Пошук

Вечар памяці архіепіскапа Гомельскага Арыстарха (Станкевіча) прайшоў у Мазыры

27 красавіка 2017

23 красавіка 2017 года ў вялікай зале Мазырскага музычнага каледжа адбыўся вечар памяці, прысвечаны 5-годдзю смерці незабыўнага архіепіскапа Гомельскага і Жлобінскага Арыстарха (Станкевіча).

Мерапрыемства было арганізавана Тураўскай епархіяй сумесна з Мазырскім музычным каледжам і Гомельскай абласной філармоніяй.

У вечарыне ўдзельнічалі клірыкі і міране Тураўскай епархіі, духоўныя дзеці архіепіскапа Арыстарха.

У ходзе мерапрыемства са сцэны сваімі ўспамінамі аб спачылым уладыку падзяліўся епіскап Тураўскі і Мазырскі Леанід, архіерэйскае служэнне якога ў якасці вікарыя Гомельскай епархіі пачыналася пад свяціцельскім амафорам архіепіскапа Арыстарха.

Протаіерэй Георгій Фаменка, дыяканская хіратонія якога была здзейсненая архіепіскапам Арыстархам у 1992 годзе, таксама падзяліўся сваімі цёплымі ўражаннямі пра незабыўнага ўладыку.

Пляменніца архіепіскапа Арыстарха Таццяна Іванаўна Сіўчук падзялілася ўспамінамі свайго дзяцінства пра ўладыку, калі ён у 1960-я гады, служачы ў арміі на тэрыторыі Германіі, прыязджаў у родную сям'ю, і распавяла аб апошняй сваёй сустрэчы з архіерэем, якая адбылася напярэдадні яго смерці ў 2012 годзе.

На вечарыне прагучалі творы класічнай музыкі і царкоўныя песнапенні ў выкананні камернага хору Гомельскай абласной філармоніі. У праграму ўвайшлі таксама і любімыя кампазіцыі ўладыкі Арыстарха.

Кіраўнік хору Гомельскай абласной філармоніі Алена Канстанцінаўна Сакалова падзялілася сваімі ўспамінамі аб тым, як архіепіскап Арыстарх папрасіў хор выступіць перад Свяцейшым Патрыярхам Маскоўскім і ўсяе Русі Аляксіем II падчас Першасвятарскага візіту Яго Свяцейшасці ў Гомельскую епархію ў 1991 годзе, калі Тураўская епархія не была адроджана як самастойная.

Таксама адбыўся паказ запісу апошняга віншавання архіепіскапа Арыстарха з Пасхай Хрыстовай, якое і стала свайго роду завяшчаннем уладыкі для вернікаў.

Тураўская епархія / Church.by