Пошук

У цэнтры экалагічных рашэнняў распрацавалі інфармацыйны стэнд, які адлюстроўвае праваслаўны погляд на экалогію

10 верасня 2020

Па благаславенню мітрапаліта Мінскага і Заслаўскага Веніяміна, Патрыяршага Экзарха ўсяе Беларусі, на прыходзе ў гонар свяціцеля Мікалая Японскага (Мінск) 6 верасня прайшоў малебен, прысвечаны Дню малітвы аб Божым стварэнні, які традыцыйна адзначаецца Праваслаўнай Царквой у першую нядзелю верасня.

Пасля богаслужэння настаяцель храма протаіерэй Павел Сярдзюк звярнуў увагу вернікаў на тое, што «сёння па благаславенню Царквы здзяйсняецца малітва аб Божым стварэнні. Мы чуем словы апостала Паўла пра тое, што ўвесь акаляючы нас свет пакутуе, чакаючы адкрыцця сыноў чалавечых. Свет створаны для чалавека і ўручаны чалавеку, і мы ўсе з вамі зараз бачым гэтую меру неўладкаванасці свету, неўладкаванасці чалавека, неўладкаванасці грамадства.

Стварэнне стогне, увесь навакольны свет чакае рашэнняў чалавечых. У гэтым свеце дзейнічаюць людзі, і мы сёння стаім перад Госпадам у Яго Царкве і зноў і зноў закліканы ўспомніць пра той абавязак, які быў уручаны Адаму, — захоўваць і апрацоўваць Эдэм — наш свет».

Адбылася прэзентацыя новага інфармацыйнага стэнда, падрыхтаванага Цэнтрам экалагічных рашэнняў (ЦЭР) і прысвечанага тэме ўзаемаадносін чалавека і навакольнага свету як cтварэння Божага.

На прэзентацыі стэнда прысутнічаў кіраўнік рабочай групы па рэалізацыі Праграмы супрацоўніцтва паміж Беларускай Праваслаўнай Царквой і Міністэрствам прыродных рэсурсаў і аховы навакольнага асяроддзя Рэспублікі Беларусь, дырэктар Цэнтра экалагічных рашэнняў Яўген Лабанаў. Па словах Яўгена «Прыход свяціцеля Мікалая Японскага з'яўляецца прыкладам прыхода, які задумваецца пра Божае стварэнне і які бачыць сваё хрысціянскае служэнне ў клопаце аб навакольным свеце. Вельмі многія людзі задумваюцца аб навакольным асяроддзі, аб экалогіі, і ўзнікае пытанне: што ад мяне залежыць, бо я не ўладальнік завода, я жыву звычайным жыццём, і экалагічныя праблемы, пра якія я чую, — змена клімату, памяншэнне колькасці відаў жывёл — якое дачыненне да гэтага маю я? І вось тут мы як хрысціяне павінны разумець, што на самай справе наша жыццё складаецца з вялікай колькасці маленькіх учынкаў, калі мы выбіраем, што мы купляем у краме, як ставімся да смецця, ці стараемся паменшыць яго колькасць, ці прыбіраем за сабой пасля пікніка на прыродзе. Ад нас не чакаюць нейкіх вялікіх здзяйсненняў, Але Гасподзь чакае ад нас, каб мы як хрысціяне актыўна рабілі тое, што ў нашых сёлах і магчымасцях, і зрабілі мы гэта ці не зрабілі, — гэта тое, пра што трэба памятаць і дзейнічаць паводле сумлення».

Прэзентацыю стэнда правёў спецыяліст кірунку «Царква і ахова навакольнага асяроддзя» ЦЭР Сяргей Юшкевіч. У найбліжэйшы час стэнд будзе ўсталяваны на прыхрамавай тэрыторыі.

Пасля прэзентацыі ўсе жадаючыя былі запрошаныя да агульнай трапезы.

 Tvorenie.by / Church.by