Адбылася сустрэча Патрыяршага Экзарха і рэктара БДУ
17 лістапада 2020
Супрацоўніцтва Беларускага дзяржаўнага ўніверсітэта і Беларускай Праваслаўнай Царквы стала цэнтральнай тэмай сустрэчы мітрапаліта Мінскага і Заслаўскага Веньяміна, Патрыяршага Экзарха ўсяе Беларусі, рэктара Беларускага дзяржаўнага ўніверсітэта Андрэя Дзмітрыевіча Караля.
Сустрэча адбылася 17 лістапада 2020 года ў Белдзяржуніверсітэце. Яе ўдзельнікамі таксама сталі прарэктар па выхаваўчай рабоце і сацыяльных пытаннях універсітэта Іван Іванавіч Янушэвіч, першы прарэктар Інстытута тэалогіі імя святых Мяфодзія і Кірыла БДУ протаіерэй Сергій Гардун, в. а. старшыні Сінадальнага аддзела рэлігійнай адукацыі і катэхізацыі Беларускай Праваслаўнай Царквы Мікалай Іванавіч Ліс.
Бакі дэталёва разгледзелі перспектывы ўзаемадзеяння ў галіне адукацыі і стварэння ўмоў для духоўна-маральнага фарміравання асобы. Прагучалі ініцыятывы па сумесным правядзенні адукацыйных, навуковых, творчых і валанцёрскіх мерапрыемстваў. Гаворка ішла таксама аб абмене выкладчыкамі БДУ і духоўных навучальных устаноў для чытання лекцый, правядзення семінарскіх заняткаў. Была разгледжана магчымасць арганізацыі навуковых канферэнцый і круглых сталоў, прыцягнення валанцёраў БДУ да аднаўлення храмаў і святынь Беларусі і сумеснага ўдзелу ў дабрачынных мерапрыемствах.
Вынікам сустрэчы стала дамоўленасць аб падпісанні ў бліжэйшы час пагаднення аб супрацоўніцтве паміж Беларускай Праваслаўнай Царквой і Беларускім дзяржаўным універсітэтам, падрыхтаванага на аснове разгледжаных прапаноў.
Афіцыйны партал Беларускай праваслаўнай Царквы
© Беларуская Праваслаўная Царква 2019
Пры перадруку матэрыялаў спасылка на church.by абавязковая.
Калі вы хочаце задаць пытанне ці выказаць свае меркаванне з нагоды сайта або артыкулаў,
напішыце нам, скарыстаўшыся паштовай формай.
