Пошук

Студэнты БДМУ папрасілі ў Бога дапамогі ў вучобе

02 верасня 2017

1 верасня 2017 года ў дамавым храме ў гонар іконы Божай Маці «Скорапаслушніца», які знаходзіцца ў інтэрнаце № 10 Беларускага дзяржаўнага медыцынскага ўніверсітэта, быў здзейснены малебен перад пачаткам новага навучальнага года.

Прасіць дапамогі ў Бога ў нялёгкай справе асваення навук стала ўжо добрай традыцыяй БДМУ. Малітвы былі ўзнесены не толькі за студэнтаў, але і за іх выкладчыкаў і выхавальнікаў, якіх чакае карпатлівая праца.

Здзейсніў малебен клірык Елісавецінскага жаночага манастыра сталіцы іерэй Радыён Альховік. Як паведамілі ў БДМУ, богаслужэнне наведалі прарэктар па выхаваўчай рабоце БДМУ Павел Маркауцан і студэнты ВНУ.

Айцец Радыён нагадаў усім прысутным аб тым, што важныя не толькі веды самі па сабе, але і іх маральная аснова.

У канцы малебна свяшчэннік акрапіў усіх святой вадой і пажадаў, каб новы навучальны год прайшоў для навучальнікаў і навучэнцаў паспяхова.

Church.by