Пошук

У Мінску прайшла дабрачынная акцыя «Школьны рукзачок» для сем'яў невідушчых

26 жніўня 2018

Прыход храма свяшчэннамучаніка Уладзіміра Хіраскі ў горадзе Мінску сумесна з тэрытарыяльным цэнтрам сацыяльнага абслугоўвання насельніцтва Фрунзенскага раёна і Мінскай абласной арганізацыяй ГА «БелТІЗ» правялі сумесную дабрачынную акцыю «Школьны рукзачок».

У рамках акцыі была аказана дапамога ў падрыхтоўцы дзяцей, якія выхоўваюцца ў сем'ях невідушчых бацькоў, да новага навучальнага года. Падарункі са школьнымі прыладамі атрымалі 111 дзяцей.

Не засталіся без увагі і школьнікі сталіцы, бацькі якіх працуюць на спецыялізаваным прадпрыемстве «Светоприбор».

Падарункі для акцыі збіралі валанцёры праваслаўнага прыхода ў спецыяльных пунктах прыёму, размешчаных у супермаркетах Фрунзенскага раёна Мінска, дзе кожны жадаючы пакупнік мог на сваё меркаванне што-небудзь купіць з канцтавараў.

Дырэктар тэрытарыяльнага цэнтра Алена Свірыд, настаяцель парафіі свяшчэннамучаніка Уладзіміра Хіраскі іерэй Дзімітрый Ворса і старшыня Мінскай абласной арганізацыі ГА «БелТІЗ» Святлана Сянько правялі сустрэчу з намеснікам дырэктара ўнітарнага прадпрыемства «Светоприбор» Таццянай Смаляк і старшынёй першаснай вытворчай арганізацыі ГА «БелТІЗ» Таццянай Гаўрылавай, на якой абмеркавалі далейшыя планы сумеснай працы.

Church.by