Пошук

У Гродне абмеркавалі перспектывы новай стратэгіі ўзаемадзеяння Беларускай Праваслаўнай Царквы і Міністэрства адукацыі Рэспублікі Беларусь

14 верасня 2021

13 верасня 2021 года гродзенскія ўстановы адукацыі наведаў з рабочым візітам старшыня Сінадальнага аддзела Беларускай Праваслаўнай Царквы па супрацоўніцтве са свецкімі ўстановамі адукацыі протаіерэй Фёдар Поўны.

Першым пунктам візіту стаў Гродзенскі абласны інстытут развіцця адукацыі, дзе сумесна з аддзелам рэлігійнай адукацыі і катэхізацыі Гродзенскай епархіі быў арганізаваны абласны семінар «Новыя падыходы ў рэалізацыі Праграмы супрацоўніцтва паміж Міністэрствам адукацыі Рэспублікі Беларусь і Беларускай Праваслаўнай Царквой».

Мерапрыемства адкрыў начальнік Галоўнага ўпраўлення адукацыі Гродзенскага аблвыканкама Руслан Абрамчык. «Сёння нам усім трэба сумесна працаваць над выхаваннем духоўных каштоўнасцяў у нашых дзяцей. Мы ад айца Фёдара атрымалі выдатныя навучальныя дапаможнікі. Але разумеем, што нам ужо трэба нашмат больш. У першы тыдзень навучальнага года ў Гродзенскай вобласці жаданне вывучаць факультатыў выказала тры з паловай тысячы навучэнцаў» — адзначыў Руслан Абрамчык.

Прысутным у зале кіраўнікам, намеснікам старшыняў усіх раённых упраўленняў адукацыі Гродзенскай вобласці і духавенству Гродзенскай епархіі прывітальнае слова епіскапа Гродзенскага і Ваўкавыскага Антонія агучыў сакратар Гродзенскай епархіі протаіерэй Мікалай Лабынько. У сваім прывітанні ўладыка адзначыў, што ў аснове самасвядомасці беларускага народа ляжыць хрысціянская традыцыя: хрысціянская сімволіка, хрысціянскія ідэалы прасякаюць усю беларускую культуру і гісторыю, таму без іх вывучэння немагчыма быць паўнавартасна адукаваным чалавекам, сапраўдным патрыётам і грамадзянінам. Данесці гэтыя каштоўнасці да падрастаючага пакалення — адна з задач супрацоўніцтва сістэмы адукацыі і Праваслаўнай Царквы — падкрэсліў уладыка. «Гэта складаны і працяглы працэс, які патрабуе пастаянных намаганняў, сістэматычнай і планамернай працы. У чым няхай дапаможа нам Гасподзь па малітвах Прачыстай Сваёй Маці і ўсіх святых, у зямлі Беларускай прасслаўленых!», — даў наказ удзельнікаў мерапрыемства епіскап Антоній.

Протаіерэй Фёдар Поўны распавёў прысутным аб педагагічным падыходзе і метадычных прыёмах, якія выкарыстоўваюцца ў новым факультатыве па асновах духоўна-маральнай культуры «Духоўнасць і патрыятызм», падзяліўся творчымі планамі аўтарскага калектыву, запрасіў усіх прысутных да канструктыўнага супрацоўніцтва і адказаў на пытанні, якія паступілі.

У гэты ж дзень у Гродзенскім дзяржаўным універсітэце імя Янкі Купалы адбыўся семінар з удзелам кіраўніцтва, прафесарска-выкладчыцкага саставу, супрацоўнікаў і студэнтаў трох гродзенскіх універсітэтаў. Удзельнікаў сустрэчы павітала рэктар ГрДУ імя Янкі Купалы Ірына Кітурка: « Айцец Фёдар ужо другі раз выступае ў сценах нашага ўніверсітэта, і я вельмі ўдзячная яму, што ён адгукнуўся на наша запрашэнне. Прызнаюся, мне, як гісторыку, вельмі блізкія яго тэзісы з нагоды культурнага кода беларускага народа. Бо любоў да Радзімы пачынаецца з захавання гістарычнай памяці. Ад нашага ўспрымання гістарычных падзей і адносін да Радзімы залежыць, што мы перададзім сваім нашчадкам».

Прысутных вітаў Віктар Пранюк, намеснік старшыні па сацыяльных пытаннях Гродзенскага абласнога выканаўчага камітэта: «Нашым педагогам не хапала дакладных фармалізаваных ведаў для духоўнага выхавання моладзі. Цяпер мы толькі вызначаем дасведчаным шляхам платформу, на якой будзем працаваць. І безумоўна, падмуркам патрыятычнага выхавання стануць хрысціянскія каштоўнасці».

Протаіерэй Фёдар Поўны ў сваім дакладзе раскрыў тэму выхавання патрыёта і грамадзяніна ў хрысціянскай традыцыі: «Патрыятызм — комплексная духоўная з'ява, якую немагчыма звесці ў адну плоскасць. Любоў да Бога, да людзей і сваёй Радзімы — гэта складовыя часткі адной уласцівасці душы».

Завяршэннем паездкі стала працоўная нарада ў Гродзенскім епархіяльным упраўленні, дзе пад старшынствам Праасвяшчэннага Антонія, епіскапа Гродзенскага і Ваўкавыскага, адбылося абмеркаванне далейшых творчых планаў аўтарскага калектыву факультатыва і ўкладу Гродзенскай епархіі ў агульную справу.

Фота: grodnonews.by

Сінадальны аддзел БПЦ па супрацоўніцтву са свецкімі ўстановамі адукацыі/Гродзенская епархія/Church.by