Пошук

Патрыяршы Экзарх у саслужэнні сабору архіерэяў Беларускага Экзархату ўзначаліў урачыстасці, прысвечаныя памяці прападобнамучаніка Афанасія Брэсцкага

18 верасня 2022

18 верасня 2022 года, у Нядзелю 14-ю пасля Пяцідзесятніцы, дзень памяці прападобнамучаніка Афанасія, ігумена Брэсцкага, у Брэсцкай епархіі адбыліся ўрачыстасці, прысвечаныя малітвенніку і заступніку Берасцейскай зямлі.

Раніцай ад сцен кафедральнага сабора прападобнага Сімяона Стоўпніка ў горадзе Брэсце стартаваў традыцыйны хрэсны ход да месца мучаніцкай смерці святога Афанасія Брэсцкага, які ўзначаліў архіепіскап Брэсцкі і Кобрынскі Іаан з духавенствам Брэсцкай епархіі. Ля помніка святому Афанасію Брэсцкаму, размешчанага побач з кафедральным саборам, Яго Высокапраасвяшчэнства ўзнёс малітву святому Афанасію, папрасіўшы благаславення на паспяховае завяршэнне хрэснага ходу.

Па дарозе да асноўнага патоку хрэснаходцаў далучыўся хрэсны ход прыхода храма Ражджаства Хрыстова ў горадзе Брэсце.

Бажэственную літургію ў Свята-Афанасьеўскім мужчынскім манастыры Брэста – на месцы мучаніцкай смерці прападобнага (+1648) узначаліў мітрапаліт Мінскі і Заслаўскі Веніямін, Патрыяршы Экзарх усяе Беларусі.

Яго Высокапраасвяшчэнству саслужылі: архіепіскап Магілёўскі і Мсціслаўскі Сафроній; архіепіскап Брэсцкі і Кобрынскі Іаан; архіепіскап Гомельскі і Жлобінскі Сцяфан; епіскап Бабруйскі і Быхаўскі Серафім; епіскап Лідскі і Смаргонскі Парфірый; епіскап Светлагорскі Амвросій; епіскап Пінскі і Лунінецкі Георгій; епіскап Слуцкі і Салігорскі Яўсевій, адказны сакратар Упраўлення спраў Беларускай Праваслаўнай Царквы протаіерэй Андрэй Волкаў, а таксама сабор духавенства Брэсцкай епархіі.

Дыяканскі чын узначаліў клірык Свята-Духава кафедральнага сабора горада Мінска протадыякан Уладзімір Назараў.

Богаслужэбныя спевы выканаў хор духавенства Брэсцкай епархіі пад кіраваннем рэгента протаіерэя Валерыя Грыцука.

За богаслужэннем маліліся ігумення жаночага манастыра Нараджэння Прасвятой Багародзіцы на Шпітальным востраве Брэсцкай крэпасці ігумення Аляксандра (Жарын); настаяцельніца жаночага манастыра Усяміласцівага Спаса ў горадзе Кобрыне ігумення Еўфрасіння (Куракевіч).

На богаслужэнні прысутнічалі старшыня Брэсцкага гарадскога выканаўчага камітэта Аляксандр Сцяпанавіч Рагачук і іншыя афіцыйныя асобы.

На патроенай екценні былі ўзнесены прашэнні аб адзінстве Праваслаўнай Царквы, захаванні Царквы ад падзелаў і расколаў, аб спыненні распаўсюджвання каронавіруснай інфекцыі, аднаўленні міру і дабрабыце беларускага народа.

Пасля патроенай екценні ўладыка Экзарх здзейсніў малітвы да Госпада аб беларускім народзе і аб пераадоленні каронавіруснай інфекцыі.

Пропаведзь перад Прычасцем прамовіў іерэй Павел Юрчэня, клірык прыхода храма ў гонар велікамучаніка Георгія ў горадзе Брэсце.

Пасля заамвоннай малітвы архіпастыры ўзнеслі малітву і здзейснілі слаўленне прападобнамучаніку Афанасію ля яго іконы з часцінкай мошчаў.

Архіепіскап Брэсцкі і Кобрынскі Іаан, звяртаючыся са словамі прывітання да гасцей, духавенства і паломнікаў епархіяльнай урачыстасці, сардэчна падзякаваў мітрапаліту Веніяміну за архіпастырскі візіт на Брэсцкую зямлю і малітву на месцы мучаніцкай смерці святога Афанасія Брэсцкага.

З архіпастырскім словам прывітання і настаўлення да вернікаў звярнуўся мітрапаліт Мінскі і Заслаўскі Веніямін, Патрыяршы Экзарх усяе Беларусі. Уладыка Экзарх заклікаў вернікаў пераймаць подзвіг святога Афанасія ў мужнасці і стойкасці за веру Хрыстову, узрастаючы ў любові да Бога, бліжніх і роднай зямлі.

Па завяршэнні святочнай трапезы было зроблена агульнае памятнае фота архіпастыраў і духавенства, пасля чаго адбылася цырымонія ўскладання кветак да манумента прападобнамучаніка Афанасія Брэсцкага ля кафедральнага сабора прападобнамучаніка Сімяона Стоўпніка ў горадзе Брэсце.

Брэсцкая епархія/Church.by

Фотарэпартаж

Фотарэпартаж