У Брэсцкай абласной дзіцячай бальніцы асвечана капліца

07 мая 2017

top.jpg

4 мая 2017 года архіепіскап Брэсцкі і Кобрынскі Іаан здзейсніў чын асвячэння капліцы ў гонар свяціцеля Спірыдона Трыміфунцкага ў Брэсцкай абласной дзіцячай бальніцы.

Яго Высокапраасвяшчэнству саслужылі: сакратар Брэсцкага епархіяльнага ўпраўлення протаіерэй Пётр Рамановіч; клірык кафедральнага сабора прападобнага Сімяона Стоўпніка горада Брэста протаіерэй Сергій Чырун; настаяцель Мікалаеўскага храма ў Брэсцкай крэпасці іерэй Віталь Ханавец; настаяцель бальнічнай капліцы, клірык кафедральнага сабора прападобнага Сімяона Стоўпніка Брэста іерэй Аляксій Макаранка.

За богаслужэннеі маліліся пацыенты і медыцынскі персанал бальніцы.

У прывітальным слове ўладыка Іаан пажадаў, каб малітвы, якія будуць узносіцца ў капліцы, спрыялі ацаленню пацыентаў.

Архіпастыр паднёс у дар для капліцы абраз прападобнамучаніка Афанасія Брэсцкага. У сваю чаргу, святар Аляксій Макаранка падзякаваў уладыку за асвячэнне і сумесную малітву і ўручыў Яго Высокапраасвяшчэнству ікону Божай Маці, напісаную на востраве Корфу (Грэцыя), дзе захоўваюцца цудатворныя мошчы свяціцеля Спірыдона, заступніка капліцы.

Затым архіепіскап Іаан уручыў архіерэйскія падзякі рупліўцам у справе добраўпарадкавання капліцы. Падзякай была ганаравана і галоўны ўрач бальніцы Людміла Уладзіміраўна Ігнатчык.

Архіерэй наведаў 5-е педыятрычнае аддзяленне і благаславіў малышоў, якія знаходзяцца на лячэнні.

Брэсцкая епархія / Church.by