Пошук

Дэлегацыя Хрысціянскага адукацыйнага цэнтра і Мінскага гарадскога інстытута развіцця адукацыі здзейсніла адукацыйную паездку ў Вестфалію

06 ліпеня 2018

З 25 па 29 чэрвеня 2018 года па благаславенню мітрапаліта Мінскага і Заслаўскага Паўла, Патрыяршага Экзарха ўсяе Беларусі, сумесная дэлегацыя Хрысціянскага адукацыйнага цэнтра імя святых Мяфодзія і Кірыла і Мінскага гарадскога інстытута развіцця адукацыі наведала з адукацыйнай мэтай Педагагічны інстытут Евангелічнай царквы Вестфаліі.

У склад дэлегацыі ўвайшлі: святар Святаслаў Рагальскі, старшыня МГА «Хрысціянскі адукацыйны цэнтр імя святых Мяфодзія і Кірыла»; протаіерэй Уладзімір Башкіраў, загадчык кафедры багаслоўя Інстытута тэалогіі Беларускага дзяржаўнага ўніверсітэта; Таццяна Іванаўна Мароз, рэктар ДУА «Мінскі гарадскі інстытут развіцця адукацыі»; Ніна Мікалаеўна Захожая, начальнік упраўлення каардынацыі павышэння кваліфікацыі спецыялістаў ДУА «Мінскі гарадскі інстытут развіцця адукацыі»; Вольга Леанідаўна Бойка, дырэктар ДУА «Гімназія № 11 горада Мінска».

Мэтай паездкі з'яўлялася вывучэнне міжнароднага педагагічнага вопыту выкладання дысцыплін духоўна-маральнай накіраванасці ў агульнаадукацыйных і царкоўных школах, а таксама знаёмства з методыкай падрыхтоўкі і павышэння кваліфікацыі настаўнікаў, якія выкладаюць рэлігіязнаўства ў адукацыйных установах Германіі.

Па прыбыцці, 25 чэрвеня, дэлегацыя сустрэлася з дацэнтамі Педагагічнага інстытута Марка Зоргам і Томасам Шультэрам, абмеркавала праграму знаходжання і арганізацыйныя пытанні. Затым удзельнікі паездкі наведалі Інстытут міжцаркоўных сувязяў і місіялогіі ў горадзе Дортмунд, дзе адбылася сустрэча з супрацоўнікам інстытута Томасам Крыгерам, які адказвае за кантакты з краінамі Усходняй Еўропы. У гэтым жа інстытуце дэлегацыя наведала Біблейскі музей-лабараторыю і сустрэлася з навуковым супрацоўнікам лабараторыі Штэфанам Цайпельтам.

У ходзе экскурсіі па музею-лабараторыі ўдзельнікам дэлегацыі былі прадстаўлены інавацыйныя метады выкладання курсаў Свяшчэннага Пісання для дзяцей і моладзі. У прыватнасці, была паказана гісторыя перадачы біблейскага тэксту ад старажытных рукапісаў і друкаваных выданняў аж да найноўшых інфармацыйных тэхналогій. Заняткі ў Біблійным музеі-лабараторыі з'яўляюцца абавязковымі пры праходжанні катэхізацыі ў царкоўных грамадах Дортмунда.

26 чэрвеня дэлегацыя наведала царкоўную школу Гельзенкірхен, якая забяспечвае атрыманне агульнай сярэдняй адукацыі ў традыцыях хрысціянскай духоўнай культуры. Выкладчык школы Брыт Мёрынг распавяла аб ходзе навучальнага працэсу і асаблівасцях царкоўных школ, якіх у Германіі налічваецца каля 1000. Асаблівасцю школы Гельзенкірхен з'яўляецца тое, што ў яе будаўніцтве і ўладкаванні прымаюць непасрэдны ўдзел самі навучэнцы, іх бацькі і педагогі, якія належаць да мясцовай царкоўнай суполкі.

У другой палове дня ўдзельнікі дэлегацыі наведалі Дортмундскі цэнтр павышэння кваліфікацыі настаўнікаў і прынялі ўдзел у семінары для педагогаў, якія праходзяць курсы. На семінары была прадстаўлена сістэма падрыхтоўкі спецыялістаў, якія рыхтуюцца да выкладання рэлігіязнаўчых дысцыплін у школах, а таксама асаблівасці выкладання асноў хрысціянства, ісламу і іудаізму з улікам цяперашняй сітуацыі ў Германіі. У прыватнасці, было адзначана, што ў некаторых школах Германіі ў цяперашні час навучаецца да 90% дзяцей з мусульманскіх сем'яў.

У завяршэнне дня дэлегацыя наведала парафіяльную суполку святога Віктара ў горадзе Швертэ і сустрэлася з суперінтэндэнтам Марцінай Эспелоер, якая наведвала Мінск у 2016 годзе і ўдзельнічала ў міжнародных Кірыла-Мяфодзіеўскіх чытаннях, а таксама з доктарам Клаусам Ёханінгам, які распавёў пра гісторыю сярэднявечнага храма святога Віктара.

27 чэрвеня дэлегацыя наведала ўніверсітэт горада Падэрборн, дзе пазнаёмілася з сістэмай універсітэцкага выкладання рэлігіязнаўчых дысцыплін і падрыхтоўкай бакалаўраў і магістраў рэлігіязнаўства. У другой палове дня дэлегацыя наведала «Біблейскую вёску» ў горадзе Рытберг — унікальны комплекс, які ўзнаўляе атмасферу Палесціны часоў Новага Запавету. У «Біблейскай вёсцы» адноўлены тыпы будынкаў, у якіх жылі людзі ў часы Госпада Іісуса Хрыста, прадстаўлены асноўныя віды рамёстваў і лад жыцця той эпохі. «Біблейская вёска» штодня прымае з экскурсіяй да 40 школьнікаў, якія могуць у інтэрактыўнай форме пазнаёміцца з укладам жыцця і побытам біблейскіх часоў.

28 чэрвеня ў горадзе Білефельд адбылася сустрэча са старшынёй аддзела міжцаркоўных сувязяў Евангелічнай царквы Вестфаліі доктарам Ульрыхам Меллерам і доктарам Вальфрамам фон Морыцам. На сустрэчы былі абмеркаваны напрамкі далейшага супрацоўніцтва ў пытаннях духоўна-маральнай і рэлігійнай адукацыі, а таксама праект будучай адукацыйнай праграмы «Знаёмства з Праваслаўем» для прадстаўнікоў Евангелічнай царквы Вестфаліі ў Мінску.

29 чэрвеня ў Педагагічным інстытуце адбылася заключная сустрэча дэлегацыі з рэктарам доктарам Райнэрам Ціммерам і супрацоўнікамі Інстытута, на якой былі падведзены вынікі адукацыйнай паездкі і абазначаны магчымыя формы далейшага ўзаемадзеяння бакоў і абмену педагагічным вопытам.

Хрысціянскі адукацыйны цэнтр / Church.by