Пошук

Пад старшынствам мітрапаліта Веніяміна адбылося пасяджэнне Епархіяльнага савета Слуцкай епархіі

15 ліпеня 2021

14 ліпеня 2021 года ў Слуцкім епархіяльным упраўленні пад старшынствам мітрапаліта Мінскага і Заслаўскага Веніяміна, Патрыяршага Экзарха ўсяе Беларусі, кіраўніка Слуцкай епархіі, адбылося пашыранае пасяджэнне Епархіяльнага савета.

Перад пачаткам працы Епархіяльнага савета была абвешчаная «Вечная памяць» новаспачыламу найстарэйшаму клірыку Слуцкай епархіі протаіерэю Паўлу Корзуну, які памёр 23 чэрвеня.

Члены Савета азнаёміліся з хронікай епархіяльнага жыцця за вясну і пачатак лета.

Прымаючы пад увагу працу епіскапа Гродзенскага і Ваўкавыскага Антонія, які кіраваў Слуцкай епархіяй з 23 кастрычніка 2014 па 9 чэрвеня 2021 года, члены Савета хадайнічалі перад Патрыяршым Экзархам аб узнагароджанні ўладыкі Антонія медалём «За заслугі перад Слуцкай епархіяй» I ступені.

Савет выказаў падзяку Свяцейшаму Патрыярху Маскоўскаму і ўсяе Русі Кірылу і мітрапаліту Мінскаму і Заслаўскаму Веніяміну за высокія ўзнагароды, уручаныя медыцынскім работнікам, асабліва папрацаваўшым у барацьбе з каронавіруснай інфекцыяй. Сёлета паводле прадстаўлення благачынных Слуцкай епархіі царкоўных узнагарод былі ўдастоены 29 медыкаў.

Сакратар Савета протаіерэй Мікалай Лабынько паведаміў аб заканчэнні студэнтамі са Слуцкай епархіі поўнага курса навучання ў духоўных школах Беларускай Праваслаўнай Царквы ў 2020/2021 навучальным годзе. Такіх выпускнікоў трое: іерэй Дзімітрый Верамейчык і іерэй Аляксандр Понтус скончылі Мінскую духоўную семінарыю з прысваеннем ступені бакалаўра багаслоўя, іерэй Сергій Варашкевіч скончыў Віцебскую духоўную семінарыю.

Савет зацвердзіў рашэнне правесці з 16 па 18 ліпеня на базе прыходу храма Святой Жыццепачатнай Троіцы аграгарадка Салтанаўшчына Нясвіжскага раёна VI агульнаепархіяльны злёт Слуцкай епархіі «Соль зямлі».

З 15 па 25 жніўня, напярэдадні новага навучальнага года, у межах епархіі адбудзецца дабрачынная акцыя «Мы разам!» Мэта гэтай традыцыйнай акцыі — аказанне падтрымкі малазабяспечаным і шматдзетным сем'ям, дзецям з няпоўных і бездабрабытных сем'яў, дзецям — падапечным сацыяльных устаноў, дзецям з інваліднасцю. Каб дапамагчы блізкім, жыхары гарадоў і сельскіх населеных пунктаў прыносяць канцылярскія тавары, сродкі асабістай гігіены, прадукты, цацкі ў прызначаныя месцы збору. Усе сабраныя тавары сартуюцца і пакуюцца ў падарункавыя наборы, якія затым раздаюць дзецям.

У завяршэнне Савет разгледзеў кадравую частку парадку дня. Протаіерэй Мікалай Лабынько і протаіерэй Рыгор Бяляцкі згодна з пададзенымі імі прашэннямі былі палічаныя за штат Слуцкай епархіі з правам пераходу ў Гродзенскую епархію. На пасаду сакратара Слуцкага епархіяльнага ўпраўлення быў прызначаны протаіерэй Ігар Штэпа. Протаіерэй Сергій Чарны быў прызначаны настаяцелем кафедральнага сабора Ражджаства Хрыстова ў горадзе Салігорску, памочнікам благачыннага Салігорскай царкоўнай акругі; протаіерэй Генадзь Пашкевіч — настаяцелем прыхода храма Пакрова Прасвятой Багародзіцы ў вёсцы Чыжэвічы Салігорскага раёна; іерэй Іаан Уханаў — настаяцелем прыхода храма Узнясення Гасподняга ў горадзе Капылі, благачынным Капыльскай царкоўнай акругі; іерэй Андрэй Еўшэль — клірыкам прыхода храма Узнясення Гасподняга ў горадзе Нясвіжы, памочнікам благачыннага Нясвіжскай царкоўнай акругі; іерэй Аляксандр Дзярачыц — настаяцелем прыхода храма Казанскай іконы Божай Маці ў горадзе Любані, памочнікам благачыннага Любанскай царкоўнай акругі; іерэй Мікалай Дзярачыц — настаяцелем прыхода храма прападобнай Еўфрасінні Полацкай аграгарадка Сосны і прыхода храма свяціцеля Мікалая Цудатворца аграгарадка Малыя Гарадзяцічы (абодва ў Любанскім раёне). Усім святарам, якія атрымалі новыя прызначэнні, Савет выказаў падзяку за працу ў славу Царквы Хрыстовай.

Слуцкая епархія/Church.by