Пошук

Круглы стол, прысвечаны памяці мітрапаліта Філарэта, правёў моладзевы рух AGIOS

24 сакавіка 2021

Круглы стол, прысвечаны памяці мітрапаліта Філарэта, правёў 21 сакавіка 2021 года моладзевы рух AGIOS Усіхсвяцкага прыхода г. Мінска.

У пачатку мерапрыемства сваімі каштоўнымі ўспамінамі падзяліўся настаяцель храма — протаіерэй Фёдар Поўны, вучань і паплечнік уладыкі Філарэта. Айцец Фёдар расказаў маладым людзям пра асобу ўладыкі, яго духоўныя і асветніцкія подзвігі. Характэрнай рысай слаўнага настаўніка было спалучэнне дбайнага служэння Богу і паважлівага стаўлення да кожнага чалавека. Для ўладыкі былі важныя не рэгаліі і званні, а сам чалавек, яго жыццё, радасці і праблемы. Мітрапаліт Філарэт прапаведаваў ўсёй сваёй сутнасцю, ладам жыцця. Ён не казаў пра Бога, ён жыў з Богам. І ў гэтым была яго вялікая сіла — падкрэсліў протаіерэй Фёдар.

Эстафету апавядання прыняў Мікалай Камарчук, кіраўнік моладзевага руху AGIOS. Ён распавёў аб плёне служэння ўладыкі Філарэта на Беларускай зямлі, аб яго падзвіжніцкай дзейнасці ў імя духоўнага развіцця краіны.

У 1978 годзе, калі ўладыка быў абраны мітрапалітам Мінскім і Беларускім, Беларуская Праваслаўная Царква перажывала цяжкія часы. Былі зачынены епархіі і манастыры, не было духоўнай адукацыі. За 35 гадоў вернага служэння мітрапаліт Філарэт адрадзіў духоўнае жыццё Беларусі.

Першы Экзарх Беларускай Праваслаўнай Царквы аднавіў і стварыў новыя епархіі, вярнуў да жыцця закрытыя раней прыходы і манастыры. Мітрапаліт Філарэт аднавіў заняткі ў Мінскай духоўнай семінарыі, развіў сістэму духоўнай адукацыі ў краіне.

Уладыка быў духоўным лідарам Беларусі, яго сілу і самаадданасць прызнавалі прадстаўнікі ўсіх канфесій. А ў 2006 годзе Патрыяршы Экзарх быў удастоены звання «Герой Беларусі» — такой вялікай была мера яго служэння беларускаму народу.

Напрыканцы сустрэчы адбыўся паказ кароткаметражнага фільма, падрыхтаванага моладзевым рухам да дня нараджэння мітрапаліта Філарэта. Гэтая праца стала данінай любові і павагі да ўладыкі, яго духоўнага подзвігу.

Увечары гэтага ж дня ўдзельнікі моладзевага руху наведалі мерапрыемства, прысвечанае памяці спачылага мітрапаліта Філарэта ў Нацыянальным мастацкім музеі Беларусі.

Ушанаваць памяць уладыкі сабраліся прадстаўнікі духавенства, дзяржаўныя дзеячы і проста ўдзячныя прыхаджане, чые служэнне і жыццё былі непарыўна звязаныя з асобай адданага сына Царквы.

Мітрапаліт Мінскі і Заслаўскі Веніямін, Патрыяршы Экзарх усяе Беларусі адзначыў асаблівую ролю спачылага Экзарха ў станаўленні Беларускай Праваслаўнай Царквы.

Значным экспанатам выставы, арганізаванай у памяць аб мітрапаліце, стала саламяная мітра, вырабленая па ініцыятыве настаяцеля храма Усіх Святых протаіерэя Фёдара Поўнага.

У завяршэнне вечара для гасцей прагучалі музычныя творы ў выкананні выдатных калектываў беларускіх храмаў і духоўных школ.

Сhurch.by