Рус / Бел

Патрыяршы Экзарх здзейсніў чын асвячэння капліцы ў гонар свяціцеля Ціхана, Патрыярха Маскоўскага і ўсяе Русі, на тэрыторыі жаночага манастыра ў вёсцы Багушы

10 ліпеня 2021

top.jpg

10 ліпеня 2021 года мітрапаліт Мінскі і Заслаўскі Веніямін, Патрыяршы Экзарх усяе Беларусі, наведаў стаўрапігіяльны жаночы манастыр у гонар Увядзення ў храм Прасвятой Багародзіцы ў вёсцы Багушы Смаргонскага раёна Гродзенскай вобласці.

Падчас візіту архіпастыр у саслужэнні іерэя Георгія Глінскага здзейсніў чын асвячэння капліцы ў гонар свяціцеля Ціхана, Патрыярха Маскоўскага і ўсяе Русі.

У слове настаўлення пасля асвячэння капліцы ўладыка Экзарх нагадаў пра тое, якім цяжкім быў подзвіг служэння свяціцеля Ціхана ў складаныя для Царквы гады.

Затым мітрапаліт Веніямін азнаёміўся з прадстаўленай у капліцы экспазіцыяй з сабраным сёстрамі абіцелі гістарычным матэрыялам пра Першую сусветную вайну — дакументамі, фатаграфіямі і іншымі сведчаннямі, у тым ліку аб жаночым батальёне смерці Марыі Бачкаровай.

Па ўсіх загінуўшых у гады ваеннага ліхалецця была здзейснена ліція.

Завяршылася наведванне абіцелі азнаямленнем з Увядзенскім храмам манастыра.

Увядзенскі стаўрапігіяльны жаночы манастыр у вёсцы Багушы недалёка ад Смаргоні пачаў сваю гісторыю 21 год таму. У той час манахіня Мінскага Лізавецінскага манастыра Лізавета ўпершыню прыехала на хутар у вёсцы Багушы. Першапачаткова тут збіраліся пабудаваць маленькі адасоблены скіт, аднак Божы промысел быў іншым. Ужо ў 2003 годзе рашэннем Сінода Беларускай Праваслаўнай Царквы Увядзенскі скіт быў ператвораны ў стаўрапігіяльны жаночы манастыр, а ў 2005 годзе мітрапаліт Філарэт асвяціў абодва манастырскія храмы — верхні, у гонар Увядзення ў храм Прасвятой Багародзіцы, і ніжні, у гонар яе бацькоў — святых праведных Іаакіма і Ганны.

Каля манастыра захаваўся фрагмент старога магутнага, абсаджанага таполямі, гасцінца, дарогі на Смаргонь, уздоўж якой праходзіла лінія фронту Першай сусветнай вайны. Тут у кровапралітных баях загінула каля 70 тысяч воінаў. У гэтых месцах баявое хрышчэнне атрымаў і жаночы батальён Марыі Бачкаровай.

Church.by

Фотарэпартаж