Пошук

Прадстаўнікі Беларускай Праваслаўнай Царквы і Міністэрства аховы здароўя Рэспублікі Беларусь абмеркавалі ход рэалізацыі сумесных праграм супрацоўніцтва

29 верасня 2021

28 верасня 2021 года ў Беларускай медыцынскай акадэміі паслядыпломнай адукацыі адбылося пасяджэнне Каардынацыйнага савета па распрацоўцы і рэалізацыі сумесных праграм супрацоўніцтва паміж органамі дзяржаўнага кіравання і Беларускай Праваслаўнай Царквой, на якім абмяркоўваўся ход рэалізацыі праграмы супрацоўніцтва БПЦ з Міністэрствам аховы здароўя Рэспублікі Беларусь.

У нарадзе прынялі ўдзел мітрапаліт Мінскі і Заслаўскі Веніямін, Патрыяршы Экзарх усяе Беларусі, упаўнаважаны па справах рэлігій і нацыянальнасцяў Аляксандр Румак, міністр аховы здароўя Рэспублікі Беларусь Дзмітрый Піневіч, святары Беларускага Экзархату, прадстаўнікі міністэрства і ўстаноў аховы здароўя.

На Каардынацыйным савеце былі прадстаўлены праекты БПЦ і Міністэрства аховы здароўя РБ, рэалізацыя якіх запланавана ў рамках праграмы супрацоўніцтва на 2021-2025 гады; абмяркоўваліся шляхі сумеснага вырашэння такіх праблем, як рознага роду залежнасці; разглядаліся спосабы ўзаемадзеяння ў аказанні псіхалагічнай дапамогі пры крызісных сітуацыях; агучваліся магчымасці аказання духоўнай дапамогі ў рамках медыцынскіх устаноў. Таксама была закранута тэма супрацоўніцтва БПЦ і службы аховы мацярынства і дзяцінства па пытаннях рэпрадуктыўнага здароўя, прафілактыкі абортаў і ўмацавання здароўя сям'і.

Выступаючы перад членамі Каардынацыйнага савета міністр аховы здароўя адзначыў, што «ўзаемадзеянне Міністэрства аховы здароўя і БПЦ носіць сістэмны характар і ўключае такія напрамкі, як сям'я, прафілактыка абортаў, здаровы лад жыцця, псіхічныя захворванні і іншыя».

Патрыяршы Экзарх звярнуў увагу на тое, што святары лечаць душу чалавека, а медыцынскія работнікі — цела. Таму, зыходзячы з ўзаемасувязі духоўнага і фізічнага здароўя чалавека, святары і ўрачы абавязкова павінны ўзаемадапаўняць адно аднаго ў аказанні дапамогі пакутным.

У сваім выступленні старшыня Сінадальнага аддзела па царкоўнай дабрачыннасці і сацыяльным служэнні Беларускай Праваслаўнай Царквы, настаяцель прыхода храма ў гонар іконы Божай Маці «Усецарыца» горада Мінска протаіерэй Кірыл Шолкаў праінфармаваў аб шэрагу сумесных праектаў аддзела і Міністэрства аховы здароўя. У іх ліку дапамога царквы на рэгулярнай аснове хоспісам і палатам сястрынскага догляду ў выглядзе абсталявання, расходных матэрыялаў і сродкаў гігіены, наведванне праваслаўнымі добраахвотнікамі пацыентаў хоспісаў і палат сястрынскага догляду, стварэнне інтэрнэт-рэсурсу для арганізацыі сумеснай духоўнай і псіхалагічнай дапамогі людзям, якія знаходзяцца на мяжы суіцыду.

«Пандэмія COVID-19, якая спасцігла сусветную супольнасць 2020-2021 гадах, наклала пэўныя карэктывы на працу ўсіх праектаў. Усе сілы, як Сінадальнага аддзела па царкоўнай дабрачыннасці і сацыяльным служэнні БПЦ, так і іншых структур БПЦ былі кінутыя на дапамогу пацыентам з каронавіруснай інфекцыяй, медыцынскім работнікам і лячэбным установам», — падвёў вынікі мінулага года протаіерэй Кірыл Шолкаў.

Кіраўнік Каардынацыйнага цэнтра БПЦ па супрацьдзеянні наркаманіі і алкагалізму ў гонар святога мучаніца Баніфацыя, настаяцель прыхода храма іконы Божай Маці «Няўпіўная Чаша» ў горадзе Мінску протаіерэй Дыянісій Пясецкі праінфармаваў аб тым, як святарамі БПЦ наладжана праца па супрацьдзеянню алкагольнай, наркатычнай і іншым відам хімічнай залежнасці ў Беларусі, а таксама прафілактыцы суіцыдаў сярод насельніцтва. Выступоўца падзяліўся вопытам работы БПЦ з людзьмі, якія ужо маюць вопыт ўжывання псіхаактыўных рэчываў і іх сваякамі. У сваім выступленні святар агучыў магчымыя кірункі супрацоўніцтва БПЦ з установамі аховы здароўя па дадзенай тэматыцы.

