Пошук

У Тураўскай епархіі праходзяць урачыстасці ў гонар Юравіцкай іконы Божай Маці

13 верасня 2021

12-13 верасня 2021 года ў Тураўскай епархіі праходзяць урачыстасці ў гонар Божай Маці дзеля Яе іконы, іменаванай «Юравіцкая-міласэрная» , якая лічыцца адной з галоўных святынь Палескага краю.

Абраз захоўваецца ў мужчынскім манастыры Нараджэння Найсвяцейшай Багародзіцы ў аграгарадку Юравічы Калінкавіцкага раёна. 1 верасня абраз быў прынесены з Юравіцкага манастыра для малітоўнага пакланення вернікаў у кафедральны сабор святога Архангела Міхаіла ў горадзе Мазыры.

У першы дзень урачыстасцяў 12 верасня, у дзень 800-годдзя дабравернага вялікага князя Аляксандра Неўскага, епіскап Тураўскі і Мазырскі Леанід узначаліў Бажэственную літургію ў кафедральным саборы святога Архангела Міхаіла ў горадзе Мазыры. 

Яго Праасвяшчэнству саслужылі: благачынны Лельчыцкай акругі, настаяцель прыхода храма Святой Жыццепачатнай Троіцы ў гарадскім пасёлку Лельчыцы протаіерэй Алег Несцярэня; благачынны Мазырскай сельскай акругі, настаяцель прыхода храма прападобнага Сергія Раданежскага ў горадзе Мазыры протаіерэй Генадзь Несцярэня; благачынны Тураўскай акругі, ключнік парафіі кафедральнага сабора святых Кірыла і Лаўрэнція Тураўскіх у горадзе Тураве протаіерэй Васіль Пыцель; духаўнік Хойніцкага жаночага манастыра ў гонар Пакрова Божай Маці іераманах Павел (Палын), клірыкі сабора і духавенства Тураўскай епархіі.

Дыяканскі чын узначаліў протадыякан Аляксандр Каляда. Спевы Бажэственнай літургіі выканаў хор сабора пад кіраваннем рэгента Іааны Сіўчанка.

Па завяршэнні Літургіі была здзейснена вялікая вячэрня. З пачаткам сціхір на ліціі пад урачысты звон перасоўнай званіцы Юравіцкай абіцелі пачаўся хрэсны ход з цудатворнай іконай Божай Маці «Юравіцкая-Міласэрная» да месца пастаяннага знаходжання святыні ў Юравіцкі мужчынскі манастыр Нараджэння Багародзіцы. 

У хрэсным ходзе прынялі ўдзел больш за тысячу паломнікаў, сярод якіх — выхаванцы кадэцкіх і юрыдычных класаў ДУА «Сярэдняя школа №15 горада Мазыра імя генерала Я. С. Барадунова», навучэнцы ДУА «Сярэдняя школа №12 горада Мазыра», на базе якой сумесна з епархіяй праводзяцца адукацыйныя чытанні, прысвечаныя яўленню цудатворнай іконы «Юравіцкая-Міласэрная». Упершыню ўдзельнікамі хрэснага ходу сталі дзеці з праваслаўнага летніка «Галубка» Тураўскай епархіі.

Па шляху руху хрэснага ходу абраз Прасвятой Божай Маці сустракалі жыхары Мазыра, многія з якіх далучаліся да ўрачыстага шэсця. За горадам паломнікі пераселі ў аўтобусы і прыбылі да аграгарадка Юравічы, дзе хрэсны ход з цудатворным абразом працягнуўся.

Па прыбыцці ў Юравіцкі манастыр епіскап Тураўскі і Мазырскі Леанід ў саслужэнні духавенства епархіі і браціі манастыра ў свяшчэнным сане ўзначаліў утраню усяночнага трывання перад манастырскім саборам Нараджэння Прасвятой Багародзіцы.

За богаслужэннем маліўся намеснік Юравіцкага манастыра ігумен Аўксенцій (Абражэй).

Богаслужэбныя спевы выканаў архіерэйскі мужчынскі хор пад кіраваннем протадыякана Георгія Тыванюка.

Падчас утрані Праасвяшчэнны ўладыка перадаў багамольцам, якія прыбылі ў манастыр для пакланення цудатворнаму абразу, благаславенне праз памазанне асвячоным алеем.

Па заканчэнні богаслужэння была арганізавана трапеза і аглядная экскурсія па манастыру. Затым іншагароднія ўдзельнікі хрэснага ходу былі дастаўлены на аўтобусах у Мазыр і Калінкавічы.

13 верасня святочныя ўрачыстасці прадоўжыліся Бажэственнай літургіяй ў Юравіцкім мужчынскім манастыры Нараджэння Багародзіцы. 

Тураўская епархія/yurovichi.by/Church.by