Пошук

У 40-ю гадавіну аварыі на Чарнобыльскай АЭС Патрыяршы Экзарх узначаліў Бажэственную літургію ў храме святога Архангела Міхаіла горада Гомеля

26 красавіка 2026

26 красавіка 2026 года, у Нядзелю святых жанчын-міраносіц, Мітрапаліт Мінскі і Заслаўскі Веніямін, Патрыяршы Экзарх усяе Беларусі, у саслужэнні архіепіскапа Гомельскага і Жлобінскага Сцяфана здзейсніў Бажэственную літургію ў храме Архангела Міхаіла горада Гомеля.

Богаслужэнне было здзейснена ў 40-ю гадавіну аварыі на Чарнобыльскай АЭС у храме-помніку святога Архангела Міхаіла, які першапачаткова знаходзіўся ў вёсцы Вылева Добрушскага раёна, якая апынулася ў зоне адсялення. Як і многія сельскія храмы, ён мог быць згублены. У 2006 годзе, дзякуючы асабістаму саставу Гомельскага інжынернага інстытута МНС Рэспублікі Беларусь, храм быў перанесены ў горад Гомель.

За богаслужэннем архіпастырам саслужылі: адказны сакратар Упраўлення спраў Беларускай Праваслаўнай Царквы (Беларускага Экзархату Маскоўскага Патрыярхату) протаіерэй Андрэй Волкаў; сакратар Гомельскай епархіі протаіерэй Георгій Алампіеў; благачынны Гомельскай гарадской акругі, настаяцель храма Архангела Міхаіла горада Гомеля протаіерэй Ігар Альшанаў; благачынныя царкоўных акруг і духавенства Гомельскай епархіі.

Дыяканскі чын узначаліў протадыякан Уладзімір Назараў.

Богаслужэбныя спевы выканаў хор Петра-Паўлаўскага кафедральнага сабора горада Гомеля пад кіраваннем Алены Мароз.

Пасля запрычаснага сціха пропаведзь прамовіў настаяцель храма святога праведнага Іаана Кармянскага горада Гомеля іерэй Дзмітрый Жданаў.

Па заканчэнні богаслужэння архіепіскап Гомельскі і Жлобінскі Сцяфан звярнуўся да Патрыяршага Экзарха з прывітальным словам, у якім падзякаваў Мітрапаліту Веніяміну за сумесную малітву ў дзень Чарнобыльскай трагедыі, якая стала адной з самых цяжкіх старонак у гісторыі Беларускай зямлі. Правячы архіерэй падкрэсліў асаблівае значэнне храма Архангела Міхаіла, перанесенага з зоны адчужэння, які захоўвае памяць аб трагедыі Чарнобыля і адначасова сведчыць аб тым, што нават пасля цяжкіх выпрабаванняў захоўваюцца святыні, жывая малітва і не перарываецца духоўная сувязь пакаленняў.

На малітоўную памяць Патрыяршаму Экзарху быў паднесены абраз Божай Маці «Чарнобыльскі».

Затым Мітрапаліт Веніямін падзякаваў усім прысутным за сумесную малітву і адзначыў важнасць духоўнай памяці аб чарнобыльскай трагедыі, якая і сёння застаецца болем для Беларускай зямлі.

«У гэты дзень мы ўспамінаем аварыю на Чарнобыльскай атамнай электрастанцыі. Людзі старэйшага пакалення памятаюць, як гэта адбывалася. Жыццё працягваецца, і мы ўспамінаем з удзячнасцю той ахвярны подзвіг, які здзяйснялі ліквідатары аварыі, колькі сіл, прац было пакладзена. Вядома, трэба гэта памятаць і сёння маліцца з удзячнасцю за іх ахвярную працу, маліцца аб тых, хто ўжо завяршыў сваё зямное жыццё, спачыў. Маліцца аб тым, каб на нашай зямлі не паўтараліся больш падобныя сітуацыі. Каб мы ў міры, згодзе здзяйснялі свой жыццёвы шлях», — адзначыў Патрыяршы Экзарх.

У дар храму святога Архангела Міхаіла горада Гомеля Мітрапаліт Веніямін паднёс Жыровіцкі абраз Божай Маці.

У завяршэнне была здзейснена памінальная ліція аб усіх ахвярах аварыі на Чарнобыльскай АЭС і ўскладзены кветкі да помніка загінуўшым пажарным, размешчанага на тэрыторыі храма.

На набажэнстве прысутнічалі: Міністр па надзвычайных сітуацыях Рэспублікі Беларусь генерал-маёр Вадзім Сіняўскі, намеснік старшыні Гомельскага абласнога выканаўчага камітэта Дзмітрый Алейнікаў, старшыня Гомельскага гарадскога выканаўчага камітэта Уладзімір Прывалаў, начальнік Гомельскага абласнога ўпраўлення Міністэрства па надзвычайных сітуацыях Рэспублікі Беларусь палкоўнік Сяргей Дзічкоўскі, прадстаўнікі каманднага складу Гомельскага філіяла Універсітэта грамадзянскай абароны МНС Беларусі, вайскоўцы Гомельскай пагранічнай групы, прадстаўнікі Савецкага РАУС горада Гомеля, курсанты Гомельскага кадэцкага вучылішча, ліквідатары аварыі на ЧАЭС і сваякі ахвяр катастрофы.

У дзень 40-годдзя з дня аварыі на Чарнобыльскай АЭС па благаславенню Мітрапаліта Мінскага і Заслаўскага Веніяміна, Патрыяршага Экзарха ўсяе Беларусі, ва ўсіх храмах і манаскіх манастырах Беларускага Экзархату былі ўзнесены малітвы аб ахвярах катастрофы.

***

Аварыя на Чарнобыльскай АЭС стала самай буйной катастрофай за ўсю гісторыю атамнай энергетыкі. Яе наступствы закранулі жыццё мільёнаў людзей. Па дадзеных Міністэрства па надзвычайных сітуацыях Рэспублікі Беларусь, амаль 8,4 мільёна жыхароў Беларусі, Расіі і Украіны падвергліся ўздзеянню радыяцыі, сотні тысяч з іх былі эвакуіраваны з забруджаных тэрыторый. За мінулы пасля чарнобыльскай катастрофы час у Гомельскай і Магілёўскай абласцях спынілі існаванне 479 населеных пунктаў.

belta.by/Гомельская епархія/Church.by

Чытайце нас у мэсэнджэрах Telegram і Viber, 

сацсетках Instagram, ВКонтакте, 

Facebook і Одноклассники,

глядзіце ў YouTube і TikTok

Фотарэпартаж