Пошук

У Нацыянальнай бібліятэцы Беларусі адбыўся ўрачысты акт, прысвечаны Дню праваслаўнай кнігі

13 сакавіка 2026

13 сакавіка 2026 года па благаславенню Мітрапаліта Мінскага і Заслаўскага Веніяміна, Патрыяршага Экзарха ўсяе Беларусі, у Нацыянальнай бібліятэцы Беларусі адбыўся ўрачысты акт, прысвечаны Дню праваслаўнай кнігі.

Арганізатарамі мерапрыемства выступілі Беларускі Экзархат, Выдавецкая рада Беларускага Экзархату, Міністэрства культуры, Міністэрства адукацыі і Міністэрства інфармацыі Рэспублікі Беларусь, Нацыянальная бібліятэка Беларусі, а таксама Свята-Лізавецінскі манастыр горада Мінска.

Урачыстасці ўзначаліў Патрыяршы Экзарх усяе Беларусі Мітрапаліт Мінскі і Заслаўскі Веніямін. У мерапрыемстве таксама прынялі ўдзел вікарый Патрыяршага Экзарха ўсяе Беларусі епіскап Нясвіжскі Аўксенцій, старшыня Выдавецкай рады Беларускага Экзархату протаіерэй Алег Кунцэвіч, рэктар Мінскай духоўнай акадэміі архімандрыт Афанасій (Сакалоў), рэктар Мінскай духоўнай семінарыі протаіерэй Віктар Васілевіч, а таксама іншыя запрошаныя святары, прадстаўнікі дзяржаўных ведамстваў, Саюза пісьменнікаў Беларусі, вышэйшых навучальных устаноў, дзеячы навукі і культуры, супрацоўнікі публічных, дзіцячых і школьных бібліятэк краіны.

У гэтым годзе праграма Дня праваслаўнай кнігі прысвечана тэме праваслаўнага краязнаўства і шэрагу значных юбілейных дат. Сярод іх-60-годдзе з дня скону і 20-годдзе праслаўлення блажэннай Валянціны Мінскай, 440-годдзе з дня нараджэння святой праведнай Сафіі Слуцкай, 865-годдзе стварэння майстрам Лазарам Богшай Крыжа прападобнай Еўфрасінні Полацкай, а таксама 430-годдзе Брэсцкага праваслаўнага царкоўнага сабора 1596 года.

Звяртаючыся да ўдзельнікаў урачыстага акта, Мітрапаліт Мінскі і Заслаўскі Веніямін падкрэсліў значэнне духоўнай кнігі ў жыцці чалавека. Па словах Патрыяршага Экзарха, ва ўмовах распаўсюджвання кароткіх паведамленняў і павярхоўнага ўспрымання інфармацыі асабліва важна захоўваць цікавасць да глыбокага чытання. Уладыка адзначыў, што духоўная літаратура, жыціі святых і сведчанні падзвіжнікаў пабожнасці дапамагаюць чалавеку знайсці адказы на многія жыццёвыя пытанні і фарміруюць уяўленні пра дабро, адказнасць і сэнс жыцця.

У рамках урачыстасцяў адбылося адкрыццё выставы ў Музеі кнігі «Найдабрэйшаму свяціцелю Царквы Божай», на якой прадстаўлены выданні з дароўнымі надпісамі Мітрапаліту Філарэту (Вахрамееву) з мемарыяльнай бібліятэкі першага Патрыяршага Экзарха ўсяе Беларусі. Таксама прайшла канферэнцыя «Асвета Беларускіх зямель праз праваслаўную кнігу. Юбілейныя даты Беларускай Праваслаўнай Царквы».

Для ўдзельнікаў была падрыхтавана выстава выданняў па гісторыі Праваслаўя, выпушчаных праваслаўнымі выдавецтвамі Беларускага Экзархату, а таксама экспазіцыя навінак праваслаўнай літаратуры.

Мерапрыемства накіравана на папулярызацыю чытання і праваслаўнай літаратуры, а таксама на раскрыццё ролі духоўнай кнігі ў маральным выхаванні і далучэнні да хрысціянскай традыцыі. Асаблівая ўвага нададзена ролі міран у захаванні праваслаўнай веры на Беларускіх землях. Удзельнікі таксама абмеркавалі пытанні камплектавання бібліятэк гістарычнай, краязнаўчай, патрыятычнай і духоўна-маральнай літаратурай.

 Church.by

Чытайце нас у мэсэнджэрах Telegram і Viber, 

сацсетках Instagram, ВКонтакте, 

Facebook і Одноклассники,

глязіце ў YouTube і TikTok

Фотарэпартаж