Патрыяршы Экзарх наведаў Калядны вечар духоўна-адукацыйнага праекта «Логас» [відэа]

22 студзеня 2021

top.jpg

20 студзеня 2021 года мітрапаліт Мінскі і Заслаўскі Веніямін, Патрыяршы Экзарх усяе Беларусі, наведаў Калядны вечар духоўна-адукацыйнага праекта «Логас» у гімназіі № 11 горада Мінска.

Праект «Логас» нарадзіўся ў выніку пагаднення аб супрацоўніцтве паміж БПЦ і Мінадукацыі Беларусі. Пачатак быў пакладзены 16 гадоў таму па благаславенню мітрапаліта Філарэта. Пляцоўкай для рэалізацыі праекта стала сталічная гімназія №11.

Ініцыятары праекта лічаць сваёй галоўнай мэтай выхаваць дзяцей духоўна і маральна сталымі асобамі. Настаўнікі гімназіі праводзяць з хлопчыкамі і дзяўчынкамі факультатыўныя заняткі па праграмах «Духоўныя асновы культуры», «Культура і рэлігія», інтэграваныя ўрокі ў рамках агульнаадукацыйных дысцыплін. Рабяты ездзяць на экскурсіі, удзельнічаюць у агульнашкольных мерапрыемствах. У якасці практыкі гімназістам выкладаюць студэнты з Інстытута тэалогіі імя св. Мяфодзія і Кірыла БДУ.

Мітрапаліт Веніямін адзначыў карысць праекта «Логас» у выхаванні падрастаючага пакалення і падкрэсліў важнасць распаўсюджвання гэтага станоўчага вопыту на іншыя навучальныя ўстановы. «Духоўна-маральны складнік у выхаванні дапамагае падняць позірк падрастаючага пакалення вышэй гарызонту жыцця, у духоўную сферу. І чэрпаць адтуль сілы, натхненне і сэнсы для будучага жыцця», — рэзюмаваў Патрыяршы Экзарх.

Падводзячы вынікі працы праекта «Логас», яго кіраўнік протаіерэй Святаслаў Рагальскі паведаміў, што за 16 гадоў прыватная адзінкавая ініцыятыва вырасла ў маштабны праект, да якога сталі падлучацца і іншыя школы. Гімназісты атрымліваюць у рамках праекта не толькі тэарэтычныя веды, але і ўдзельнічаюць у жыцці людзей, якія маюць патрэбу ў падтрымцы. Таксама рабяты і іх настаўнікі актыўна развіваюць музейную справу. Па іх ініцыятыве створаны народны музей «Вызваленне Беларусі» і «Музей маці».

Дырэктар гімназіі №11 Вольга Бойка распавяла, што рэалізацыя праекта «Логас» уплывае на якасць выхавання навучэнцаў, асабліва на фарміраванне іх духоўна-маральных якасцяў. Па яе словах, праект гуртуе і умацоўвае сем'і навучэнцаў, бо ў яго ўцягнуты не толькі дзеці, але і ўсё іх бліжэйшае асяроддзе.

У Калядным вечары таксама прынялі ўдзел кіраўнік адміністрацыі Першамайскага раёна Мінска Дзмітрый Шашок і намеснік кіраўніка адміністрацыі Першамайскага раёна Мінска Алена Асадчая.

Выхаванцы гімназіі азнаёмілі гасцей з музейнымі экспазіцыямі «Вызваленне Беларусі» і «Музей маці», а таксама падрыхтавалі святочны канцэрт.

Church.by 

Фотарэпартаж