Пошук

У Мінскай духоўнай акадэміі прайшлі папярэднія абароны магістарскіх дысертацый

11 чэрвеня 2020

25 мая, 4 і 10 чэрвеня ў Мінскай духоўнай акадэміі прайшлі папярэднія абароны магістарскіх дысертацый.

Выпускныя кваліфікацыйныя работы студэнтаў вочнага і завочнага аддзяленняў былі абмеркаваны ў трох профільных кафедральных камісіях, працу якіх узначалілі: загадчык кафедры біблеістыкі і багаслоўя прафесар архімандрыт Сергій (Акімаў), загадчык кафедры царкоўнай гісторыі і царкоўна-практычных дысцыплін дацэнт Аляксандр Валер'евіч Слесараў, загадчык кафедры апалагетыкі дацэнт Уладзімір Аляксандравіч Марціновіч. Прадабарона праходзіла ў анлайн-фармаце.

Па выніках абмеркавання да абароны было дапушчана 5 магістарскіх дысертацый па спецыялізацыі «Біблеістыка», 14 магістарскіх дысертацый па спецыялізацыі «Царкоўная гісторыя і царкоўна-практычныя дысцыпліны» (4 на вочным і 10 на завочным аддзяленнях), 6 магістарскіх дысертацый па спецыялізацыі «Апалагетыка».

Камісіі ўнеслі прапановы па прызначэнні рэцэнзентаў магістарскіх дысертацый.

Абарона магістарскіх дысертацый адбудзецца 26 чэрвеня.

МінДА / Church.by