Пошук

Удзельнікі міжрэлігійнай рабочай групы наведалі мемарыяльныя комплексы Дахау і Флосэнбюрг

25 лістапада 2018

У лістападзе 2018 года адбылася міжрэлігійная адукацыйная паездка «Еўрапейская культура памяці і перспектывы міжрэлігійнага ўзаемадзеяння» ў мемарыяльныя комплексы Дахау і Флосэнбюрг (Федэратыўная Рэспубліка Германія).

Паездка была арганізавана Мінскім і Дортмундскім адукацыйнымі цэнтрамі ў рамках праекта «Трасцянец — Дахау — Флосэнбюрг. Развіццё дыялогу аб мемарыяльнай рабоце ў Беларусі ў кантэксце агульнаеўрапейскай культуры памяці». Міжрэлігійны праект у бягучым годзе таксама быў прымеркаваны да памятна-журботнай даты — 75-годдзя ліквідацыі Мінскага гета.

Мэтай паездкі з'яўлялася азнаямленне з вопытам работы дакументальных цэнтраў былых канцэнтрацыйных лагераў у Дахау і Флосэнбюргу па захаванню культуры ваеннай памяці і наступным прымяненнем дадзенага вопыту пры адкрыцці дакументальнага цэнтра ў мемарыяльным комплексе «Трасцянец» у Рэспубліцы Беларусь.

У склад дэлегацыі ўвайшлі: Рыма Пашко, кіраўнік міжрэлігійнай рабочай групы пры Мінскім міжнародным адукацыйным цэнтры імя Ёханэса Рау; святар Святаслаў Рагальскі, старшыня Міжнароднага грамадскага аб'яднання «Хрысціянскі адукацыйны цэнтр імя святых Мяфодзія і Кірыла»; Аляксандр Госцеў, дырэктар дзяржаўнай установы «Беларускі культурны цэнтр духоўнага адраджэння» (Беларуская Праваслаўная Царква); ксёндз Юрый Санько, пробашч рыма-каталіцкай парафіі Святой Тройцы ў горадзе Мінску, прэс-сакратар Канферэнцыі Каталіцкіх біскупаў Беларусі; Ірына Кашталян, дырэктар Гістарычнай майстэрні імя Л. Левіна ў горадзе Мінску (Рыма-Каталіцкая Царква); Павел Асяненка, дэкан Мінскай багаслоўскай семінарыі (Саюз Евангельскіх хрысціян-баптыстаў); Рыгор Абрамовіч, галоўны рабін рэлігійнага аб'яднання абшчын прагрэсіўнага іудаізму ў Рэспубліцы Беларусь; Галіна Левіна, галоўны архітэктар мемарыяльнага комплексу «Трасцянец-Благаўшчына».

Удзельнікі адукацыйнай праграмы пазнаёміліся з гісторыяй канцэнтрацыйнага лагера Дахау, у якім падчас Другой сусветнай вайны знаходзілася ў зняволенні 2800 святароў розных хрысціянскіх канфесій. У сувязі з гэтым на тэрыторыі мемарыяльнага комплексу размешчаны храмавыя памяшканні, у тым ліку Уваскрасенская праваслаўная капліца, у якой члены дэлегацыі былі прыняты яе настаяцелем протаіерэем Мікалаем Забелічам. У памяць аб ахвярах нацызму, пацярпелых у Дахау, у капліцы была адслужана памінальная ліція.

Падчас наведвання мемарыяльнага комплексу Флосэнбюрг удзельнікі мелі магчымасць пазнаёміцца з інтэрактыўнай музейнай экспазіцыяй, якая ўключала ў сябе аўдыё - і відэапрэзентацыі архіўных хронік часоў Другой сусветнай вайны. Як стала вядома, у гэтым не гэтак шырока вядомым канцэнтрацыйным лагеры, якія знаходзяцца на мяжы з Чэхіяй, у перыяд з 1942 па 1945 гады знаходзіліся ў няволі 16 савецкіх генералаў, у тым ліку Героі Савецкага Саюза Д. М. Карбышаў, Г. І.Тхор, І. М. Шэпетаў. Пра гэта сведчыць мемарыяльная шыльда, размешчаная ў каталіцкай капліцы, пабудаванай на месцы пакарання вязняў лагера. 9 красавіка 1945 года ў канцлагеры Флосэнбюрг былі пакараны найбольш актыўныя прыхільнікі руху супраціўлення нацысцкай уладзе: вядомы нямецкі багаслоў і пастар Дзітрых Банхёфер, адмірал Вільгельм Канарыс і іншыя. На месцы пакарання вязняў канцлагера была ўзнесена памінальная малітва і здзейснена цырымонія забору зямлі для крыпты храма-помніка ў гонар Усіх святых у горадзе Мінску.

Хрысціянскі адукацыйны цэнтр / Church.by