Пошук

У Лядзенскім манастыры адбыліся ўрачыстасці з нагоды 25-годдзя адраджэння абіцелі

12 жніўня 2019

11 жніўня, у Нядзелю 8-ю пасля Пяцідзесятніцы, архіепіскап Магілёўскі і Мсціслаўскі Сафроній, епіскап Барысаўскі і Мар'інагорскі Веніямін, епіскап Лідскі і Смаргонскі Парфірый здзейснілі Бажэственную літургію ў мужчынскім манастыры ў гонар Благавешчання Прасвятой Багародзіцы ў вёсцы Малыя Ляды Смалявіцкага раёна.

Архіпастырам саслужылі: ігумен мужчынскага манастыра ў гонар Благавешчання Прасвятой Багародзіцы ў вёсцы Малыя Ляды іераманах Лаўр (Будзіч); ігумен Засіма-Саваціеўскага мужчынскага манастыра вёскі Вялікая Кракотка іераманах Міхей (Бараноўскі); начальнік скіта Святога Прадцечы і Хрысціцеля Гасподняга Іаана ігумен Патапій (Пронін); браты абіцелі ў свяшчэнным сане; святары Беларускага Экзархату.

Дыяканскі чын узначаліў клірык Трохсвяціцельскага кафедральнага сабора горада Магілёва протадыякан Пётр Жук.

Песнапенні Літургіі выканаў брацкі хор Благавешчанскага манастыра.

На богаслужэнні маліліся ігумення жаночага манастыра ў гонар святога апостала і евангеліста Іаана Багаслова вёскі Дамашаны Смалявіцкага раёна Саламія (Аўчыннікава) з сёстрамі манастыра; выконваючая абавязкі ігуменні жаночага манастыра ў гонар святой блажэннай Ксеніі Пецярбургскай манахіня Сафія (Фёдарава) з сёстрамі манастыра.

На богаслужэнні прысутнічалі: начальнік галоўнага ўпраўлення ідэалагічнай работы, культуры і па справах моладзі Мінскага аблвыканкама Таццяна Мікалаеўна Хмель, намеснік старшыні Смалявіцкага выканкама па сацыяльнай сферы Ігар Ільіч Кузняцоў, старшыня Смалявіцкага раённага Савета дэпутатаў Марына Міхайлаўна Клюева, прадстаўнікі прадпрыемстваў і арганізацый Рэспублікі Беларусь.

Па заканчэнні Літургіі епіскап Веніямін перадаў прысутным на богаслужэнні благаславенне і віншаванне ад мітрапаліта Філарэта, Ганаровага Патрыяршага Экзарха ўсяе Беларусі.

Старшыня Сінадальнага аддзела па справах манастыроў і манаству Беларускай Праваслаўнай Царквы епіскап Лідскі і Смаргонскі Парфірый зачытаў віншавальны адрас ад мітрапаліта Мінскага і Заслаўскага Паўла, Патрыяршага Экзарха ўсяе Беларусі. У тэксце адраса, у прыватнасці, гаворыцца:

«Прыемна, што цяпер з ласкі Божай і па малітвах яго Нябеснай Заступніцы манастыр адраджаецца і ўмацоўваецца малітоўным подзвігам яе насельнікамі і набожнымі прыхаджанамі і паломнікамі. Брація манастыра, гарманічна спалучаючы малітву і богаслужэнне, послух і працу, імкнуцца змяніць свой унутраны свет і падаюць добры прыклад паломнікам і жыхарам навакольных паселішчаў».

Епіскап Парфірый падзякаваў усім за магчымасць сумеснай малітвы ў дзень урачыстасці абіцелі і адзначыў, што заўсёды прыемна бачыць шматлікіх паломнікаў і багамольцаў, якія запаўняюць храм, а таксама падарыў манастыру абраз прападобнай Марыі Егіпецкай.

За дбанне па аднаўленню абіцелі архіепіскап Сафроній быў удастоены царкоўнай узнагароды Барысаўскай епархіі — медаля іконы Божай Маці «Мар'інагорская» 1-й ступені.

Затым уладыка Сафроній звярнуўся да прысутных са словам настаўлення, у якім падзякаваў ігумену Лядзенскай абіцелі іераманаху Лаўру і браціі за запрашэнне, распавёў пра цяжкасці аднаўлення абіцелі і цудоўную дапамогу ад Бога і Прасвятой Багародзіцы.

У памяць аб сумеснай малітве і ў гонар 25-годдзя адраджэння Лядзенскага мужчынскага манастыра ў гонар Благавешчання Прасвятой Багародзіцы епіскап Веніямін паднёс архіепіскапу Сафронію карціну з выглядам абіцелі, а ігумен Лаўр — абраз Божай Маці «Спатолі мае журботы».

Віншавальны адрас ад старшыні Мінскага абласнога выканаўчага камітэта Анатоля Міхайлавіча Ісачанкі зачытала Таццяна Мікалаеўна Хмель.

Старшыня Смалявіцкага раённага Савета дэпутатаў Марына Міхайлаўна Клюева ад імя Савета дэпутатаў і выканаўчага камітэта раёна павіншавала абіцель з 25-годдзем адраджэння і выказала ад імя раённай улады імкненне і ў далейшым аказваць усебаковую дапамогу ў адраджэнні святога месца.

У завяршэнне епіскап Веніямін удастоіў епархіяльных узнагарод асабліва папрацаваўшых у справе аднаўлення абіцелі і ў гонар 25-годдзя яе адраджэння.

Барысаўская епархія / Church.by