Пошук

У Салігорску адбылася прэс-канферэнцыя «Місія Царквы ў сучасным свеце» [+ВІДЭА]

17 верасня 2022

16 верасня ў кафедральным саборы Ражджаства Хрыстова горада Салігорска адбылася прэс-канферэнцыя «Місія Царквы ў сучасным свеце», якую правёў епіскап Слуцкі і Салігорскі Яўсевій.

У прэс-канферэнцыі прынялі ўдзел: прэс-сакратар Слуцкай епархіі іерэй Андрэй Еўшэль, благачынны Капыльскай царкоўнай акругі, настаяцель прыхода храма Узнясення Гасподняга горада Капыля; настаяцель кафедральнага сабора Ражджаства Хрыстова горада Салігорска протаіерэй Сергій Чарны, старэйшы духаўнік епархіі; выконваючы абавязкі благачыннага Клецкай царкоўнай акругі, выконваючы абавязкі настаяцеля прыхода храма Уваскрасення Хрыстова горада Клецка іерэй Генадзь Белавус; клірык прыхода храма велікамучаніцы Варвары горада Салігорска іерэй Яўген Ткачоў; загадчык канцылярыі Слуцкага епархіяльнага ўпраўлення протадыякан Ігар Мартыс; кіраўнік аддзела па справах моладзі Віктар Бровушкін; кіраўнік аддзела па царкоўнай дабрачыннасці і сацыяльным служэнні Аляксандра Бровушкіна; кіраўнікі і супрацоўнікі тэлеканалаў, інтэрнэт-парталаў і друкаваных СМІ з Салігорска, Капыля, Нясвіжа, Старых Дарог, Любані, Слуцка.

У прывітальным слове епіскап Яўсевій падзякаваў журналістам за супрацоўніцтва і плённую працу ў справе духоўнай асветы.

«У нашу інфармацыйную эпоху праца журналіста вельмі запатрабавана, таму што людзі XXI стагоддзя маюць патрэбу ў інфармацыі, – заўважыў Праасвяшчэнны ўладыка. – Але гэта накладае вялікую адказнасць на тых, хто працуе ў інфармацыйнай сферы. Важна даносіць гэтае слова да чытачоў нескажоным. Бо той, хто дорыць нам інфармацыю, закліканы казаць праўду».

Таксама Яго Праасвяшчэнства звярнуў асаблівую ўвагу на тое, што прэс-канферэнцыя арганізавана ў Год гістарычнай памяці, год 410-годдзя з дня скону святой праведнай Сафіі Слуцкай і 1030-годдзя Праваслаўя на беларускіх землях. Гаворачы пра гісторыю Слуцка і Слуцкай епархіі, уладыка ўспомніў архіерэяў, чыё служэнне праходзіла ў розныя гістарычныя перыяды, з удзячнасцю ўспомніў мітрапаліта Мінскага і Слуцкага Філарэта, падзякаваў за працу архіепіскапа Гродзенскага і Ваўкавыскага Антонія.

Затым прагучалі пытанні ад усіх прадстаўнікоў СМІ, якія актыўна цікавіліся будаўніцтвам і рэстаўрацыяй храмаў, магчымасцю вывучэння дзецьмі Закона Божага, вопытам узаемадзеяння Царквы і СМІ, сацыяльным служэннем у епархіі, рознымі веравучыцельнымі пытаннямі. Былі намечаны перспектывы супрацоўніцтва са СМІ, якія прадстаўлялі журналісты.

Падводзячы вынік прэс-канферэнцыі, уладыка адзначыў важнасць правядзення падобных мерапрыемстваў і выказаў гатоўнасць да далейшага дыялогу.

Галоўныя рэдактары былі ўзнагароджаны архіерэйскімі граматамі, а фатографы і карэспандэнты – архіерэйскімі падзякамі.

У завяршэнне адбылося чаяванне і экскурсія па салігорскім саборным храмавым комплексе, якую правёў настаяцель сабора протаіерэй Сергій Чарны.

 Слуцкая епархія/Church.by