Пошук

У Мінскай духоўнай акадэміі адбыліся Дзявятыя Іеранімаўскія чытанні

14 снежня 2019

9-10 снежня 2019 года ў Мінскай духоўнай акадэміі прайшлі Дзявятыя Іеранімаўскія чытанні, навуковая канферэнцыя даследчыкаў Свяшчэннага Пісання, прысвечаная памяці блажэннага Іераніма Стрыдонскага. Канферэнцыя была арганізавана кафедрай біблеістыкі і багаслоўя Мінскай духоўнай акадэміі і біблейскім часопісам «Скрыжалі».

9 снежня прайшла праца дзвюх секцый, мадэратарамі якіх выступілі рэктар акадэміі архімандрыт Сергій (Акімаў) і выкладчык іерэй Міхаіл Самкоў.

У пачатку канферэнцыі рэктар Акадэміі правёў прэзентацыю 17 і 18 выпускаў біблейскага часопіса «Скрыжалі».

Падчас працы першай секцыі выступілі магістранты і аспіранты Мінскай духоўнай акадэміі, якія прадставілі даклады, звязаныя з іх навуковымі даследаваннямі ў рамках падрыхтоўкі магістарскіх і кандыдацкіх дысертацый. Прагучала 8 выступленняў.

У працы другой секцыі, якая складалася з двух пасяджэнняў, прынялі ўдзел даследчыкі з Дамаска (Сірыя), Мінска (Беларусь), Полацка, Масквы і Уладзівастока. Сярод выступоўцаў на канферэнцыі былі выкладчыкі Мінскай духоўнай акадэміі, Беларускага дзяржаўнага ўніверсітэта, Агульнацаркоўнай аспірантуры і дактарантуры, Стрэчанскай духоўнай семінарыі, Мінскага духоўнага вучылішча, цэнтра падрыхтоўкі царкоўных спецыялістаў Уладзівастоцкай епархіі, праваслаўныя святары з Мінска і Полацка. Прагучала 12 дакладаў, якія закранаюць праблемы біблейскіх перакладаў, біблейскага багаслоўя і экзэгетыкі, а таксама пытанні вывучэння міжзаветнай літаратуры ў кантэксце біблейскага і патрыстычнага багаслоўя.

10 снежня ў рамках канферэнцыі прайшла прэзентацыя кнігі доктара багаслоўя, прафесара Агульнацаркоўнай аспірантуры і дактарантуры ігумена Арсенія (Сакалова) «Кніга прарока Асіі» і кнігі Альберта Мэла «Ідзі і памятай. Другазаконне: прарочае прачытанне» (пераклад ігумена Арсеня (Сакалова)). Прэзентацыю правёў аўтар і перакладчык ігумен Арсень (Сакалоў), прадстаўнік Патрыярха Маскоўскага і ўсяе Русі пры Патрыярху Антыяхійскім і ўсяго Усходу (Дамаск, Сірыя), прафесар Агульнацаркоўнай аспірантуры і дактарантуры (Масква, Расія), доктар багаслоўя.

Даклады ўдзельнікаў канферэнцыі будуць апублікаваны ў бліжэйшых нумарах біблейскага часопіса «Скрыжалі», выступленні магістрантаў — у чарговым выпуску зборніка студэнцкіх навуковых прац па біблеістыцы «Лабараторыум Біблікум».

МінДА / Church.by