Пошук

У Белдзяржфілармоніі адбыўся Калядны вечар Хрысціянскага адукацыйнага цэнтра

23 студзеня 2026

22 студзеня 2026 года ў вялікай зале Беларускай дзяржаўнай філармоніі адбыўся Калядны вечар Міжнароднага грамадскага аб'яднання «Хрысціянскі адукацыйны цэнтр імя святых Мяфодзія і Кірыла».

Калядны вечар узначаліў Яго Высокапраасвяшчэнства Мітрапаліт Мінскі і Заслаўскі Веніямін, Патрыяршы Экзарх усяе Беларусі. Прывітальны адрас удзельнікам вечара накіравала Старшыня Савета Рэспублікі Нацыянальнага сходу Рэспублікі Беларусь Наталля Качанава. Ва ўрачыстым сходзе прынялі ўдзел Упаўнаважаны па справах рэлігій і нацыянальнасцяў Аляксандр Румак, кіраўнікі канфесій, прадстаўнікі органаў дзяржаўнага кіравання Рэспублікі Беларусь, дыпламатычнага корпуса, рэктары ВНУ і кіраўнікі грамадскіх аб'яднанняў і ўстаноў адукацыі горада Мінска.

У ходзе мерапрыемства была прадстаўлена інфармацыя аб дзейнасці Міжнароднага грамадскага аб'яднання «Хрысціянскі адукацыйны цэнтр імя святых Мяфодзія і Кірыла». Арганізацыя вядзе сваю гісторыю з 10 студзеня 1997 года, яе заснавальнікам і першым старшынёй да 2014 года з'яўляўся Высокапраасвяшчэннейшы Мітрапаліт Філарэт, першы Патрыяршы Экзарх усяе Беларусі.

Сярод мэтаў і кірункаў дзейнасці цэнтра пазначаны сумесная рэалізацыя царкоўна-дзяржаўных, эканамічных, сацыяльных, культурных і рэлігійных ініцыятыў у Рэспубліцы Беларусь і за яе межамі, каардынацыя ўзаемадзеяння Беларускай Праваслаўнай Царквы з дзяржаўнымі, недзяржаўнымі і грамадскімі структурамі, садзейнічанне міжрэлігійнаму і міжканфесійнаму дыялогу на пазіцыях узаемнай павагі і добрасуседства. У ліку членаў аб'яднання — святары і міране, прадстаўнікі культурнай і навуковай грамадскасці, кіраўнікі і супрацоўнікі ўстаноў адукацыі і аховы здароўя, вытворчых прадпрыемстваў.

У рамках Каляднага вечара адбылася прэзентацыя календара «Фарбы гавораць», выдадзенага сумесна з грамадскім аб'яднаннем «Беларускі фонд міру» ў рамках Міжнароднага гуманітарна-дабрачыннага праекта «Моцныя духам». У календары прадстаўлены работы дзяцей-выхаванцаў дзевяці сацыяльных пансіянатаў Рэспублікі Беларусь, выкананыя ў стылі сімвалічнага абстракцыянізму пад кіраўніцтвам мастака Сяргея Ладошына.

Традыцыйнай часткай мерапрыемства стала ўручэнне дзвюх Калядных прэмій Хрысціянскага адукацыйнага цэнтра «Хрысціянскія традыцыі ў культуры і адукацыі» ў намінацыі «За асаблівы ўклад у справу хрысціянскай асветы і адукацыі, дбайнае служэнне Царкве Хрыстовай у справе выхавання моладзі, уклад у развіццё тэалагічнай адукацыі». З 1999 года дадзеныя прэміі ўручаліся 26 разоў, іх былі ўдастоены 56 чалавек.

У 2026 годзе прэміі былі ўручаны протаіерэю Іаану Задарожыну, дырэктару Мінскага духоўнага вучылішча, старшыні Сінадальнага аддзела Беларускага Экзархату па культуры і царкоўным мастацтве, і Тамары Куніцкай, дырэктару дзіцячай музычнай школы мастацтваў № 10 імя Яўгена Глебава горада Мінска, заслужанаму дзеячу культуры Рэспублікі Беларусь.

Завяршыўся Калядны вечар канцэртнай праграмай «Музычнае прынашэнне», арганізаванай сумесна з Беларускім саюзам музычных дзеячаў. У канцэрце прынялі ўдзел Заслужаны калектыў Рэспублікі Беларусь — Дзяржаўная акадэмічная харавая капэла Рэспублікі Беларусь імя Рыгора Шырмы пад кіраўніцтвам Вольгі Янум, Мітрапалічы хор Мінскага Свята-Духава кафедральнага сабора пад кіраваннем Віталя Сабалеўскага, дзіцяча-юнацкі хор «Сустрэча» нядзельнай школы храма ў гонар іконы Божай Маці «Усіх тужлівых Радасць» пад кіраваннем Людмілы Літошык, а таксама квартэт саксафаністаў SAXAS (мастацкі кіраўнік — Павел Казак).

Аўтарам праекта з'яўляецца старшыня Міжнароднага грамадскага аб'яднання «Хрысціянскі адукацыйны цэнтр імя святых Мяфодзія і Кірыла» іерэй Святаслаў Рагальскі.

Church.by

Чытайце нас у мэсэнджэрах Telegram і Viber, 

сацсетках Instagram, ВКонтакте, 

Facebook і Одноклассники,

глядзіце ў YouTube і TikTok

Фотарэпартаж