Свята вуліцы арганізаваў для гамяльчан Мікольскі манастыр
28 мая 2019
26 мая Мікольскі мужчынскі манастыр Гомеля стаў пляцоўкай для свята. Арганізатары назвалі яго «Свята вуліцы», вырашыўшы адзначыць вяртанне вуліцы гістарычнай назвы — Мікольская.
У 1904 годзе чыгуначныя рабочыя Гомеля па благаславенню святога Іаана Кранштацкага і пры яго фінансавай падтрымцы ўзвялі царкву ў гонар свяціцеля Мікалая Цудатворца. У гэтай добрай справе паўдзельнічалі многія знакамітыя і шчодрыя жыхары горада. Мікольскай стала называцца і вуліца, на якой з'явіўся храм.
Пасля перавароту 1917 года новая ўлада назвала вуліцу па-новаму. Пралетарскі паэт Дзям'ян Бедны, без сумневу, нават не ведаў, што ў беларускім горадзе вуліца носіць яго імя.
Мікольскі храм ацалеў у часы смут і ліхалеццяў. У 1994 годзе пры ім пасяліліся першыя паслушнікі, утварыўся мужчынскі манастыр.
Праз 10 гадоў манаская абшчына ўпершыню звярнулася да гарадскіх уладаў з просьбай вярнуць вуліцы гістарычную назву — Мікольская. На працягу 15 апошніх гадоў вялася перапіска. І вось 19 кастрычніка 2018 года дэпутаты Гомельскага гарсавета прынялі рашэнне: «У Гомелі вуліца Дзям'яна Беднага перайменавана ў Мікольскую».
Радасную падзею насельнікі абіцелі вырашылі адзначыць у першую нядзелю пасля дня памяці свяціцеля Мікалая Цудатворца, зладзіўшы свята для жыхароў вуліцы.
Экскурсія па манастыры, канцэрт класічнай музыкі ад камернага ансамбля «Класік» з Гомельскіх гарадскіх аркестраў, гульні для дзяцей, чай з пірагамі ды цукеркамі для ўсіх жадаючых — такім запомнілася свята гамяльчанам.
Афіцыйны партал Беларускай праваслаўнай Царквы
© Беларуская Праваслаўная Царква 2019
Пры перадруку матэрыялаў спасылка на church.by абавязковая.
Калі вы хочаце задаць пытанне ці выказаць свае меркаванне з нагоды сайта або артыкулаў,
напішыце нам, скарыстаўшыся паштовай формай.
