Пошук

XV Адзігітрыеўскі хрэсны ход з Віцебска сустрэлі ў Смаленску

10 жніўня 2017

9 жніўня 2017 года XV міжнародны Адзігітрыеўскі хрэсны ход з Віцебска, прымеркаваны да святкавання ў гонар цудатворнага Смаленскага абраза Божай Маці «Адзігітрыя», прыбыў у горад Смаленск.

Шэсце традыцыйна пачалося ў горадзе Віцебску 5 жніўня, завяршаючы такім чынам моладзевы асветніцкі фестываль «Адзігітрыя», які прайшоў у Віцебску ў першых чыслах жніўня. Куратар хрэснага ходу — кіраўнік аддзела Віцебскай епархіі па рабоце з моладдзю протаіерэй Аляксандр Кавалёў. У гэтым годзе ў паломніцтве прынялі ўдзел больш за 160 чалавек са Смаленска, Віцебска, Санкт-Пецярбурга, Саратава і іншых гарадоў Расіі, Беларусі, Украіны, Малдовы. Самаму малодшаму ўдзельніку хрэснага ходу — 3,5 месяцы, а самаму старэйшаму — 77 гадоў.

За пяць дзён шляху ўдзельнікі Адзігітрыеўскага хрэснага ходу пераадолелі пешшу больш за 120 кіламетраў, сваімі намаганнямі і малітоўным уздыханнем просячы благаслаўлення і дапамогі Божай Маці. На прыпынках па шляху руху ўдзельнікі давалі канцэрты аўтарскай песні, праводзілі тэматычныя гутаркі і майстар-класы, тварылі ліціі ля памятных знакаў загінулым за Айчыну ці пацярпелым ў гады ганенняў. З сабой хрэснаходцы неслі шануемы абраз святога праведнага Іаана Кранштацкага.

Хрэсны ход урачыста сустрэлі на мяжы Расіі і Беларусі ў Руднянскім раёне Смаленскай вобласці. Затым шэсце рабіла прыпынкі ў Рудні, Галынках, Катыні, Гнездаве і іншых населеных пунктах.

У горадзе Смаленску, па традыцыі, удзельнікаў шэсця гасцінна прынялі на прыходзе храма ў гонар святых апосталаў Пятра і Паўла, дзе паломнікі размясціліся на час правядзення Адзігітрыеўскіх урачыстасцяў.

Настаяцель храма протаіерэй Святаслаў Худавекаў вітаў удзельнікаў Адзігітрыеўскага хрэснага ходу. Вернікі прыклаліся да іконы праведнага Іаана Кранштацкага і святыняў храма апосталаў Пятра і Паўла, у храме пры ўдзеле паломнікаў і вернікаў быў здзейснены падзячны малебен.

Пасля кароткага адпачынку і трапезы ўдзельнікі Адзігітрыеўскага хрэснага ходу працягнулі шэсце ў Успенскі кафедральны сабор горада Смаленска, каб разам са смалянамі і пілігрымамі памаліцца ля цудатворнай Смаленскай іконы Божай Маці «Адзігітрыя».

Смаленская мітраполія / Church.by