Пошук

У мазырскі кафедральны сабор прынесена шануемая копія Жыровіцкай іконы Божай Маці

08 мая 2018

Увечары 6 мая 2018 года перад пачаткам вячэрняга ўстаўнога богаслужэння ў кафедральны сабор святога Архангела Міхаіла ў горадзе Мазыры адбылося прынясенне копіі цудатворнай іконы Божай Маці, названай «Жыровіцкая».

Святы абраз сустрэлі епіскап Тураўскі і Мазырскі Леанід і клірыкі Тураўскай епархіі, пасля чаго святыню ўрачыста ўнеслі ў сабор і здзейснілі малебен з чытаннем Акафіста Прасвятой Багародзіцы.

Богаслужэнне ўзначаліў епіскап Леанід. Архіпастыру саслужылі: ключнік сабора протаіерэй Аляксандр Шылёнак, выконваючы абавязкі благачыннага Мазырскай гарадской акругі протаіерэй Ілья Шыць, настаяцелі храмаў горада Мазыра і Мазырскага раёна, духавенства і клірыкі кафедральнага сабора Жыровіцкага Успенскага манастыра, якія суправаджаюць святую ікону.

Цудатворны абраз будзе знаходзіцца ў кафедральным саборы святога Архангела Міхаіла ў горадзе Мазыры да 12 мая 2018 года. Кожны дзень перад ім будзе здзяйсняцца малебен з акафістам згодна з устаноўленым графікам (па заканчэнні Бажэственнай літургіі, у 14:00 і па заканчэнні вячэрняга богаслужэння).

Пакланіцца святыні можна будзе штодня з 07:30 да 19:30.

Даведкі па тэлефоне: 8 (0236) 32 93 79.

Прынясенне копіі цудатворнага абраза Божай Маці «Жыровіцкая» у епархіі Беларускага Экзархату ажыццяўляецца ў рамках праграмы царкоўна-грамадскіх мерапрыемстваў, звязаных з юбілейнымі датамі 2020 года: 550-годдзем яўлення Жыровіцкай іконы Прасвятой Багародзіцы, 500-годдзем з часу яе паўторнага знойдзення і 500-годдзем заснавання Успенскага Жыровіцкага манастыра.

У перыяд з 18 красавіка па 3 верасня 2018 года плануецца здзейсніць прынясенне святыні ва ўсе епархіі Беларускай Праваслаўнай Царквы, а таксама ў стаўрапігіяльныя абіцелі Беларускага Экзархату.

Тураўская епархія / Church.by