Пошук

У Гродзенскай епархіі адбыўся XI экалагічны злёт «Праваслаўная моладзь за ўстойлівае развіццё»

08 жніўня 2018

XI епархіяльны экалагічны злёт «Праваслаўная моладзь за ўстойлівае развіццё», які базуецца на тэрыторыі прыхода храма Святой Жыццепачатнай Тройцы гарадскога пасёлка Зэльва, праходзіць кожны год.

У гэтым годзе ля ракі Зэльвянкі сабралося каля 150 удзельнікаў з Зэльвенскага, Ваўкавыскага, Мастоўскага, Свіслацкага, Шчучынскага раёнаў, а таксама з Мінскай вобласці.

Палатачны лагер размясціўся ля затокі паблізу вёскі Расцевічы. Кожны дзень злёту пачынаўся з ранішняй малітвы і завяршаўся вячэрняй. У ўдзельнікаў злёту была насычаная праграма: тэматычныя ралявыя гульні, майстар-класы па ганчарнай справе, вырабе тканевых лялек, лекцыі і фільмы па экалогіі, урокі рукапашнага бою, спартыўныя гульні, а таксама сустрэча з байкерскім клубам. Незабыўныя эмоцыі падарылі ўдзельнікам катанне на конях, на лодках, канцэрты і маляўнічы феерверк.

— Сняданкі, абеды і вячэры — тут усё рыхтуецца выключна з экалагічна чыстых прадуктаў. Пры распрацоўцы меню ўлічваем пажаданні ўдзельнікаў злёту, — распавяла дзяжурны па «палявой кухні» кухар Людміла Трахімец.

На другі дзень эказлёту ў лагер прыехалі зэльвенскія пажарныя — прадэманстраваць абсталяванне, пакатаць на выратавальнай маторнай лодцы і падарыць «кроплі радасці» ў гарачыя +29°C.

— Ідэя правядзення такіх злётаў належыць экалагічнаму аддзелу Гродзенскай епархіі. Па яе ініцыятыве былі створаны экакаманды — моладзевыя групы, якія звычайна фарміруюцца пры нядзельных школах прыходаў. Навучэнцы на працягу года па асаблівай праграме атрымлівалі адукацыю па ўстойліваму развіццю. Летам яны збіраліся ў лагеры для сустрэч з аднадумцамі. Пазней такія сходы перараслі ў экалагічныя злёты, — адзначыў протаіерэй Георгій Субаткоўскі, кіраўнік экалагічнага аддзела Гродзенскай епархіі. — Такі кірунак практыкуюць Германія, Чэхія і многія іншыя еўрапейскія краіны.

— На экалагічным злёце я ўжо ў шосты раз. І тут вельмі выдатна! — падзялілася ўражаннямі Марыя Давыдзік з Ваўкавыска. — Больш за ўсё падабаюцца начныя пасядзелкі ля вогнішча і песні пад гітару. Дарэчы, менавіта тут я ўпершыню прасякнулася гучаннем жывой музыкі. З'ехала з думкай пра тое, што мне тэрмінова трэба навучыцца іграць на гітары. І, наогул, абяцанне, дадзенае сабе, стрымала!

— Гэта не проста песні пад гітару, а самыя сапраўдныя канцэрты! — дапоўніла Дар'я Куршук з Зэльвы. — Задзейнічаны і электрагітара, і барабаны, і бубны... Хоць мне больш падабаецца валейбол — люблю камандныя гульні. Спадзяюся, у наступным годзе зноў пашанцуе трапіць у лагер.

Гродзенская епархія / Church.by