Пошук

У межы Беларускай Праваслаўнай Царквы дастаўлены каўчэг з часцінкай мошчаў прападобнага Сергія Раданежскага

25 чэрвеня 2022

У гэтым годзе Руская Праваслаўная Царква адзначае 600-годдзе з дня знойдзення мошчаў прападобнага Сергія Раданежскага. У азнаменаванне юбілейнай даты Камісіяй Рускай Праваслаўнай Царквы па развіццю паломніцтва і прынясенню святынь пры падтрымцы шэрагу грамадскіх аб'яднанняў арганізавана маштабная праграма прынясення каўчэгаў з часцінкамі мошчаў прападобнага Сергія Раданежскага ў епархіі Рускай Праваслаўнай Царквы.

Пакланіцца святыні на працягу бліжэйшых месяцаў змогуць вернікі з больш за 60 епархій Расіі, Беларусі і Казахстана.

Па благаславенню Свяцейшага Патрыярха Маскоўскага і ўсяе Русі Кірыла 25 чэрвеня 2022 года святыня прыбыла ў Беларусь. Перад адпраўленнем каўчэга з мошчамі раніцай у Троіцы-Сергіевай Лаўры адбыўся малебен на пачатак хрэснага ходу, які здзейснілі архіепіскап Віцебскі і Аршанскі Дзімітрый і намеснік Свята-Троіцкай Сергіевай Лаўры епіскап Сергіева-Пасадскі Фама. Вечарам святыню ўрачыста сустрэлі каля кафедральнага сабора Успення Прасвятой Багародзіцы горада Маладзечна. Тут каўчэг з часцінкай мошчаў будзе даступны для пакланення 26 чэрвеня (з 13.00 да 21.00), 27 чэрвеня з (7.00 да 21.00), 28 чэрвеня (з 7.00 да 15.00), затым святыню даставяць у Лідскую епархію.

У межах Беларускай Праваслаўнай Царквы каўчэг з мошчамі будзе знаходзіцца да 8 жніўня 2022 года.

Графік знаходжання каўчэга з часціцай мошчаў

Маладзечанская епархія: 26-28 чэрвеня

Лідская епархія дыяцэзія: 29-30 чэрвеня

Навагрудская епархія: 1-03 ліпеня

Гродзенская епархія: 4-06 ліпеня

Брэсцкая епархія: 7-09 ліпеня

Пінская дыяцэзія: 10-12 ліпеня

Тураўская епархія: 13-14 ліпеня

Слуцкая епархія: 15-17 ліпеня

Мінская епархія: 18-20 ліпеня

Бабруйская епархія: 21-23 ліпеня

Гомельская епархія: 24-26 ліпеня

Магілёўская епархія: 27-30 ліпеня

Барысаўская епархія: 31 ліпеня - 2 жніўня

Полацкая епархія: 3 - 5 жніўня

Віцебская епархія: 5 - 8 жніўня

***

Прападобны Сергій Раданежскі — адзін з самых шануемых рускіх святых.

Варфаламей (так звалі прападобнага да манаскага пострыгу) нарадзіўся ў набожнай сям'і растоўскіх баяр Кірыла і Марыі. Калі дзеці выраслі, яны прынялі манаскі пострыг і сышлі ў Хоцькаў манастыр, каб правесці астатак свайго зямнога жыцця ў подзвігу пакаяння і малітвы. Пасля смерці бацькоў юнак пасяліўся ў глухім лесе недалёка ад Раданежа, на ўзгорку Макавец, і пабудаваў там царкву ў імя Святой Тройцы. Цяпер на гэтым месцы стаіць Троіца-Сергіева Лаўра. У 23 гады Варфаламей пастрыгся ў манахі з імем Сергій. Паступова вакол яго сталі збірацца іншыя манахі, і пустынь стала Троіцкім манастыром, а Сергій стаў яго ігуменам.

Ігумен Сергій не імкнуўся да ўлады і жадаў адасобленай малітвы, жыў проста і бедна і падаваў манахам прыклад пакоры і працавітасці: сам рабіў вопратку і абутак для браціі, будаваў келлі, пёк прасфоры. Наведвальнікі манастыра часта прымалі яго за простага манаха. Мітрапаліт Маскоўскі Аляксій хацеў прызначыць прападобнага сваім пераемнікам, але Сергій адмовіўся, жадаючы працягваць простае манаскае жыццё.

Сергій адыграў вялікую ролю ў вызваленні Маскоўскай Русі ад татара-мангольскага прыгнёту, благаславіўшы войска князя Дзмітрыя Данскога на Кулікоўскую бітву. Ужо тады яго духоўны аўтарытэт быў вельмі высокі: ён мірыў варожых рускіх князёў і садзейнічаў згуртаванню рускіх зямель.

Шанаванне прападобнага Сергія Раданежскага пачалося адразу пасля яго скону. Яго вучань Епіфаній Прамудры ў 1412 годзе напісаў «Пахвальнае слова Сергію Раданежскаму» , а ў 1418-м — падрабязнае жыціе святога. У 1422 годзе мошчы святога былі здабыты нятленнымі і пастаўлены ў Троіцкім саборы Троіца-Сергіева манастыра. У 1449 або 1450 годзе мітрапаліт Маскоўскі Іона ўстанавіў яго агульнацаркоўнае шанаванне. Праз 10 гадоў пасля гэтага ў Ноўгарадзе з'явілася першая царква, асвячоная ў імя прападобнага Сергія Раданежскага. У цяперашні час храмы і капліцы, прысвечаныя прападобнаму Сергію Раданежскаму, існуюць у Расіі, Беларусі, Венгрыі, Германіі, Канадзе, Бразіліі, Кітаі, Тайландзе і іншых краінах.

Фота: Маладзечанская епархія

Church.by