыскага.

9 верасня 2004 года пастановай Рады Мінскай духоўнай акадэміі імя свяціцеля Кірыла Тураўскага епіскапу Арцемію была прысвоена вучоная ступень кандыдата багаслоўя за дысертацыю на тэму «Уводзіны ў праваслаўнае багаслоўе».

У 2006 годзе паступіў у Хрысціянскую тэалагічную акадэмію горада Варшавы (Польшча). Па заканчэнні курса ў 2007 годзе пастановай Рады акадэміі Уладыку Арцемію была прысвоена ступень магістра багаслоўя за дысертацыю на тэму: «Праблемы выкладання прадмета «Катэхізіс» у краінах былога Савецкага Саюза».

8 ліпеня 2012 года быў узведзены ў сан архіепіскапа.

21 лютага 2013 года ў Варшаўскай Хрысціянскай тэалагічнай акадэміі (Польшча) абараніў дысертацыю на суісканне вучонай ступені доктара тэалогіі на тэму «Гісторыя Гродзенскай праваслаўнай епархіі ў 1921-1939 гадах».

З 2002 па 2014 гады ўладыка займаў пасаду старшыні моладзевага руху Беларускай Праваслаўнай Царквы і курыраваў праваслаўны моладзевы рух у Беларусі.

З 2004 па 2014 год архіепіскап Арцемій быў дацэнтам Інстытута тэалогіі Беларускага дзяржаўнага ўніверсітэта ў горадзе Мінску, дзе выкладаў на кафедры біблеістыкі і царкоўна-практычных дысцыплін.

Рашэннем Свяшчэннага Сінода Рускай Праваслаўнай Царквы ад 9 чэрвеня 2021 года быў адпраўлены на спачын па стане здароўя.

Church.by

Чытайце нас у мэсэнджэрах Telegram і Viber, 

сацсетках Instagram, ВКонтакте, 

Facebook і Одноклассники