Пошук

У калінкавіцкай гімназіі адкрылася выстава «Чалавек і стварэнне»

06 кастрычніка 2020

Супрацоўнікі Цэнтра экалагічных рашэнняў і напрамку «Царква і ахова навакольнага асяроддзя» наведалі Калінкавіцкі раён Гомельскай вобласці, які пасля аварыі на ЧАЭС увайшоў у лік раёнаў, забруджаных радыяцыяй.

У сценах Юравіцкага манастыра Нараджэння Найсвяцейшай Багародзіцы адбылася сустрэча эколагаў са старшынёй аддзела рэлігійнай адукацыі і катэхізацыі Тураўскай епархіі, намеснікам манастыра ігуменам Аўксенціем (Абражэем). Ігумен Аўксенцій падтрымлівае тое, што робяць Цэнтр экалагічных рашэнняў і кірунак «Царква і ахова навакольнага асяроддзя» ў галіне экалагічнай адукацыі і выхавання, і гатовы да сумеснай працы.

У першую чаргу ўдзельнікі сустрэчы абмеркавалі магчымасці асветніцкай працы з агульнаадукацыйнымі школамі, правядзення на іх базе розных мерапрыемстваў: выстаў, гутарак, экскурсій, даследчай працы. Закраналася пытанне памяншэння пластыка і пластыкавай упакоўкі на манастырскай тэрыторыі. Абмяркоўваліся перспектывы правядзення экалагічных адукацыйных семінараў на базе абіцелі, дзіцячых царкоўных летніх лагераў.

У той жа дзень айцец Аўксенцій арганізаваў сустрэчу з кіраўніцтвам і вучнямі гімназіі горада Калінкавічы, падчас якой адбылася прэзентацыя выставы «Чалавек і стварэнне». Выстава застанецца працаваць у гімназіі да канца года.

Арганізацыя экспедыцыі стала магчымай пры падтрымцы кааліцыі «Чыстая Балтыка» за кошт сродкаў Шведскага агенцтва па міжнародным супрацоўніцтве (Sida).

Tvorenie.by / Church.by