Пошук

Моладзь Усіхсвяцкага прыхода правяла дабрачынную акцыю «Добрае сэрца на Каляды»

18 студзеня 2021

У калядны перыяд моладзь Усіхсвяцкага прыхода ініцыіравала, арганізавала і правяла дабрачынную акцыю «Добрае сэрца на Каляды». Дзве мэты стаялі перад юнакамі і дзяўчатамі: захаванне традыцый праваслаўнай дабрачыннасці і падтрымка людзей, якія знаходзяцца ў цяжкіх жыццёвых абставінах.

Падрыхтоўка да акцыі пачалася задоўга да Каляднага посту. Частка яе заключалася ў руціннай, але вельмі патрэбнай адміністрацыйнай працы: атрыманне дазволаў на правядзенне акцыі ў гандлёва-забаўляльным цэнтры «Дана Мол» і выпечку калядных пернікаў у санэпідстанцыі Першамайскага раёна. Парадавала больш творчая праца: распрацоўка дызайну пернікаў і закупка неабходных згодна рэцэптуры прадуктаў. Да выпечкі прыступілі пасля свята Увядзення ў храм Прасвятой Багародзіцы.

Напярэдадні дня святога Мікалая была абрана пляцоўка для правядзення акцыі ў вялікім сталічным гандлёвым цэнтры. Там больш за 70 маладых людзей дваццаць дзён, змяняючы адзін аднаго, неслі вахту міласэрнасці. За гэты час больш за сто пяць тысяч чалавек падыходзілі да валанцёраў не толькі за пернікамі, але і са сваімі пытаннямі, і нават з абвінавачваннямі... Няпроста прыйшлося дзяўчатам і хлопцам, але гэта таго каштавала, бо яны сталі не толькі валанцёрамі, але і місіянерамі сярод пераднавагодняй таўханіны і мітусні.

Мінулы 2020 год стаў годам вялікіх сацыяльных і грамадскіх узрушэнняў, многія сем'і апынуліся ў цяжкім матэрыяльным становішчы і самастойна не могуць справіцца з неспрыяльнымі абставінамі. Асабліва ўразлівымі апынуліся сем'і з інвалідамі, шматдзетныя сем'і, адзінокія пажылыя людзі.

У выніку дабрачыннай акцыі былі сфарміраваны прадуктовыя наборы для падапечных тэрытарыяльнага сацыяльнага цэнтра Першамайскага раёна Мінска. Шматдзетныя сем'і і сем'і з інвалідамі былі запрошаны ў калядную куццю ў храм-помнік Усіх Святых, дзе на сустрэчу з імі прыйшоў протаіерэй Фёдар Поўны. Алена Фёдараўна Дастанка, намеснік старшыні мінскай гарадской арганізацыі «Беларуская асацыяцыя шматдзетных бацькоў» падзялілася сваімі ўражаннямі ад сустрэчы: «Мы былі вельмі здзіўлены ўбачаным. Па-першае, глыбокае ўражанне засталося ад гутаркі з айцом Фёдарам. Мы раней бачылі яго толькі на адлегласці і не разумелі сілы і моцы яго духу. А апынуўшыся побач, адчулі такую моцную надзею, такую моцную веру, што цяпер у нас як быццам крылы выраслі. А калі ўбачылі, якія велізарныя падарункі вы нам падрыхтавалі! І з якой любоўю яны падрыхтаваныя! Цяпер мне ёсць на каго раўняцца і ёсць на што абапірацца ў цяжкія хвіліны! Дзякуй вам вялікі!»

А вось уражанні Таццяны Леанідаўны Марцінкевіч, старшыні Першамайскага аддзялення мінскай арганізацыі ГА «Беларуская асацыяцыя дапамогі дзецям-інвалідам і маладым інвалідам»: «Мы вельмі ўдзячныя вам за тое, што рабяты пранікліся рэальнымі патрэбамі і цяжкасцямі сем'яў з інвалідамі. Вы паклалі ў падарункі менавіта тое, што нам сапраўды неабходна: садавіна замест цукерак, падгузнікі замест пазлаў. Дзівіць, які памер і аб'ём вашых падарункаў! У гэтым адчуваецца ваша сэрца, адчуваецца Божая любоў!»

Акрамя дапамогі асобным сем'ям, валанцёры «AGIOS» правялі яшчэ некалькі дадатковых акцый. Калядныя падарункавыя наборы атрымалі 50 дзяцей-інвалідаў, якія знаходзяцца на лячэнні ў Рэспубліканскім рэабілітацыйным цэнтры для дзяцей-інвалідаў. Дзіцячыя развіваючыя гульні, канцтавары, кнігі і садавіну моладзь адвезла ў Рудзенскую дапаможную школу-інтэрнат для дзяцей з асаблівасцямі псіхафізічнага развіцця. Больш за 500 адзінак сродкаў індывідуальнай асабістай гігіены атрымалі грамадскія аб'яднанні шматдзетных бацькоў і бацькоў з дзецьмі-інвалідамі. Каляднымі падарункамі былі падтрыманы мінскія ўстановы культуры, якія ў перыяд эпідэміі знаходзяцца ў бядотным становішчы. Сабраны і перададзены адміністрацыі святочныя наборы для дзетак з арганічным пашкоджаннем нервовай сістэмы і псіхікі дома дзіцяці №1 г. Мінска.

Кіраўнік моладзевага руху AGIOS Мікалай Камарчук у свята Ражджаства Хрыстова запрасіў усіх дабрадзеяў з сем'ямі ў храм-помнік у гонар Усіх Святых, дзе быў арганізаваны святочны прыём, кожнаму дабрахоту былі ўручаны падарунак і падзяка за дапамогу. Пасля чаго адбыўся канцэрт, прысвечаны святу ў гонар Нараджэння Хрыста.

За ўвесь перыяд Каляд моладзевы рух AGIOS павіншаваў 1240 чалавек, нягледзячы на тое, што ў многіх членаў моладзевага руху наступілі экзаменацыйныя сесіі. Удзел у эстафеце дабра для велізарнай колькасці людзей, ды яшчэ і сярод сяброў, дапамагае пераносіць жыццёвыя цяжкасці з радасцю і годнасцю. Як казаў прападобны Яфрэм Сірын: «Хто аказвае міласць бліжняму, той знойдзе міласць у Госпада».

Сhurch.by