Пошук

Мінскі дзіцяча-юнацкі хор «Встреча» атрымаў перамогу на XXXVIII Міжнародным фестывалі «Гайнаўскія дні царкоўнай музыкі»

14 мая 2019

Дзіцяча-юнацкі хор «Встреча» мінскага прыхода іконы Божай Маці «Усіх тужлівых Радасць» стаў уладальнікам I прэміі XXXVIII Міжнароднага фестывалю «Гайнаўскія дні царкоўнай музыкі» у Рэспубліцы Польшча. Форум праваслаўных спеваў праходзіў у Гайнаўцы з 6 па 11 мая і сабраў 27 хораў з 11 краін.

Фестываль праводзіцца пад ганаровым патранажам Прэзідэнта Рэспублікі Польшча, а адкрывае «Гайнаўскія дні царкоўнай музыкі», па традыцыі, Прадстаяцель Польскай Праваслаўнай Царквы.

Па выніках конкурснага праслухоўвання хор «Встреча» заняў I месца ў катэгорыі «дзіцяча-юнацкія хоры». Удзел харавога калектыву ў гэтым прэстыжным харавым конкурсе стала сведчаннем высокага майстэрства, сабранасці і вынослівасці харыстаў, якія выступаюць пад кіраўніцтвам Людмілы Літошык.

Гэтая паездка, якую ў некаторай ступені можна прыраўняць да паломніцтва, стала для ўдзельнікаў калектыву вельмі пазнавальнай. На шляху ў Гайнаўку хор наведаў Жыровіцкі Успенскі манастыр, а таксама з начлегам Супрасльскі Благавешчанскі манастыр. 8 мая, пасля завяршэння выступлення, харысты прынялі ўдзел у сяброўскай сустрэчы ля вогнішча, арганізаванай для ўсіх удзельнікаў 1-га дня конкурсу, дзе таксама прадэманстравалі сваё вакальнае майстэрства. Хор выканаў песні пра вайну, паколькі быў вечар напярэдадні Дня Перамогі, і атрымаў усеагульную падтрымку.

9 мая хор выступіў з канцэртам у агульнаадукацыйнай школе горада Сухаволі.

Яшчэ адзін беларускі харавы калектыў таксама стаў лаўрэатам фестывалю «Гайнаўскія дні царкоўнай музыкі». Хор парафіі роўнаапостальных Мяфодзія і Кірыла горада Ваўкавыска (рэгент Алена Юзва) быў удастоены звання лаўрэата II ступені.

* * *

Дзіцяча-юнацкі хор «Встреча» заснаваны ў 1998 годзе. З 2009 года рэгентам дзіцячага хору З'яўляецца Людміла Літошык, выпускніца Беларускай акадэміі музыкі па класе «Харавое дырыжыраванне». У 2011 годзе хор прымаў удзел у фестывалі «Державный глас», які праходзіць у Лізавецінскім манастыры Мінска, у 2015 і 2016 гадах — удзельнічаў у фестывалі «Блаженны чістые сердцем». У рэпертуары хору — царкоўныя спевы, калядкі, духоўныя вершы.

Міжнародны фестываль «Гайнаўскія дні царкоўнай музыкі» штогод праводзіцца з 1982 года. Першыя гады фестываль праходзіў як агульнапольскае мерапрыемства, хоць ужо тады яго наведвалі калектывы з іншых краін, у тым ліку і з СССР. Сёння фестываль з'яўляецца музычным форумам, які збірае не толькі знатакоў праваслаўных песнапенняў, але і ўсіх, хто мае дачыненне да сучаснага развіцця Падляшскага краю Польшчы. Фестываль царкоўнай музыкі стаў сапраўдным брэндам, адным з самых прэстыжных форумаў такога профілю ва ўсёй Еўропе. Да цяперашняга часу ў ім прынялі ўдзел больш за 800 харавых калектываў з сарака краін свету.

Sobor.by / Church.by