Пошук

Ва ўсіх школах Бярозы прайшлі лекцыі аб Бібліі

10 лютага 2017

Выязны лекторый Музея Бібліі Інстытута тэалогіі Беларускага дзяржаўнага ўніверсітэта правёў серыю выступленняў у горадзе Бяроза Брэсцкай вобласці.

Мерапрыемства было арганізавана адміністрацыяй ДУА «Сярэдняя школа № 3» і аб'яднаннямі па духоўна-маральнаму выхаванню вучняў «Асновы праваслаўнай маральнасці», «Адзін раз і на ўсё жыццё». Дапамогу ў арганізацыі аказала Бярозаўскае благачынне Брэсцкай епархіі Беларускай Праваслаўнай Царквы.

Інстытут тэалогіі БДУ прадстаўлялі студэнты выпускнога курса кафедры біблеістыкі і хрысціянскага веравучэння Багдан Грышко, Кірыл Корбут і Лізавета Чахоўская.

У межах лекторыя была разгорнута выязная экспазіцыя Музея. Увазе навучэнцаў 8-11 класаў трох школ горада і школьнікаў з сярэдніх навучальных устаноў раёна былі прадстаўлены рэпрынтнае выданне Бібліі Францыска Скарыны, рэпрынтнае выданне Кіеўскай Псалтыры, Біблія на грузінскай, якуцкай, карэйскай мовах, Тора, а таксама Новы Запавет на санскрыце. Таксама студэнты-тэолагі прывезлі і паказалі навуковыя працы сучасных біблеістаў: сучасныя пераклады Евангелляў на беларускую мову, часопісы «Скрыжалі» і «Laboratorium Biblicum».

Аповед пра гісторыю выдання 500 гадоў таму доктарам Францыскам Скарынам першай друкаванай Бібліі на старабеларускай мове пачулі больш за дзвесце юных беларусаў.

Акрамя выступленняў перад старшакласнікамі раёна студэнты правялі ўрокі ў малодшых класах сярэдняй школы № 3 на тэму «Роля хрысціянства ў гісторыі кнігі і кнігадрукавання ў Беларусі».

Студэнты пабывалі ў храме-помніку ў гонар Архангела Міхаіла, які ўзвялі ў памяць аб воінах, якія загінулі ў Афганістане, а таксама сустрэліся з моладзевым брацтвам у гонар свяціцеля Лазара, епіскапа Кіційскага.

Адміністрацыя Інстытута тэалогіі БДУ дзякуе пратаіерэю Георгія Шаўцову, благачыннаму цэркваў Бярозаўскай акругі, і Вользе Віктараўне Пунько, настаўніцы англійскай мовы сярэдняй школы № 3 горада Бярозы, за арганізацыю мерапрыемства.

Інстытут тэалогіі / Church.by