Затым выступіў іерэй Раман Арцёмаў — магістр філасофскіх навук, магістр псіхалогіі, выкладчык Мінскай духоўнай акадэміі, клірык Свята-Духава кафедральнага сабора горада Мінска, духаўнік Рэспубліканскага клінічнага цэнтра паліятыўнай дапамогі дзецям і Беларускага дзіцячага хоспіса, каардынатар духоўнай дапамогі РНПЦ дзіцячай анкалогіі, імуналогіі, гематалогіі. Ён падзяліўся вопытам пабудовы пастырскай практыкі акармлення і ўзаемадзеяння са структурнымі падраздзяленнямі хоспіса і паліятыўнага цэнтра.

«Неабходнасць прысутнасці святара ў дзіцячым хоспісе і паліятыўным цэнтры з'яўляецца натуральнай патрэбай. Гэта абумоўлена як Палажэннем аб аказанні паліятыўнай дапамогі, дзе разам з псіхалагічным, медыцынскім, сацыяльным, юрыдычным суправаджэннем згадваецца і духоўная дапамога, так і прамым абавязкам пастыра быць там, дзе балюча і дрэнна, складана і непераадольна», — сказаў іерэй Раман Арцёмаў.

Паводле яго слоў, асноўны спектр дзейнасці, які ўваходзіць у разуменне духоўнай дапамогі ў хоспісах: увядзенне ў рэсурсны стан чалавека, які знаходзіцца ў крызіснай сітуацыі; здзяйсненне таінстваў і абрадаў; суправаджэнне ў момант сыходу дзіцяці яго і бацькоў; здзяйсненне адпявання; суправаджэнне бацькоў пасля сыходу дзіцяці; праца з пачуццём віны, зняцце вострых станаў сумесна з псіхалагічнай службай; пераадоленне закрытасці падапечных сем'яў для доступу спецыялістаў хоспіса. «Такія сем'і маюць патрэбу ў пастаянным суправаджэнні, і асноўная задача святара — даць зразумець людзям, што яны не адны, і ёсць чалавек, які гатовы быць з імі побач у цяжкія моманты», — растлумачыў выступоўца. Ён таксама адзначыў, што ў суправаджэнні святара мае патрэбу і персанал хоспіса.

Старшыня Сінадальнага аддзела па пытаннях сям'і, абароны мацярынства і дзяцінства БПЦ, настаяцель прыхода храма свяціцеля Мікалая Японскага горада Мінска протаіерэй Павел Сярдзюк у сваім выступленні падкрэсліў, што ў працы па прасоўванні сямейнага ладу жыцця, праваслаўных сямейных духоўна-маральных каштоўнасцяў і пры аказанні падтрымкі маючым патрэбу сем'ям аддзел зыходзіць з прынцыпу ўсялякага ўзаемадзеяння і шырокафарматнага супрацоўніцтва з дзяржаўнымі сацыяльнымі і медыцынскімі ўстановамі і спецыялістамі. Святар прывёў шматлікія прыклады супрацоўніцтва БПЦ з установамі аховы здароўя, якія даюць адчувальны станоўчы вынік.

У рамках пасяджэння Каардынацыйнай рады Патрыяршы Экзарх даў інтэрв'ю СМІ, у якім адказаў на пытанне журналістаў пра стаўленне Царквы да вакцынацыі ад COVID-19. Архіпастыр растлумачыў, што Царква не можа даваць тлумачэнняў па медыцынскіх пытаннях, што тычацца дзеяння вакцыны. Але па вопыце папярэдніх пакаленняў мы ведаем, што дзякуючы вакцынацыі ўдалося перамагчы многія эпідэміі і зберагчы жыццё і здароўе многім людзям. Выбар на карысць прышчэпкі або адмовы ад яе з'яўляецца індывідуальным рашэннем кожнага чалавека, якое прымаецца на аснове асабістых перакананняў, ведаў, жыццёвага вопыту, а таксама з улікам інфармацыі аб магчымых наступствах вакцынацыі, атрыманай ад медыцынскіх работнікаў, прадстаўнікоў навуковай супольнасці. Таму памылковым з'яўляецца сцвярджэнне, што прынцыповая адмова ад вакцынацыі як такой можа быць абумоўлена праваслаўным веравучэннем.

Church.by 

Фотарэпартаж