Пошук

У дзень памяці свяшчэннамучаніка Парфірыя Рубановіча Патрыяршы Экзарх здзейсніў Літургію ў кафедральным саборы Праабражэння Гасподняга горада Заслаўя

28 кастрычніка 2020

28 кастрычніка 2020 года, у дзень памяці свяшчэннамучаніка Парфірыя Рубановіча, прасвітара Заслаўскага, мітрапаліт Мінскі і Заслаўскі Веніямін, Патрыяршы Экзарх усяе Беларусі, здзейсніў Бажэственную літургію ў кафедральным саборы Праабражэння Гасподняга горада Заслаўя.

Сабор у Заслаўі быў пабудаваны ў 1570-х гадах. Іерэй Парфірый Рубановіч, будучы свяшчэннамучанік, з'яўляўся настаяцелем гэтага храма з 1914 года аж да закрыцця царквы багаборчымі ўладамі ў 1935 годзе. У 1990 годзе, 30 гадоў таму, храм быў зноў адкрыты для богаслужэнняў, тут была заснавана абшчына і зацеплілася прыходскае жыццё.

За Літургіяй Патрыяршаму Экзарху саслужылі: настаяцель сабора, благачынны 2-й Мінскай раённай акругі протаіерэй Мікалай Мазгоў і клірык сабора іерэй Вячаслаў Шафарэнка.

Богаслужэбныя спевы выканаў саборны хор пад кіраўніцтвам Ганны Міхлюк.

На Літургіі прысутнічалі намесніца старшыні Менскага раённага выканаўчага камітэта Ірына Ціханко і старшыня Заслаўскага гарадскога выканаўчага камітэта Святлана Карташова.

За богаслужэннем былі ўзнесены асаблівыя малітоўныя прашэнні аб збаўленні ад шкоднай пошасці і дараванне міру беларускаму народу.

Пропаведзь пасля запрычаснага сціха прамовіў протаіерэй Мікалай Мазгоў.

Пасля заамвоннай малітвы было здзейснена слаўленне свяшчэннамучаніку Парфірыю Рубановічу.

Зважаючы на працу ў славу Царквы Хрыстовай і ў сувязі з 30-годдзем адраджэння парафіі мітрапаліт Веніямін узнагародзіў протаіерэя Мікалая Мазгова ордэнам свяціцеля Кірыла Тураўскага I ступені.

У працяг дня ўладыка Экзарх узначаліў адкрыццё выставы, прысвечанай старажытнаму храму Праабражэння Гасподняга. Экспазіцыя размешчана ў Заслаўскай дзіцячай школе мастацтваў. 

Church.by

Фотарэпартаж