Пошук

Свяцейшы Патрыярх Кірыл узначаліў стотысячны хрэсны ход ад Храма на Крыві ў Екацярынбургу да манастыра на Ганінай Яме

17 ліпеня 2018

У ноч з 16 на 17 ліпеня 2018 года, у сотую гадавіну расстрэлу Царскай сям'і, Свяцейшы Патрыярх Маскоўскі і ўсяе Русі Кірыл здзейсніў Бажэственную літургію на плошчы перад узведзеным на месцы расстрэлу Храмам-помнікам на Крыві ў гонар Усіх святых, у зямлі Расійскай праслаўленых, у Екацярынбургу.

Па завяршэнні Літургіі Свяцейшы Патрыярх узначаліў традыцыйны Царскі хрэсны ход ад месца мучаніцкай смерці святых Царскіх страстацерпцаў і іх верных слуг да манастыра святых Царскіх страстацерпцаў ва ўрочышчы Ганіна Яма (адлегласць 21 км). У шэсці ўдзельнічалі многія архіерэі, саслужыўшыя Яго Свяцейшасці за Літургіяй. Усяго, паводле ацэнак праваахоўных органаў, у хрэсным ходзе прынялі ўдзел каля 100 тысяч чалавек.

Маршрут хрэснага ходу: вул Царская — вул. Талмачова — пр. Леніна — вул. Тацішчава — вул. Бебеля — вул. Тэхнічная — вул Рашоцкая — Чыгуначны лесапарк — пасёлак Шувакіш — урочышча Ганіна Яма.

Па традыцыі шэсце здзяйснялася з харугвамі і абразамі, у тым ліку з двухмятровым абразом імператара Мікалая II, створаным у 2017 годзе для храма ў гонар іконы Божай Маці «Дзяржаўная» на Ганінай Яме. Вага іконы з кивотам — каля 150 кг. Паколькі абраз вельмі цяжкі, для яе перамяшчэння былі выраблены спецыяльныя насілкі на колах.

У арганізацыі работы намётавых гарадкоў у Екацярынбургу і на Ганінай Яме, начнога богаслужэння і хрэснага ходу прынялі ўдзел валанцёры Царскіх дзён. Сярод валанцёраў — прадстаўнікі праваслаўных моладзевых аб'яднанняў Екацярынбургскай мітраполіі і іншых епархій Рускай Праваслаўнай Царквы. Таксама ў арганізацыі Царскіх дзён удзельнічалі прадстаўнікі свецкіх арганізацый — МНС, Саюза ратавальнікаў, Саюза валанцёраў Расіі, Свярдлоўскага абласнога медыцынскага каледжа і інш.

Хрэсны ход таксама суправаджалі 25 мабільных груп Праваслаўнай службы міласэрнасці, якія складаюцца з духавенства, прадстаўнікоў Успенскага праваслаўнага брацтва Екацярынбурга, сясцёр міласэрнасці, добраахвотнікаў. Яны аказвалі дапамогу тым людзям, якія па немачы не змаглі прайсці ўвесь хрэсны шлях.

Ля агароджы манастыра на Ганінай Яме былі арганізаваны палявыя кухні і ўстаноўлены палаткі для адпачынку паломнікаў.

Свяцейшы Патрыярх Кірыл прайшоў увесь маршрут хрэснага ходу. Раніцай 17 ліпеня хрэсны ход на чале з Прадстаяцелем Рускай Праваслаўнай Царквы прыбыў да манастыра святых Царскіх страстацерпцаў на Ганінай Яме. Ля абіцелі, перад паклонным крыжам каля шахты № 7, Свяцейшы ўладыка здзейсніў малебен святым Царскім страстацерпцам.

Затым Свяцейшы Патрыярх Кірыл звярнуўся да вернікаў з Першасвяціцельскім словам, у якім, у прыватнасці, сказаў:

«...Узносячы малітву святым угоднікам Божым, мы просім іх быць заступнікамі перад Богам ... каб Гасподзь ахаваў Айчыну нашу і народ, і Царкву ад усякай смуты, ад падзелаў, расколаў, ад усякай чалавечай няпраўды, каб захоўваць нам праўду веры і пабожнасць нашага народа».

Начная Бажэственная літургія і хрэсны ход на Ганіну Яму сталі апошнімі мерапрыемствамі ў праграме Першасвяціцельскага візіту Свяцейшага Патрыярха Кірыла ў Екацярынбургскую мітраполію, прымеркаванага да 100-годдзя расстрэлу Царскай сям'і.

***

На рубяжы XIX-XX стагоддзяў ва ўрочышчы Ганіна Яма здабывалі жалезную руду. Па наяўных звестках, «ганямі» называлі рудакопаў. Пасля пакінутыя імі шахты сталі называцца ганінымі ямамі. Іх было каля 30.

У 1991 годзе па благаславенню архіепіскапа Свярдлоўскага і Курганскага Мелхіседэка на Ганінай Яме быў усталяваны першы паклонны крыж.

17 ліпеня 1992 года на месца знішчэння астанкаў Царскай сям'і прыбыў першы Царскі хрэсны ход. Так зараджалася традыцыя Царскіх дзён — дзён памяці Царскіх пакутнікаў. Калі першапачаткова ў такіх хрэсных хадах удзельнічала каля дзясятка чалавек, то сёння — каля ста тысяч.

У ноч на 17 ліпеня 1995 года ля крыжа над Ганінай Ямай упершыню была здзейснена Бажэственная літургія. Пасля гэтага начныя Літургіі ў трагічны дзень памяці сталі здзяйсняцца тут кожны год.

На Юбілейным Архіерэйскім Саборы, які праходзіў у Маскве 14 жніўня 2000 года, Царская сям'я была праслаўлена у ліку страстацерпцаў.

23 верасня 2000 года Свяцейшы Патрыярх Аляксій II па прыездзе ва ўрочышча Ганіна Яма благаславіў на месцы, куды былі прывезены пасля расстрэлу астанкі членаў Царскай сям'і, будаўніцтва манастыра святых Царскіх страстацерпцаў. Манастыр быў заснаваны рашэннем Свяшчэннага Сінода 28 снежня 2000 года. Будаўніком абіцелі стаў схіігумен Сергій (Раманаў). За тры гады, да верасня 2003 года, тут было пабудавана і асвячона 7 драўляных храмаў (па колькасці членаў Царскай сям'і) у гонар: Царскіх страстацерпцаў, прападобнага Серафіма Сароўскага, прападобнага Сергія Раданежскага, іконы Божай Маці «Іверская», іконы Божай Маці «Дзержаўная», свяціцеля Мікалая, Мір Лікійскіх Цудатворца, праведнага Іава Шматпакутнага.

Цэнтр манастыра — шахта № 7, дзе здзяйснялася аганьбаванне над парэшткамі членаў Царскай сям'і, і якая, па сутнасці, сама стала антымінсам. Так яе назваў у сваёй гаміліі пасля богаслужэння Свяцейшы Патрыярх Аляксій II: «Уся прастора Ганінай Ямы — гэта жывы антымінс, пранізаны часцінкамі спаленых святых мошчаў».

Фота: сайт Екацярынбургскай епархіі 

Прэс-служба Патрыярха Маскоўскага і ўсяе Русі / Church.by