Пошук

У Мінску прайшоў лыжны прабег членаў таварыства «Цвярозасць» прыхода храма іконы Божай Маці «Няўпіўная Чаша»

04 лютага 2021

У прыходскім таварыстве «Цвярозасць», якое дзейнічае пры храме іконы Божай Маці «Няўпіўная Чаша» ў горадзе Мінску, 2021 год пачаўся са спартыўных мерапрыемстваў.

У студзені сябры таварыства прынялі ўдзел у адкрытым першынстве прыхода па армрэслінгу ў гонар прападобнага Ільі Мурамца.

Завяршыўся месяц лыжным прабегам членаў таварыства «Цвярозасць», які ўзначаліў настаяцель прыхода протаіерэй Дыянісій Пясецкі. Некаторыя ўдзельнікі прабегу прызналіся, што ўпершыню сталі на лыжы пасля 30-гадовага перапынку. Іншыя ж удзельнікі прабегу, наадварот, лічаць катанне на лыжах неад'емнай часткай зімовага сямейнага вольнага часу. Менавіта яны дапамаглі адчуць сябе ўпэўнена на лыжні пачаткоўцам і атрымаць ім задавальненне ад зімовага спартыўнага мерапрыемства.

Члены таварыства сустракаюцца не толькі на тэрыторыі прыхода для групавых заняткаў па аказанню дапамогі адзін аднаму ў цвёрдым намеры весці цвярозы і здаровы лад жыцця, але таксама знаходзяць час для нефармальных зносін. Сумесныя пілігрымкі, падарожжы, хрэсныя хады і спартыўныя мерапрыемствы сталі добрай нагодай для зносін па-за сценамі храма. «Зарад бадзёрасці і добры настрой, магчымасць прыняць удзел у мерапрыемствах разам з членамі сваіх сем'яў і потым падзяліцца атрыманымі ўражаннямі — гэта тыя станоўчыя эмоцыі, якія пераконваюць чалавека ў магчымасці жыць і радавацца без ужывання псіхаактыўных рэчываў» — адзначае настаяцель прыхода храма іконы Божай Маці «Няўпіўная Чаша» протаіерэй Дыянісій Пясецкі.

Church.by