Пошук

Патрыяршы Экзарх узначаліў урачыстасці ў гонар дня памяці роўнаапостальных Мяфодзія і Кірыла і Дня славянскага пісьменства і культуры

24 мая 2017

24 мая 2017 года, у сераду 6-й сядміцы пасля Вялікадня, адданне Пасхі, у Свята-Духавым кафедральным саборы горада Мінска прайшлі ўрачыстасці ў гонар дня памяці святых роўнаапостальных Мяфодзія і Кірыла і Дня славянскага пісьменства і культуры.

Для сабора гэтае свята з'яўляецца асаблівым, паколькі хрышчальны крыптавы храм асвечаны ў гонар святых Салунскіх братоў — роўнаапостальных Мяфодзія і Кірыла.

Бажэственную літургію ўзначаліў мітрапаліт Мінскі і Заслаўскі Павел, Патрыяршы Экзарх усяе Беларусі, у саслужэнні епіскапа Барысаўскага і Мар'інагорскага Веніяміна.

Архіпастырам саслужылі: кіраўнік спраў Мінскай Экзархіі архімандрыт Сергій (Брыч) і духавенства сабора.

Богаслужэбныя спевы выканаў архіерэйскі хор пад кіраўніцтвам Віталя Сабалеўскага.

Пропаведзь перад Прычасцем прамовіў протаіерэй Уладзімір Увараў.

Пасля адпуста Літургіі быў здзейснены хрэсны ход.

Ля паўночнай сцяны Свята-Духава кафедральнага сабора, дзе ўстаноўлена мемарыяльная дошка з выявай святых роўнаапостальных Мяфодзія і Кірыла, было здзейснена слаўленне святым і ўскладанне кветак.

Пасля гэтага хрэсны ход прайшоў на Замчышча — месца, дзе археолагамі быў знойдзены падмурак праваслаўнага храма XI стагоддзя.

У шэсці прынялі ўдзел клірыкі Мінскай епархіі, прадстаўнікі дзяржаўных органаў улады і дыпламатычных місій.

На шляху да Замчышча да хрэснага ходу далучыліся духавенства і прыхаджане Петра-Паўлаўскага сабора горада Мінска на чале з настаяцелем протаіерэем Георгіем Латушкам.

Ля падмурка старажытнага храма мітрапаліт Павел звярнуўся да прысутных з прывітальным словам, а затым быў здзейснены святочны малебен і абвешчана мнагалецце цяпер тэзаімянітаму Першасвяціцелю Рускай Праваслаўнай Царквы — Свяцейшаму Патрыярху Маскоўскаму і ўсяе Русі Кірылу.

З Днём славянскага пісьменства і культуры прысутных павіншавалі: намеснік Упаўнаважанага па справах рэлігій і нацыянальнасцяў Рэспублікі Беларусь Алена Іванаўна Радчанка; намеснік начальніка ўпраўлення ўстаноў культуры і народнай творчасці Міністэрства культуры Алег Аляксандравіч Скарына; старшы саветнік Пасольства Расійскай Федэрацыі ў Рэспубліцы Беларусь Аляксандр Мікалаевіч Дэрыглазаў і першы сакратар Пасольства Балгарыі ў Рэспубліцы Беларусь Дзіма Карадзімаў.

На свяце прагучалі духоўныя песнапенні ў выкананні архіерэйскага хору Свята-Духава кафедральнага сабора пад кіраўніцтвам Віталя Сабалеўскага.

Па завяршэнні свята Патрыяршы Экзарх падзякаваў усім удзельнікам урачыстасці за сумесную малітву і заклікаў усіх быць вернымі захавальнікамі спадчыны святых братоў Кірыла і Мяфодзія. 

 Church.by

Фотарэпартаж