Пошук

У Мінскай духоўнай семінарыі прайшоў навучальны семінар для выкладчыкаў

13 красавіка 2021

9 красавіка 2021 года ў актавай зале Мінскай духоўнай семінарыі прайшоў навучальны семінар для выкладчыкаў духоўнай школы, прысвечаны ключавым аспектам адукацыйнага працэсу. Гэтая падзея паклала пачатак рэалізацыі комплексу мер па павышэнні кваліфікацыі выкладчыкаў духоўных навучальных устаноў Беларускай Праваслаўнай Царквы і стала першым крокам па ўвасабленні рэкамендацый Камісіі па аналізе і ўдасканаленні работы духоўных школ.

Працу семінара адкрыў Праасвяшчэнны епіскап Лідскі і Смаргонскі Парфірый, кіраўнік Камісіі па аналізе і ўдасканаленні працы духоўных школ, выкладчык семінарыі. Затым да прысутных звярнуўся Ліс Мікалай Іванавіч, выконваючы абавязкі старшыні Сінадальнага аддзела па рэлігійнай адукацыі і катэхізацыі Беларускай Праваслаўнай Царквы, які распавёў аб планах па арганізацыі павышэння кваліфікацыі на бліжэйшую будучыню і запрасіў выкладчыкаў да актыўнага ўдзелу ў фарміраванні тэм будучых сустрэч. У рабоце семінара таксама ўдзельнічаў намеснік старшыні Сінадальнага аддзела рэлігійнай адукацыі і катэхізацыі ігумен Аўксенцій (Абражэй), старшыня камісіі Аддзела па ўзаемадзеянні з духоўнымі школамі.

Змястоўную частку сустрэчы адкрыла выступленне «Формы і метады арганізацыі адукацыйнага працэсу ва ўстановах вышэйшай адукацыі (патрабаванні да лекцыі, семінарскіх заняткаў, практычных заняткаў)», якое прадставіў Дзмітрый Іванавіч Губарэвіч, метадыст вучэбна-метадычнай лабараторыі інавацый у адукацыі Беларускага дзяржаўнага ўніверсітэта. Дзмітрый Іванавіч таксама прадставіў увазе выкладчыкаў сучасныя метадычныя публікацыі па тэме выступлення. Услед за выступленнем рушыла  дыскусія.

Тэму «Аб працы кафедры ўстановы вышэйшай адукацыі» асвятліла Ганна Алегаўна Данільчанка — намеснік начальніка Галоўнага ўпраўлення адукацыйнай дзейнасці, начальнік аддзела маніторынгу якасці адукацыі Беларускага дзяржаўнага ўніверсітэта. Услед за адказамі Ганны Алегаўны на пытанні выкладчыкаў свой каментарый спецыфікі працы кафедр Мінскай духоўнай семінарыі агучыў Мікалай Іванавіч Ліс. У працяг тэмы семінара звярнуўся да выкладчыкаў ігумен Аўксенцій (Абражэй), які супаставіў задачы выхаваўчай працы духоўнай школы з яе вынікамі і зрабіў акцэнт на тым, што ў духоўнай школе непадзельныя адукацыя і выхаванне.

Наступнае выступленне «Навуковая праца студэнтаў» прадставіла Ганна Уладзіміраўна Навумава, дацэнт кафедры тэарэтычнага і славянскага мовазнаўства Беларускага дзяржаўнага ўніверсітэта, кандыдат філалагічных навук. Ганна Уладзіміраўна падзялілася назіраннямі аб зменах ва ўзроўні тых студэнтаў, , што прыходзяць у ВНУ, і пра значэнне навуковай працы ў развіцці чалавечай асобы. Сустрэча завяршылася малітвай і сумеснай трапезай, за якой зносіны працягнуліся.

Мінская духоўная семінарыя/Сінадальны аддзел рэлігійнай адукацыі і катэхізацыі БПЦ/Church.by