Пошук

Епіскап Серафім Бабруйскі: Стараюся, каб адносіны ў епархіі былі брацкімі, як у сям'і

28 красавіка 2017

У велікодныя красавіцкія дні 2017 года споўнілася 10 гадоў з дня архіерэйскай хіратоніі епіскапа Бабруйскага і Быхаўскага Серафіма. Пра пройдзены за гэты час шлях уладыка распавёў у інтэрв'ю кіраўніку епархіяльнага прэс-сакратарыята іераманаху Дзімітрыю (Мамонаву).

«У сакавіку 2007 года адбылося маё абранне ў епіскапа Бабруйскага і Быхаўскага. Гэта было ў Маскве, у Чыстым завулку, у рэзідэнцыі Свяцейшага Патрыярха — тады Аляксія ІІ. Адбылося гэта, як і трэба, на пасяджэнні Свяшчэннага Сінода Рускай Праваслаўнай Царквы, якое праходзіла пад старшынствам Патрыярха Аляксія. Члены Сінода задалі мне шэраг пытанняў, пасля чаго я чакаў у прыёмнай рашэнне Свяцейшага Патрыярха і Свяшчэннага Сінода. Пасяджэнне яшчэ ішло, як раптам з залы выйшаў мітрапаліт Смаленскі і Калінінградскі Кірыл, цяпер Патрыярх Маскоўскі і ўсяе Русі, падышоў да мяне, сардэчна абняў і сказаў: «Віншую Вас, айцец Серафім, Вы абраныя». Гэта была першая вестка і першае віншаванне. Па завяршэнні пасяджэння Свяцейшы Патрыярх Аляксій уручыў мне Патрыяршы ўказ і сказаў: «Я спадзяюся, Вы нас не падвядзеце». У мяне выразна адбіўся яго вобраз — такі, як звычайна ён выходзіў на фотаздымках — прамяністыя вочы, мяккая ўсмешка.

Хіратонія адбылася ў Мінскім кафедральным саборы Святога Духа, які вельмі дарагі мне. Там былі здзейсненыя мае і дыяканская, і свяшчэнніцкая хіратонія, там праходзілі мае першыя гады служэння як свяшчэнніка. Хіратонію ўзначаліў мітрапаліт Філарэт. Ён быў вельмі рады, ён, натуральна, прадстаўляў мяне Свяцейшаму, быў рады, што ўсё атрымалася, што Гасподзь благаславіў гэтую справу», — успамінае архіпастыр.

Маладому архіерэю была даручана праца па адраджэнню царкоўнага жыцця на тэрыторыі, дзе ў гады атэістычнага ліхалецця Царква была практычна знішчана. На дадзены момант, па словах епіскапа Серафіма, у епархіі «амаль падвоілася колькасць прыходаў і святароў. З'явіліся два манастыры. Важна, што адроджаны старажытны Баркалабаўскі манастыр у Быхаўскім раёне, дзе зараз захоўваецца цудатворны абраз Божай Маці, які перанёс усе гістарычныя перыпетыі і застаўся цэлым і непашкоджаным. Важна, што мы зрабілі капітальны рамонт у адным з будынкаў Бабруйскай крэпасці, і цяпер у нас ёсць епархіяльнае ўпраўленне, наш «штаб», працоўнае месца, месца сустрэчы. Гэтага не было, мы пачыналі 10 гадоў таму з маленькага пакойчыка ў нядзельнай школе. Самае важнае — гэта, вядома, кадры. Атрымалася абнавіць, асвяжыць наш кадравы састаў. Ёсць і шмат моладзі, якая вучыцца ад Бабруйскай епархіі, у духоўных навучальных установах, — будучыя святары і царкоўныя працаўнікі».

«У Бабруйскай епархіі ў многіх школах выкладаецца як факультатыў гісторыя рэлігіі, вядзецца гэты прадмет нашымі кадрамі. Таксама важная дзейнасць епархіяльнага апякунскага савета, у які ўваходзіць шэраг дырэктараў прадпрыемстваў горада Бабруйска. Савет падтрымлівае функцыянаванне летняй нядзельнай школы — лагера «Дружба», дзе летам адпачываюць і навучаюцца сотні дзяцей з нядзельных школ епархіі. Апякунскі савет забяспечвае штодзённымі дабрачыннымі абедамі людзей, якія маюць патрэбу і сацыяльна непаспяховых людзей», — адзначыў уладыка.

У Бабруйскай епархіі, падкрэслівае архіерэй, «добрыя адносіны і з рэспубліканскімі, і абласнымі, і з гарадскімі, і раённымі кіраўнікамі, з якімі мы супрацоўнічаем. За гэтыя дзесяць гадоў мне пашчасціла пазнаёміцца і мець зносіны з многімі цікавымі і таленавітымі людзьмі ў сферы дзяржаўнага кіравання. Асабліва хочацца адзначыць былога старшыню Магілёўскага аблвыканкама Б. В. Батуру, В. А. Малашка і многіх іншых. Што тычыцца царкоўнага грамадства, то тут праблем наогул няма. Людзі прынялі епіскапа, любяць архіерэйскае богаслужэнне. Са свецкім грамадствам мы заўсёды ў кантакце — або асабіста, або праз нашыя епархіяльныя аддзелы і прыходы».

«У нас маленькая епархія. Я стараюся, каб адносіны былі брацкімі, як у адной сям'і. Усе людзі адказныя, лішняга кантролю не патрабуюць. Мяне натхняе, калі нашы веруючыя людзі, людзі рознага ўзросту, розных прафесій бескарысліва, ахвярна, з любоўю да Бога і Царквы робяць усё магчымае, з вялікім энтузіязмам і самааддачай, каб Царква жыла, прапаведавалася слова Божае, хрысціянскае жыццё пранікала ва ўсе поры грамадства. Такія людзі, як у Бабруйску, так і ва ўсёй нашай епархіі ёсць — і гэта акрыляе», — прызнаецца ўладыка Серафім.

Бабруйская епархія / Church.by